Gikan sa Among mga Magbabasa

Pag-ampo Ang artikulong “Mga Batan-on Nangutana . . . Patalinghogan ba sa Diyos ang Akong mga Pag-ampo?” (Hunyo 22, 2001) nakapalig-on gayod kanako. Nadawat nako kining magasina samtang naghigda ako sa katre didto sa ospital. Wala na ako makaadto sa Kingdom Hall o sa among kombensiyon. Nasubo gayod ako ug morag dili nako makontrolar ang akong gibati. Ang pag-ampo kang Jehova nakapakalma kanako, ug sa katingalahang sukod, migaan ang akong gibati. Nahupayan ako sa pagkasayod nga dili gayod malimot si Jehova kanako.

A. O., Japan

Ako 18 anyos ug usa ka regular payunir, usa ka bug-os panahong tig-ebanghelyo. Sulod sa miaging pipila ka bulan, nagmagul-anon ako. Gibati kong sama kang Steve, ang batan-on nga gihisgotan sa artikulo nga miingon nga usahay gibati niyang dili angayng hasolon ang Diyos bahin sa iyang mga problema. Apan ugdang kong gihunahuna ang tambag diha sa Lucas 12:​6, 7. Misugod ako sa pagbating mas kalmado ug natukmod sa pagtug-an sa akong gibati ngadto kang Jehova.

M. D., Nicaragua

Gimatuto Diha sa Kombento Ang artikulo nga “Giabandonar sa mga Ginikanan​—Gihigugma sa Diyos” (Hunyo 22, 2001) nagpahinumdom kanakog daghang butang. Nahinumdom ako nga gisultihan mi sa among inahan bahin sa iyang kinabuhi sa kombento ug kon sa unsang paagi gitratar siya sa mga madre. Sa dihang mibiya siya sa kombento sa edad nga 16, wala siyay dapit nga kapuy-an. Daghang tawo ang nag-antos niining matanga sa pagdagmal apan mahadlok nga mohisgot mahitungod niini. Busa nalipay ako nga migula kining artikuloha.

G. E., Tinipong Bansa

Panglawas Sa inyong Hunyo 8, 2001, nga gula, nabasa ko ang artikulong “Modernong Medisina​—Unsa ka Taas ang Maabot Niini?” Isip usa ka ordinaryong tawo kon bahin sa medisina ug siyensiya, nakaplagan ko ang inyong mga pagpatin-aw ug mga reperensiya sa kasaysayan sa medisina nga labing makaiikag ug makahatag ug personal nga kaayohan. Tipigan ko gayod kining gulaa.

E. F., Alemanya

Pag-abuso sa Droga Kanunay kong makadawat sa inyong mga magasin gikan sa usa ka kauban sa trabaho, ug ginabasa ko kini. Apan nalisdan ko sa pagdawat sa kusganong komento diha sa seryeng “Pag-abuso sa Droga​—Adunay Solusyon!” nga ang tanang musikero sa rock maoy mga adik sa droga. (Hulyo 8, 2001) Dunay daghang musikero sa rock nga wala mogamit ug mga droga ug nga seryoso sa ilang trabaho.

M. M., Japan

Ang “Pagmata!” nagtubag: Wala mi magpasabot nga ang tanang musikero sa rock nag-abuso sa droga. Bisan pa niana, ang pagkailado sa paggamit ug droga taliwala sa mga musikero sa rock ug taliwala sa mga magdadayeg diha sa mga konsiyerto sa rock napamatud-an na pag-ayo.

Niagara Falls Mao pay pagkahuman nakog basa sa artikulong “Niagara Falls​—Nindot Kaayo nga Kasinatian.” (Hulyo 8, 2001) Nalingaw gayod ako sa pagbasa niini. Di pa dugay, gidala ko sa akong bana didto alang sa among anibersaryo sa kasal. Nagtuo ako nga makapuol kadto. Pagkadako nakong sayop! Ang pagkakita sa busay gitumbasan lamang sa pagkadungog sa hinaganas sa busay.

C. K., Tinipong Bansa

Nag-ingon mo nga ang pagkankan sa yuta sa busay nahitabo sulod sa miaging 12,000 ka tuig. Dili kini motakdo sa asoy sa Bibliya bahin sa tibuok-yutang lunop.

R. P., Britanya

Ang “Pagmata!” nagtubag: Gipresentar lamang namo ang bag-ong mga banabana nga gihatag sa mga geologo, nga wala magkomento bahin sa kon unsa gayod kaha sila katukma. Ang maong mga banabana dayag nga wala magtagad sa asoy sa Bibliya bahin sa Lunop sa panahon ni Noe, nga lagmit nahitabo wala pay 5,000 ka tuig kanhi.​—Mateo 24:37.