Ang Akong Kinabuhi Ingong Pintor

SUMALA SA GIASOY NI SHIZUKO KAWABATA

“Mga Saksi ni Jehova, Buotang mga Tawo nga Nagsangyaw sa Maayong Balita sa Tibuok Kalibotan” mao ang ulohan sa usa sa akong mga dibuho nga gipasundayag diha sa usa ka eksibisyon sa arte sa Versailles, Pransiya, sa 1999.

WALAY semana una pa sa eksibisyon, ang mga Saksi ni Jehova sa Pransiya nanagtag sa tibuok nasod ug 12 ka milyong tract nga naghisgot bahin sa dili-makataronganong pagmaltrato sa gobyerno kanila. Tungod sa akong dibuho nga nagdayeg sa mga Saksi, gihatagan ako ug linain nga ganti. Dayon, ang tawo nga tagdumala nga naghatag niini miingon: “Ikaw dunay kaisog, ug ako dunay kaisog usab. Maoy hinungdan nga gihatagan ka nako niining linain nga ganti.”

Ipadayag sa daghang dibuhista ang pagbati ug emosyon diha sa ilang mga dibuho. Mao kanay akong gipaningkamotan. Ang akong mga dibuho nagpabanaag sa akong pagbati, ug ang akong mga dibuho masadyaong tan-awon, nga nagpabanaag sa akong kalipay. Sa bata pa, akong namatikdan ang akong bationg kalipay sa pagkahimong mamugnaon ug pagdibuho.

Kon Nganong Nagsugod Ako sa Pagdibuho

Natawo ako sa 1920 sa adunahan nga mga ginikanan sa Morioka, Japan. Ako ug ang akong magulang nga babaye dunay kaugalingong mga magtutudlo  nga nagtudlo kanamo ug Hapones nga estilo sa pagsayaw, paghan-ayg mga bulak, seremonyas sa pagdalit ug tsa, koto (Hapones nga gitara), piano, pag-awit, ug uban pa. Wala gayod akoy gusto niining tanan. Inig-abot sa mga magtutudlo, modagan ako ug motago. Pangitaon ako sa mga katabang ug guyoron ako pagbalik.

Ang lisod nga mga leksiyon maoy akong gikalagotan. Ang mga tawo nga wala pa nako mahibalag sukad maoy nagdesisyon kon unsaon nako pagsayaw, paghan-ayg mga bulak, ug pagdalit ug tsa. Gibati ko nga morag piniriso ako, morag dili ako makabuot sa paghunahuna alang sa akong kaugalingon ug maghimog personal nga mga tumong. Apan, sa dihang magdibuho ako, walay magbantay kanako. Walay mosulti kanako kon unsay akong himoon. Kini nga kagawasan ang akong gitinguha.

Kay wala man akoy magtutudlo sa arte, makahimo ako sa pagdibuho sumala sa akong mahunahunaan, ug walay manaway kanako. Sa anam-anam nagkaarisgado ako sa arte sa pagdibuho. Sa nag-edad ug 12, manguha ako ug seda nga mga korbata sa akong amahan ug dibuhoan kini. Wala magdugay human niana, nanahi kami ug mga sinina diha sa tunghaan. Ang akong magtutudlo nakurat sa dihang nakita niya nga akong gitabasan ang katunga sa atubangan sa sinina ug gipulihan kini ug puti nga panapton. Apan, sama sa akong amahan, wala siyay komento.

Mga Pangandoy ug Tinuod nga Kahimtang

Sa nagtungha pa sa elementarya, ako miingon nga modako ako nga usa ka pintor. Ang akong tumong wala mausab, ug gusto kong motungha sa unibersidad aron magtuon sa arte; apan wala mosugot ang akong mga ginikanan. Matod pa nila nga sa Japan, ang graduwado sa arte dili maayong kuhaon ingong pangasaw-onon. Busa mikuha ako ug kurso nga nagtudlo ug kahanas nga magamit sa panimalay.

Gusto ko ug langyaw nga mga balak ug langyaw nga mga libro ug nakabasa ug daghan kaayo niini. Apan, sa maong panahon, kini giisip ingong basahon sa kaaway. Bisan ang pagbaton niining mga basahona peligroso. Sa tunghaan nakatuon ako ug pinulongang Pranses sulod sa lima ka tuig ilalom sa usa ka magtutudlong Pranses, apan nausab ang mga kahimtang sa Japan mao nga ang interes bisan sa langyawng mga pinulongan gikatahapan. Kami walay kagawasan sa pagsulti.

Sa 1943, samtang gisangka pa ang Gubat sa Kalibotan II, nalipay ako sa pagkadungog nga human makatan-awg 40 ka letrato sa batan-ong mga dalaga nga husto nag edad nga magminyo, napili ako sa usa ka lalaki ingong pangasaw-onon. Akong nahibaloan sa ulahi nga ang iyang inahan ug higala sa iyang inahan miadto sa among lugar aron tan-awon ako sa hilom. Human niadto, ang ilang pamilya nagpadala ug pormal nga sakna sa kaminyoon sa among pamilya, ug gihaylo ako sa pagdawat niana. Nakita nako ang lalaki kas-a lang una pa sa among kasal.

Human sa among kasal, ang among mga kinabuhi nameligro adlaw-adlaw tungod sa pagpamomba sa mga ayroplano, ug sa kataposan ang among balay nasunog lakip ang tibuok siyudad. Ang nangaluwas mibakwit sa bukid, apan bisan didto madungog namo ang sipa kaayong mga pito ug makita ang mga ayroplanong iggugubat. Makalilisang kaayo kadto. Ang tanan nag-antos. Ang napulo ka tuig human sa gubat pait usab kaayo.

Gawas sa among tulo ka anak, ang akong ugangang babaye ug unom sa mga igsoong lalaki ug babaye sa akong bana nagpuyo ipon namo. Bisag kami dunay mga katabang, kaming tanan kinahanglang motrabaho sa uma aron makakaon. Niadtong panahona naguol kaayo ako ug dili na makagahom sa pagkatawa. Apan, nahadlok ako nga kon isulti ko ang akong gibati basin may motunghang di-pagsinabtanay. Hinunoa, sa hinayhinay, nakita nako nga makapasundayag ako sa akong pagbati diha sa akong dibuho.

Nainila Ingong Usa ka Pintor

Bisan ang tawo nga may gasa sa pagdibuho kinahanglang maningkamot ug maayo una pa maangkon ang mapuslanong mga resulta. Namalit akog mga libro bahin sa arte, ug nagtuon ilalom sa ubay-ubayng maayong laking mga pintor sa Japan. Walay usa kanila ang misugyot sa pag-usab sa akong estilo nga akong naugmad sa bata pa.

 Ang mga kritiko sa arte nakamatikod sa akong mga dibuho, apan nagdibuho ako alang sa akong kalipay, dili aron ipasundayag ang akong mga dibuho ngadto sa uban. Apan, sa ulahi, nakapamalandong ako kon unsay hunahuna sa mga tawo sa akong mga dibuho. Busa sa 1955, gihimo nako ang akong unang pagpasundayag sa dibuho diha sa Ginza sa Tokyo. Kini nag-ulohang “Hilom nga Pakigbisog, Hilom nga Sulti, Akong Talaadlawan,” ug kini nagpasundayag sa matag adlaw nga kinabuhi pinaagi sa dibuho. Malamposon ang pasundayag sa dibuho.

Nahibalag ang mga Saksi

Sa 1958 ang among pamilya mibalhin sa Tokyo tungod kay ako ug ang akong bana gustong makatungha ang among mga anak sa kinamaayohang mga tunghaan ug makabaton sa labing maayong edukasyon kon mahimo. Nahimong sentro sa akong kinabuhi ang pagdibuho. Mogahin gayod ako ug mga lima ka oras sa usa ka adlaw sa pagdibuho. Magabii mogawas ako uban sa akong mga higalang pintor, ug ang akong bana mogawas uban sa iyang mga higala. Kami wala gayoy alamag kon unsaon pagmatuto ang among mga anak.

Tungod sa trabaho sa akong bana, kanunayng wala siya sa balay, busa ang pagmatuto sa mga anak nahimong akong responsibilidad, ug nawad-an ako ug pagsalig sa pagmatuto sa among mga anak. Sa bata pa, nakatungha ako sa tunghaan nga gipalakaw sa Katoliko, ug gusto kong masayod kon makatabang ba ang usa ka matang sa edukasyon sa Bibliya. Sa tabok sa dalan atbang sa among balay sa Omori, Tokyo, maoy usa ka simbahan sa Lutheran, ug giingnan nako ang akong mga anak nga among adtoon kini. Apan wala gayod kami makaadto sa simbahan.

Hinunoa, sa pagkasunod gayod nga adlaw​—sa unang bahin sa 1959​—usa sa mga Saksi ni Jehova miduaw sa among balay. Dalidali nakong gitawag ang mga bata, ug kaming tanan nanglingkod aron mamati. Gisaysay sa Saksi gikan sa Bibliya nga kami nagkinabuhi na sa hinungdanong yugto sa panahon sa dihang paphaan sa Diyos ang yuta ug pagkadaotan. Mipedido ako ug upat ka Bibliya lakip sa literatura sa Bibliya ug midawat dayon sa iyang tanyag nga moduaw siya matag semana aron tudloan kami. Nangutana ako kon pila ang binulan nga bayad ug nahibulong sa pagkahibalo nga dili modawat ug bayad ang mga Saksi ni Jehova alang sa ilang pagpanudlo. Pagkalahi kini gikan sa tanang magtutudlo nga akong nailhan!

Gidawat dayon sa akong mga anak nga babaye ang mga kamatuoran sa Bibliya, ug gani nasugdan ang regular nga grupo sa pagtuon diha sa among balay matag semana. Apan human sa pipila ka pagtuon, ako nagsugod sa pagbatig kagil-as. Ang panahon sa pagtuon malisod kaayo alang kanako, busa may mga panahon nga motago ako ug mogawas kon panahon na alang sa akong pagtuon sa Bibliya.

Ang akong problema mao nga akong nasabtan nga husto ang tanang giingon sa Bibliya ug nga kinahanglang mosunod ako sa pagtultol niini. Apan, sa samang higayon, porsigido ako nga mahimong maayong laking pintor, ug nagtuo ako nga kinahanglang duna akoy libreng kaisipan aron makapatungha ug dibuho nga minugna sa hunahuna. Tungod sa kagubot sa akong gibati, ang akong pagdibuho nadaot. Ang akong mga dibuho gipadaplin na lang diha sa mga pasundayag sa dibuho.

Ang Akong Biyahe Ngadto sa Paris

Gibati ko nga ang pag-adto sa Paris makatabang kanako aron mapauswag ang akong mga dibuho. Mao nga sa 1960, miadto ako didto, kay dunay usa ka dakong pasundayag sa mga dibuhong Hapones nga gihimo sa Pransiya sa unang higayon. Ako lamang ang babayeng pintor nga gikan sa Japan ang mitambong. Sa Paris ang kalainan sa kahimtang sa panimuyo, mga sapot, mga ideya, kolor​—tanan—​nakaikag kaayo kanako. Ang pasundayag sa arte miabot ug upat ka adlaw, ug sa akong kakurat, ang mga lider sa nasod mitan-aw sa pasundayag sa mga dibuho. Apan, nakurat usab ako nga ang mga babaye nakagusto kaayo sa kimono nga akong gisul-ob. Mihukom ako nga moestar ug dugaydugay.

Kay wala mahibalo kon unsaon nga mapadad-an ako ug kuwarta gikan sa Japan, nagsugod ako sa pagpamaligya sa akong mga kimono. Busa, nakagugol ako ug tulo ka bulan sa pagtuon sa mga dibuho nga gidispley diha sa mga galeriya sa arte. Kanunay nakong mahinumdoman ang mga pulong sa usa ka pintor kansang mga dibuho nagtapad sa akoa panahon sa pasundayag sa dibuho. Siya miingon: “Magdibuho ako sama ka sanag sa adlaw. Ang imong dibuho madulom ug itom tungod kay naimpluwensiyahan ka sa mga pilosopo sa Oriente.”

Giduaw ako sa usa ka magtiayon gikan sa sangang buhatan sa mga Saksi ni Jehova sa Paris sa akong apartment. Human sa daghang pagduaw, sa kataposan misugot ako sa pag-uban kanila sa Kristohanong tigom. Sa pag-abot nako, nakurat ako sa  akong nakita. Usa ka babaye nagsul-ob ug nindot kaayong pulang kalo nga lapad ug paldiyas. Laing babaye nagsul-ob ug sinina nga sanag nga berde. Ang mga sininang gisul-ob nagpabanaag sa maanindot nga estilo ug maligdong, busa bug-os nga nausab ang akong panglantaw sa mga Saksi.

Nakadayeg usab ako sa programa. Kay nakakita nga gisunod ang mao gihapong mga pamaagi diha sa tibuok kalibotan, uban sa mao gihapong mga pagtulon-an, nakapaamgo nako nga kining grupoha ug ang kalihokan niini dili gayod ordinaryo. Natandog pag-ayo ang akong kasingkasing, kay naamgohan ko nga nakig-uban ako sa mga tawo nga tinultolan sa Diyos.

Naghimog mga Desisyon

Sa dihang nakapauli na sa Japan, nagsugod ako sa pagtuon sa Bibliya nga mas seryoso. Akong nahibaloan nga ang mga giya sa atong Maglalalang nagtugot ug mas daghang kagawasan kay sa akong gihanduraw kaniadto. Sa pagkamahigugmaon, gihatagan kita niya ug iyaiyang mga personalidad maingon man iyaiyang mga abilidad ug kagawasan aron palamboon kini. Busa naamgohan ko nga ang pagkahimong usa sa mga Saksi ni Jehova wala magpasabot nga talikdan sa usa ang gugma alang sa mga arte.

Ako ug ang akong mga anak nga babaye miuswag sa among mga pagtuon sa Bibliya. Gipasimbolohan sa usa sa akong mga anak nga babaye ang iyang pagpahinungod kang Jehova pinaagi sa bawtismo sa tubig sa 1961, ang usa pa sa 1962. Hangtod karon, silang duha nagpabiling matinumanong mga alagad sa Diyos. Apan, nagpanuko gihapon ako. Sa 1965, si Lloyd Barry, nga niadtong panahona maoy nagdumala sa buluhatong pagsangyaw sa mga Saksi ni Jehova sa Japan, nagdasig nako sa pag-ingon: “Hunahunaa lang kon unsa unya ka nindot sa mga dibuho ang madibuho sa hingpit nga mga tawo diha sa Paraiso!” Sa pagkasunod tuig gibawtismohan ako.

Ang Epekto Niini sa Akong Dibuho

Sa maghunahuna sa nangagi, makita nako kon sa unsang paagi ang kausaban sa akong kinabuhi ug personalidad nakaapekto sa akong dibuho. Ang akong unang mga dibuho madulom, nga nagpabanaag sa kasakit, pag-antos, ug pagkawalay-paglaom nga akong gibati. Apan nakat-onan ko gikan sa Bibliya ang bahin sa atong Maglalalang, ang iyang katingalahang mga hiyas, ang kalipay nga moresulta tungod sa pagdayeg kaniya, ug ang hustong mga sukdanan nga pagakinabuhian. Kay nausab man ang akong mga pagbati, nausab pod ang akong mga dibuho.

Daghang panahon ang akong gigugol sa pagpakigbahin sa mensahe sa Bibliya ngadto sa uban, regular nga gihimo ko kini. Ang pagpakigsulti sa mga tawo bahin sa mga hiyas sa Diyos, maingon man sa iyang katingalahang katuyoan sa paghimo niining yutaa nga usa ka paraiso ilalom sa pagmando sa iyang Anak, si Jesu-Kristo, nakahatag kanako ug dakong kalipay ug katagbawan. Kining binase-sa-Bibliya nga kalihokan nagpadasig kanako, ug nag-aghat kanako sa pagdibuho aron mapadayag ko ang akong pagbati. Ug samtang ang akong kalipay nagpadayon sa pagdako latas sa katuigan, ang akong mga dibuho nahimong mas masanag.

Gipasiugda Niini ang Bibliya

Nakadawat ako ug mga hangyo aron mapasundayag ang akong mga dibuho sa tibuok kalibotan​—gikan sa Sydney, Vienna, London, New York. Apan mga taga-Uropa ang gusto kaayo sa akong mga dibuho. Ang mga eksperto sa Louvre Royal Academy of Arts sa Paris nakapangutana: “Sa unsang paagi ang usa ka Haponesa natandog pag-ayo sa Bibliya ug sa Kristiyanidad nga tungod niana napabanaag sa iyang mga dibuho ang kalipay nga wala pa sukad makita diha sa kasiglohan sa relihiyosong arte?”

 Ang salmista sa Bibliya nga si David nagpahayag sa iyang mga pagbati pinaagi sa musika, ug iyang gigamit ang iyang abilidad sa musika aron matudloan ang uban sa mga katingalahang butang sa Diyos. Mao usab kanay akong tumong. Buot kong dayegon si Jehova. Dako gayod ang akong tinguha nga makita sa mga tawo diha sa akong mga dibuho ang kalipay nga matagamtam gikan sa pagkahibalo kang Jehova ug sa iyang katingalahang mga hiyas. Usa ka kritiko sa mga arte miingon bahin sa akong mga ulohan: “Ang pintor naglikay sa paggamit sa iyang kaugalingong mga pulong sa maalamong paagi, ug ang ulohan sa iyang mga dibuho kinuha gikan sa mga teksto sa Bibliya.” Ako malipayon kaayo nga ang mga tawo nakamatikod sa gahom sa Bibliya diha sa akong mga dibuho.

Sa 1995 ang World Council of Arts, nga usa ka internasyonal nga organisasyon sa mga arte nga ang hedkuwarter anaa sa Tokyo, naghatag kanako sa unang dapit taliwala sa maayong laking mga pintor. Ang konseho nagtaho bahin sa akong mga dibuho: “Ang pintor mokutlo ug mga pulong nga gikan sa Bibliya alang sa mga ulohan . . . Ang tanan niyang mga dibuho dunay Bibliya nga gidibuho diha niana, apan ingon gayod niini ang kinabuhi alang sa usa ka pintor nga naglakaw uban sa Diyos.”

Ang ibabaw nga pulong maoy usa ka pamatuod sa kamatuoran nga kanunay nakong ilakip ang usa ka hulagway sa usa ka bukas nga Bibliya diha sa akong mga dibuho. Di pa dugay, gisal-ot nako ang pinatik nga mga panid sa Bibliya sa akong mga dibuho. Busa ang mata sa tumatan-aw mapunting diha sa akong piniling ulohan maingon man sa mga pulong diha sa Bibliya ug dayon sa paagi sa akong paglarawan niini diha sa akong mga dibuho.

Sa 1999 ang pipila sa akong mga dibuho gipasundayag sa Bangkok, Thailand. Ang usa may ulohang “Pagkakahibulongan ang Pagkagama ni Jehova nga Diyos sa Yuta, Naghatag Niini Ngadto sa Tawo Ingong Pinuy-anang Dapit,” ug ang lain, “Pag-ampo ni Haring David: ‘Jehova, Pasagdi nga ang Kasingkasing Niini nga Katawhan Mahiusa Uban Kanimo.’” Gidapit ako sa pag-adto sa palasyo sa hari sa Thailand uban sa pipila ka mga pintor. Ang hari gustong makigsulti bahin sa akong mga dibuho, ug daghan siya ug gipangutana kanako. Dugaydugay kaming nag-estoryahanay ug gilakip nako ang mga komento bahin sa akong binase-sa-Bibliya nga mga pagtuo. Human niadto, gihatagan ko siya ug usa ka dibuho.

Sulod sa nangaging 35 ka tuig, nakalingkod usab ako ingong usa ka hurado sa mga dibuho sa ubang mga pintor. Ang mga dibuho nga akong gusto nagpadayag ug emosyon. Alang kanako ang usa ka dibuho maayo kon makahatag kini kanako ug maayong impresyon, nga mopabati kanako ug kalinaw sa kinailadman. Nakadayeg kaayo ako sa mga larawan nga makita sa mga publikasyon sa mga Saksi ni Jehova, nga nakahimo sa katuyoan niini sa pagpadayag sa tinuod nga mensahe sa Bibliya.

Mga Panalangin Ingong Usa ka Alagad sa Diyos

Tungod sa akong dibuho, natagamtam ko ang talagsaong mga higayon sa paghatag ug pamatuod bahin kang Jehova nga Diyos ug sa iyang dagkong mga katuyoan alang sa yuta. Tinuod usab kini panahon sa mga interbiyo alang sa mga artikulo sa magasin ug sa mga programa sa telebisyon. Sa pagkatinuod, bisag asa ako moadto o bisan kinsa ang akong pakigsultihan, maningkamot gayod ako sa pagsulti sa mga tawo nga ang pagtuo, kangaya, ug kalipay nga matagamtam tungod sa pag-alagad kang Jehova nga Diyos ang nagpaarang kanako sa paghimo sa akong mga dibuho.

Nagtuo gayod ako nga kon mohunong ako sa akong pagtuo, dili na ako makahimog dibuho sama sa akong ginahimo. Apan tungod kay usa ako sa mga Saksi ni Jehova ug tungod kay ang kamatuoran sa Pulong sa Diyos nakahatag man kanakog dakong kangaya ug kalipay, kini ang hinungdan kon nganong ako makadibuho.

[Hulagway sa panid 21]

Sa dihang didto ako sa Paris

[Hulagway sa panid 22]

Uban sa akong duha ka anak karon