Gikan sa Among mga Magbabasa

Kaisog Taliwala sa Katalagman Salamat sa panghapin nga seryeng “Kaisog Atubangan sa Katalagman​—Sa Adlaw nga Nahugno ang Twin Towers.” (Enero 8, 2002) Natandog gayod ako niining mga artikuloha, ug nakapaamgo kini kanako kon sa unsang paagi ang panahon ug wala damhang mga hitabo makaapekto kanatong tanan. Naguol ako sa paghunahuna nga daghang kinabuhi ang nakalas.

S.B.R., Denmark

Salamat sa pagpatik sa “Ang Pag-ampo ni Tatiana.” Naghilak na ako samtang nagbasa sa panghapin nga serye, apan sa dihang nabasa ko kining kahon, ako mihilak ug kusog. Buot kong moampo alang sa espirituwal nga pag-uswag sa mga bata nga nawad-ag ginikanan tungod sa mga pag-atake sa terorista aron makita nila pag-usab ang ilang ginikanan sa bag-ong kalibotan. Gawas pa, pinaagi niining artikuloha, mas milalom ang akong pagpabili nga ingong usa sa mga Saksi ni Jehova, ako adunay masanag nga paglaom sa umaabot.

T. A., Japan

Bisan tuod ania ako magpuyo sa Alemanya, ang mga hitabo niadtong Septiyembre 11 nakapakurat kanako ug sa akong pamilya. Tulo ka bulan sa ulahi, ang akong nuybe-anyos nga anak babaye nagsige gihapog drowing ug mga hulagway sa ayroplano nga naglupad paingon sa habog nga bilding. Kami nagpaabot sa panahon sa dihang ang maong mga trahedya dili na maglungtad.

E. G., Alemanya

Sa dihang nakita ko ang nahitabo sa New York, ako miampo kang Jehova ug mihangyo kaniya nga hatagan niyag kusog ang mga naluwas ug paglaom ang mga pamilya sa mga biktima. Sa pagkabasa niining mga artikuloha, akong nakita kon sa unsang paagi gidungog ang akong mga pag-ampo duyog sa mga pag-ampo sa daghan pang uban. Ang pagkasayod nga ang trahedya mahimong moabot sa bisan unsang panahon mitultol kanako sa pagsusi pag-usab sa akong kinabuhi.

M. V., Italya

Kami nalingaw sa pagbasa ilabina sa mga hunahuna sa mga tawo kinsa personal nga nakaeksperyensiya sa nahitabo. Nakahilak mi tungod sa gisulti sa mga naluwas. Kami naghangyo kang Jehova sa pagtabang sa tanang naapektohan ug nag-ampo nga pinaagi sa Pagmata! ila untang makaplagan ang kahupayan. Tungod kay batan-on pa, kami nadasig sa mga pangutana nga nakapahunahuna kanamo sa among dalan sa kinabuhi ug sa among mga prioridad. Among gipanghinaot nga padayon kamong magpatik niining magasina.

T. M. ug A. P., Slovenia

Ako 14-anyos nga estudyante sa akong ikatulong tuig sa hayskul. Sa dihang nabasa ko kining seryeha, akong nasabtan ang kahadlok nga nalangkit sa maong hitabo. Nakita ko kon sa unsang paagi ang mga tawo nagsakripisyo sa ilang mga kinabuhi sa pagluwas sa uban. Nahibaloan ko gikan sa pagpaminaw sa mga balita nga daghang bombero ang nangamatay, apan karon lang gayod ako matandog pag-ayo. Nakahilak ako sa dihang gibasa ko ang kahon nga “Ang Pag-ampo ni Tatiana.” Sulod sa akong unang tuig sa hayskul, namatyan usab akog amahan, tungod sa sakit. Ang kahon nakapahunahuna kanako, ‘Tinuod ba ang bag-ong kalibotan alang kanako sama sa pagtuo ni Tatiana?’ Gusto kong ihatag kining magasina ngadto sa akong mga magtutudlo sa eskuylahan ug sa daghan nakong mga higala. Palihog padayon sa pagpatik niining maanindot nga mga magasin!

H. T., Japan

Bag-ong Disenyo Makalingaw ang pagkakita nga nagkanindot ang dagway sa Pagmata! sukad sa una kong pagbasa niining magasina niadtong 1978. Sa dihang gisusi nako ang gula sa Enero 8, 2002, ang disenyo ug pagkahan-ay sa mga panid nakadani pag-ayo kanako. Ang mga ulohan sa mga artikulo daling mamatikdan, ug ang mga ilustrasyon makapahinam kaayo. Tungod sa maayong pagkahan-ay nahimo pa ganing mas makalingaw ang pagbasa. Segurado ako nga kining bag-ong dagway makadani ug daghan pang sinserong mga tawo ngadto kang Jehova.

V.P.L., Brazil