Ang Hunahuna sa Bibliya

Mga Pag-ampo nga Dunggon sa Diyos

“Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo. Kay ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan.”​—LUCAS 11:​9, 10.

NAGPAKITAG bug-os nga pagsalig sa mga pulong ni Jesu-Kristo nga gikutlo sa ibabaw, daghang Kristohanon modangop sa Diyos diha sa pag-ampo bahin sa ilang mga problema ug mga kabalaka, nga hugot nga nagtuo nga siya nahigugma ug nagtagad kanila. Apan, ang uban mobatig kahigawad samtang naghulat sila nga ang ilang pag-ampo dunggon. Mibati ka ba nga ang imong mga pag-ampo wala dungga? Mamati ba ang Diyos sa dihang mag-ampo ka?

Bisan pa kon ang atong mga pag-ampo morag wala dungga, kini wala magpasabot nga wala makadungog ang Diyos niini. Ang Bibliya nagpasalig kanato: “Ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo.” (1 Pedro 3:12) Busa si Jehova nga Diyos nagpatalinghog sa mga pag-ampo sa mga matarong, gibungat man kini nga madungog o gisulti sulod sa kasingkasing. (Jeremias 17:10) Si Jehova nagsusi usab sa mga hunahuna ug pagbati sa likod sa matag pag-ampo, nga bisan ang usa nga nag-ampo tingali wala gayod makasabot o makamatikod niana.​—Roma 8:​26, 27.

Apan, ang mga pag-ampo kinahanglang makaabot sa pipila ka kinahanglanon aron kini dalawaton sa Diyos. Una, kini kinahanglang itumong ra gayod ngadto sa Diyos​—dili ngadto kang Jesus, sa usa ka “santo,” o sa usa ka imahen. (Exodo 20:​4, 5) Ang mga pag-ampo kinahanglang itanyag sa ngalan sa Anak sa Diyos, si Jesu-Kristo. (Juan 14:6) Nagpasabot ba kini nga ang atong mga pag-ampo patalinghogan una ni Jesus ug dayon iyang ipasa ang mensahe ngadto sa Diyos? Dili. Hinunoa, pinaagi sa pag-ampo kang Jehova sa ngalan ni Jesus,  atong gipaila ang atong kaugalingon ingong mga tinun-an ni Kristo ug atong gidawat nga tungod lamang sa iyang lukat nga kita makaduol sa Diyos.​—Hebreohanon 4:​14-​16.

Ang mga pag-ampo kinahanglang itanyag nga may pagtuo. Si apostol Pablo nag-ingon: “Kon walay pagtuo imposible ang pagpahimuot [sa Diyos], kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Sa unsang paagi ang usa ka tawo mahibalo nga siya aduna nianang matanga sa pagtuo? Ang magsusulat sa Bibliya nga si Santiago nagtubag: “Akong ipakita kanimo ang akong pagtuo pinaagi sa akong binuhatan.” (Santiago 2:18) Oo, ang pagtuo mopatunghag mga buhat, ug kini, sa baylo, nagpakita nga atong gihigugma ang Diyos ug naningkamot sa pagpahimuot kaniya.

Ang mga magsisimba sa Diyos kinahanglan usab nga magmalahutayon kon mag-ampo. Si Jesus nagpatin-aw niini diha sa Lucas 11:​9, 10, nga gikutlo sa sinugdan. Gawas pa, kon ang tawo kas-a lamang mag-ampo bahin sa maong butang, dili ba nagpakita kini nga siya dili gayod tim-os sa iyang gihangyo?

Kon Unsay Gisaad sa Diyos

Bisan unsa pa ka subsob ug ka tim-os kita nga nag-ampo, kita nagkinabuhi gihapon sa “makuyaw nga mga panahon nga lisod sagubangon.” (2 Timoteo 3:1) Bisan tuod nag-ingon si Jesus nga ang iyang mga sumusunod magmalipayon, siya wala moingon nga ang ilang kinabuhi walay problema. (Mateo 5:​3-​11) Siya nag-ingon, hinunoa, nga ang iyang mga tinun-an magmalipayon bisag nagabalata, gigutom, giuhaw, o gilutos.

Ang kalipay nga gihisgotan ni Jesus wala mag-agad sa atong pagkabaton ug maayong mga kahimtang. Hinunoa, kini maoy usa ka katagbawan sa kinailadman tungod kay kita nag-alagad sa Diyos. Busa, kita makabaton ug igong kalipay bisan sa kagubot.​—2 Corinto 12:​7-​10.

Pag-atubang sa Personal nga mga Problema

Nan, wala bay kapuslanan ang pag-ampo sa Diyos mahitungod sa personal nga mga butang sama sa pagkakaplag ug maayong kapikas sa kaminyoon o pag-atubang sa mga problema sa pamilya, panglawas, o panarbaho? Dili, kay bisan tuod ang Diyos wala magsaad nga bag-ohon ang mga kahimtang sa atong kinabuhi sa milagrosong paagi, kita iyang hatagan ug kaalam sa pagsagubang niana. Si Santiago nagsulat bahin sa mga pagsulay: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Santiago 1:5) Busa pinaagi sa iyang balaang espiritu, si Jehova mogiya kanato. Kini motabang kanato sa pagsabot ug sa pagpadapat sa mga prinsipyo sa Bibliya sa dihang maghimog mga desisyon.

Siyempre, ang espiritu sa Diyos dili mohimo ug mga desisyon alang kanato. Sa kasukwahi, gikinahanglan ang personal nga paningkamot. Pananglitan, kon kita dunay problema, nakapanukiduki na ba kita bahin niana ug nakasusi sa nagkalainlaing mga bahin ug mga kinahanglanon sa maong kahimtang? Kini maoy usa ka lihok nga nagpakita sa Diyos nga kita dunay pagtuo. (Santiago 2:18) Kita ba malahutayon sa pagpaningkamot sa pagsulbad sa atong problema, nga padayong mangayo sa pagtultol sa Diyos? (Mateo 7:​7, 8) Nasusi na ba natog maayo ang mga prinsipyo sa Bibliya nga mahimong ipadapat sa kahimtang? Ang Pulong sa Diyos maghimo kanato nga “bug-os nga masinangkapan alang sa tanang maayong buhat.”​—2 Timoteo 3:​16, 17.

Bisan pag tinuod nga ang Diyos makasalga sa tawhanong mga kalihokan ug makawala sa tanan natong mga problema, iyang gitugotan kita nga makapasundayag sa atong kagawasan sa pagpili. Ikasubo, gigamit sa daghan ang ilang kagawasan sa pagpili sa ikadaot sa uban. Busa, ang ubang mga problema nga atong giampo tingali magpadayon hangtod moabot ang bag-ong kalibotan sa Diyos. (Buhat 17:​30, 31) Tingali may kalabotan kini sa usa ka situwasyon nga naglungtad diha sa atong gipuy-an, sama sa krimen o panaggubat; o basin naglangkit kini sa atong pag-antos ilalom sa kalisod nga gipahinabo sa mga magsusupak. (1 Pedro 4:4) Kinahanglang atong dawaton nga niining dili-diyosnong kalibotan, ang ubang mga situwasyon dili na moarang-arang.

Bisan pa niana, ang Diyos nahigugma sa iyang mga magsisimba ug buot nga motabang kanila. Sa dihang ipasundayag na sa iyang Gingharian ang dili-kaduhaduhaan nga pagmando sa tibuok yuta, iyang bug-os wagtangon ang makalilisang nga mga problema niining kalibotana. (Pinadayag 21:​3, 4) Hangtod nga moabot kanang panahona kita kinahanglang magpadayon sa pagpangayo sa iyang pagtultol sa pag-atubang sa mga problema sa kinabuhi. Kon atong himoon kini, kita makaseguro nga tumanon ni Jehova ang iyang saad nga narekord sa Bibliya sa Isaias 41:10: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.”