Pagsaulog sa Vía Crucis sa Mexico

TINAMPO SA MAGSUSULAT SA PAGMATA! SA MEXICO

SA PAGHANDOM sa kamatayon ni Jesus, mga 300 ka relihiyosong mga pista ang ginahimo matag tuig sa Mexico. Ang usa sa kinadak-an mao ang Vía Crucis, nga may mga prosesyon ug mga pasundayag sa nahitabo sa kataposang mga adlaw sa kinabuhi ni Jesus. Ang Vía Crucis naggikan sa Latin ug nagkahulogang “Estasyon sa Krus.” Sa distrito sa Iztapalapa sa Mexico City, ang direktor sa lokal nga House of Culture nagpatin-aw sa sinugdan niini: ‘Sa 1833, ang Iztapalapa nakaagom ug epidemya sa kolera. Aron mamenosan ang kadaot, gisugdan sa mga molupyo sa komunidad ang buhing pasundayag sa Pasyon.’

Mao kiniy mahitabo sa naandang Vía Crucis: Dakong panon sa mga tawo ang magtigom aron sa pagtan-aw sa paghulagway sa Hudiyong mga pangulo, mga senturyon, mga apostoles ni Jesus, ug sa mga babaye nga nagsunod kaniya, nga naglakip kang Maria. Usa ka batan-ong lalaki ang modula sa papel ni Jesus. Nasag-ulo na niya ang mga teksto sa Bibliya nga iyang kutloon samtang magpadayon ang pasundayag. Ang mga entrante mogamit ug mga piluka, bungot, ug mga bigote ug magsul-ob ug baga nga mga sinina. Ang “mga Nasaretnon” magsunod usab kang “Jesus,” magtiniil o magsul-ob ug panit nga mga sandalyas, nga magsul-ob ug mga purongpurong nga mga tunok sa pagsundog sa naagoman nga pag-antos ni Jesus. Usahay, ang ilang gidaghanon moabot ug hangtod sa 2,500 ka tawo. Sa adlaw pa, ilang pas-anon ang mga krus hangtod sa Cerro de la Estrella (Bungtod sa Bituon), ang dapit nga gipili aron didto “ilansang” si Jesus.

Ang mga tigbaligya nagasinggit sa ilang baligya nga mga kalo, ilimnon, relihiyosong mga larawan nga ipatik sa mga aping o bukton, mga balon, kendi para sa mga bata, ug daghang uban pang mga butang. Nag-instalar pa gani ug mekanikal nga mga kahimanan nga kasakaysakayan diha sa mga parke sa kalingawan alang sa maong okasyon.

Sa siyudad sa Querétaro, ang mga nagpenitensiya mosulay sa paglakaw nga kinadenahan ang ilang mga tiil. Sa Taxco, ang mga lalaki magpas-an ug binangan nga mga tunok nga may gibug-atong 40 hangtod sa 50 kilos sulod sa mga lima ka oras. Ang uban magsunod sa prosesyon nga maglapdos sa kaugalingon nilang mga lawas. Kadaghanan niining maong mga sumasalmot maospital.

Kining matanga sa pagsimba magpahinumdom tingali kanato sa giingon ni apostol Pablo sa dihang nagsulti siya batok sa “gisangon-sa-kaugalingong dagway sa pagsimba ug pakaaron-ingnon nga pagpaubos, sa grabeng pagsakit sa lawas.” (Colosas 2:23) Tinuod nga ang matuod nga mga Kristohanon maghandom sa kamatayon ni Kristo, apan ilang likayan ang mga tradisyon nga gipasukad sa kabakakan ug sukwahi sa mga prinsipyo sa Bibliya.