Gikan sa Among mga Magbabasa

Maayong Panglawas Dili masukod ang gidak-on sa paghupay ug pagdasig nga akong nadawat gikan sa seryeng “Maayong Panglawas Alang sa Tanan​—Posible ba Kini?” (Hunyo 8, 2001). Nag-antos ako sa psychiatric disorder, ug nakahunahuna ako niadto nga maghikog. Matag adlaw ako maghunahuna, ‘Sa unsang paagi ako makalahutay sa usa ka adlaw?’ Kining magasina nagpahinumdom kanako sa saad ni Jehova diha sa Pinadayag 21:4 nga ‘pagapahiran ang tanang luha gikan sa atong mga mata.’

C. T., Japan

Salamat sa inyong nindot kaayong mga artikulo. Isip usa ka doktor sa naturopathy, ako nagpaabot sa adlaw sa dihang wala nay balatian. Unya makapahulay na ko sa akong pagkadoktor ug magbaol na lang​—ang akong ikaduhang paborito nga trabaho!

B. C., Tinipong Bansa

Balak Ako makaingon nga nahimuot gayod akong nagbasa sa inyong artikulo nga “Pagdibuho Pinaagi sa mga Pulong.” (Hunyo 8, 2001) Sukad sa akong pagretiro, gideboto ko ang akong kaugalingon sa pagsulat ug balak, nga nakahatag kanakog dakong kalipay ug katagbawan.

J. B., Britanya

Sukad sa pagkabata mahiligon na ako sa sinulat nga mga pulong, ug nianang paagiha nga nadiskobrehan ko ang arte sa balak. Salamat sa inyong paghisgot nga ‘ang matahom nga balak dili gayod tinagik sa usa ka mabawg salabotan.’ Daghang tawo nagtuo nga ang pagsulat ug balak maoy usa ka ilhanan sa kahuyang. Kining matanga sa pagpahayag pinaagig pagsulat maoy usa sa kinanindotan, ug nalipay ako sa pagkasayod nga mao usab kanay hunahuna sa atong Maglalalang.

M. T., Chile

Mga Katedral Nalingaw ako sa artikulong “Mga Katedral​—Mga Monyumento Alang sa Diyos o sa Tawo?” (Hunyo 8, 2001) Apan dili ba tinuod nga nagtukod usab ug dagkong mga Kingdom Hall ug mga Assembly Hall ang mga Saksi ni Jehova?

R. B., Tinipong Bansa

Ang “Pagmata!” nagtubag: Gisaway namo ang pagtukod ug mga katedral dili lamang tungod kay dagko kini kondili tungod kay ang panukmod sa pagtukod niini sagad mao ang sama sa giingon sa usa ka historyano nga “mapagawalong garbo” sa relihiyosong mga pangulo. Dugang pa, ang galastohan niining dagkong mga tinukod sagad nakahatag ug tumang kalisod sa mga sakop sa parokya. Agig pagtandi, ang mga Kingdom Hall ug mga Assembly Hall maoy kasarangang mga tinukod nga wala tukora aron madayeg ang si bisan kinsang tawo. Hinunoa, nag-alagad kini ingong mga dapit sa pagsimba. Kini nga mga tigomanan gisuportahan pinaagig boluntaryong mga amot ug wala maghatag ug dili-makataronganong pinansiyal nga kabug-at diha kang bisan kinsa.

Mga Anunugba Ako 14 anyos, ug nahimuot ako sa dihang gibasa nako ang artikulong “Ang Matahom nga Anunugba.” (Hunyo 8, 2001) Nagtuo gayod ako nga ang mga anunugba ngil-ad ug dagway, apan sa nabasa nako kining artikuloha, hunahunaon ko unag maayo sa dili pa nako kini dagpion!

D. S., Tinipong Bansa

Samtang nagbasa ako sa artikulo, usa ka anunugba ang mitugpa duol sa akong tiil. Wala pa gayod ako makakitag anunugba nga ingon niadto katahom! Katingalahan gayod ang kinaiyahan, ug kon atong panid-an kinig maayo, mas molalom pa ang atong gugma sa Diyos.

G. P., Italya

Kay wala magtagad sa katahom ug kadaiyahan sa mga anunugba nga gihimo ni Jehova, gilantaw ko kini ingong dili-makaiikag nga mga insekto. Wala madugay human mabasa ang artikulo, usa ka matahom nga anunugba nagpaduol kanako samtang namisibis ako sa akong mga tanom. Nagpasalamat ako kang Jehova tungod sa iyang kalalangan ug tungod sa artikulo nga naghimo kanako nga mas mapaniiron.

C. S., Tinipong Bansa

Red Tide Ingong usa ka magtutudlo, ako nagtudlog usa ka subject maylabot sa hustong paggamit ug pagdumala sa atong mga kahinguhaan sa kadagatan. Hapit na gayod kong moundang sa pagpangitag artikulo nga klarong nagpatin-aw bahin sa red tide. Dayon ang artikulong “Sa Dihang ang Katubigan Mopula” (Hunyo 8, 2001) miabot sa pagtabang kanako sa pagsulbad sa problema. Daghan kaayong salamat sa pagpatik niana.

J.O.P., Pilipinas