Kon Unsay Makapapeligroso sa mga Dapit-Trabahoan

“Ang dapit-trabahoan mopatayg mas daghang tawo kay sa mamatay sa mga aksidente sa karsada.” Kana ang tatawg-letra nga ulohan sa usa ka poster nga gipang-apod-apod sa WorkCover, usa ka organisasyon bahin sa kaluwasan diha sa dapit-trabahoan sa New South Wales, Australia.

ANG makapatayng mga aksidente, hinuon, maoy bahin lamang sa suliran. Ang milyonmilyon sa matag tuig makaagom ug seryoso, makapausob-sa-kinabuhi nga mga kadaot diha sa ilang mga dapit-trabahoan. Daghan pang uban mamatay ug sayo tungod sa pagkaladlad sa peligrosong mga substansiya diha sa trabahoan o ingong resulta sa kapit-osan diha sa trabahoan.

Sanglit mahitabo man ang nalangkit-sa-trabaho nga pagkamatay ug seryosong kadaot sa halos tanang bahin sa industriya ug komersiyo, angay ang pagsukna: Luwas ka ba sa imong dapit-trabahoan? Unsang mga kahimtang dinha ang tingali makadaot sa imong panglawas ug kinabuhi?

Punog Kapit-osan nga Kahimtang

Ang hilabihang mga pagpit-os kasagarang ipahamtang sa mga trabahante nga mahimong produktibo. Sa Hapon ang terminong karoshi​—“pagkamatay gumikan sa sobrang trabaho”​—unang gigamit diha sa gikleym nga bayad sa nagbangotan nga mga pamilya. Sumala sa usa ka surbi didto katuigan kanhi, 40 porsiyento sa Hapones nga mga trabahante sa opisina nahadlok sa posibleng pagkamatay gumikan sa sobrang trabaho. Usa ka abogado nga nag-espesyalista sa maong mga kleym nagbanabana nga may “labing menos 30,000 ka biktima sa karoshi sa Hapon kada tuig.”

Ang kapolisan sa Hapon misugyot nga ang nalangkit-sa-trabaho nga mga suliran maoy usa ka dakong hinungdan sa pagdaghan sa paghikog taliwala sa mga tawong 50- ngadto sa 59-anyos. Sumala sa librong The Violence-Prone Workplace, usa ka korte mihukom nga ang amo may tulubagon sa paghikog sa usa ka empleyado nga nahupngan ug nalangkit-sa-trabaho nga mga kabalaka.

Ang mantalaan sa Australia nga The Canberra Times miingon nga ‘sa tibuok kalibotan nalabwan sa mga Amerikano ang mga Hapones sa pagtrabaho ug mas daghang oras.’ Busa, ang mga balita nga may mga ulohang sama sa “Ang Daghang Oras sa Trabaho Makapahago Pag-ayo sa Katawhan nga Makapatay Kanila” nag-asoy bahin sa gikapoyng mga trabahante, sama sa mga drayber sa ambulansiya, mga piloto, mga obrero sa konstruksiyon ug tighatod ug kargamento, ug sa mga tigtrabaho sa magabii nga nangamatay samtang nagtrabaho.

Samtang ang mga kompaniya nagaorganisar pag-usab ug nagamenos sa mga trabahante aron magpadayon nga maayog kita, ang mas dakong pagpit-os nga mahimong produktibo gipahamtang diha sa mga empleyado. Ang British Medical Journal mitaho nga ang pagmenos sa mga trabahante may daotang epekto diha sa panglawas sa mga empleyado.

Kapintasan Diha sa mga Dapit-Trabahoan

Ang nahago ug napit-osang mga empleyado dili lamang peligroso sa ilang kaugalingon. Usa ka  Britanikong surbi nakadiskobre nga daghang trabahante sa opisina mogugol sa dakong bahin sa ilang adlaw sa trabaho nga napikal sa mga kauban ug ang maong panagbangi subsob makapabikil sa mapintasong mga reaksiyon.

“Mga 15 ka Amerikanong mga obrero ginapatay diha sa trabahoan kada semana,” nagpahayag ang magasing Business Week. Ang Harvard Business Review mikomento: “Walay manedyer ang gustong mohisgot sa kapintasan diha sa dapit-trabahoan. Apan ang kamatuoran nagpabilin nga kada tuig ginatos ka empleyado ang moatake o mopatay pa sa ilang mga kauban.”

Sa laing bahin, daghan ang makasinatig kapintasan diha sa dapit-trabahoan gikan sa ilang mga kliyente o ilang mga suki. Usa ka taho bahin sa kriminolohiya sa Australia nag-ingon nga ang pipila ka doktor mahadlok kaayo sa mapintasong mga pag-atake nga sila magdalag usa ka kauban sa mga pagpanambal diha sa kabalayan. Ang mga polis ug mga magtutudlo nalakip sa uban pa nga nameligro.

Ang laing matang sa kapintasan diha sa dapit-trabahoan mao ang emosyonal nga pag-abuso, nga giila sa Internasyonal nga Organisasyon Bahin sa Pamuo ingon nga pag-abuso sa pangisip. Usa ka dakong matang sa maong pag-abuso mao ang pagpanglupig sa mahuyang.

Si Propesor Robert L. Veninga sa University of Minnesota, T.B.A., nagtaho nga “ang kapit-osan ug ang moresultang mga sakit makaapektar sa mga trabahante sa halos tanang bahin sa kalibotan.” Siya miingon nga “ang pangunang suliran sumala sa 1993 Taho sa Pamuo sa Kalibotan gikan sa Internasyonal nga Organisasyon Bahin sa Pamuo sa Hiniusang Kanasoran, mao nga ang kapit-osan naggikan sa dili-personal, kanunayng-mausab, ug kasagarang dili-mahigalaon nga mga dapit-trabahoan.”

Busa ang pangutana mao, Unsay mahimo sa mga amo ug mga empleyado sa paghimong mas luwas sa ilang dapit-trabahoan? Kini pagahisgotan sa sunod artikulo.