Gikan sa Among mga Magbabasa

Adlaw sa Kasal Nagustohan ko pag-ayo ang serye sa mga artikulo sa hapin nga “Ang Adlaw sa Kasal​—Paghimo Niini nga Malipayong Sinugdanan.” (Pebrero 8, 2002) Sanglit ako bata pa, giandam ko ang akong hunahuna alang sa mahinungdanong tikang sa pagminyo. Kining mga artikuloha nakatabang kanako nga masabtan kon unsaon pagpangandam nga walay kapit-os nga maoy kasagaran sa daghang batan-on nga parisan ug kon unsaon paghimo usab sa kaminyoon nga malipayon. Palihog ayaw ninyo ihunong ang pagtagad kanamo nga naningkamot sa pagpadapat kon unsay gikinahanglan ni Jehova gikan sa iyang mga alagad.

F. C., Italya

Sa kanunay mahingangha ako kon sa unsang paagi gitagana ni Jehova ang giya sa panahon mismong gikinahanglan ko gayod kini. Ang Pebrero 8, 2002 nga gula sa Pagmata! dili eksepsiyon. Ang akong pamanhonon ug ako nagplano sa among kasal sa miaging pipila ka bulan, ug nagsugod na kami sa pagbatig tensiyon. Gipahinumdoman kami sa unang mga artikulo nga ang mga bulan sa pagplano maoy talagsaon kaayo ug ang kabalaka makahatag lang ug kaguol sa kasingkasing.

H. M., Australia

Ang panid 10 sa serye sa mga artikulo sa inyong hapin nagpasabot nga makataronganon ra sa dihang ang bana mobiya sa panimalay kon siya nagtuo nga siya may mga katarongan sa pagbulag. Ako ug ang akong asawa wala makakitag teksto sa Bibliya nga nagsuportar niini. Sa pagkamatuod, ang kaatbang daw maoy gipaluyohan niini​—ang asawa makabiya, apan ang bana angayng dili mobiya. Ang Genesis 2:24 nag-ingon nga ang usa ka lalaki angayng “mounong sa iyang asawa.” Ug ang 1 Corinto 7:11 nag-ingon, “kon siya [asawa] mobiya man gayod,” apan unya ang bersikulo nagdugang, “ang bana dili gayod mobiya sa iyang asawa.”

K. L., Australia

Ang “Pagmata!” nagtubag: Ang Genesis 2:24 kinahanglang sabton sumala sa konteksto niini. Ang sugo sa Diyos nga natala dinha wala ihatag ingong instruksiyon bahin sa posibleng panagbulag. Ang sulat ni Pablo ngadto sa mga taga-Corinto tin-awng nagpakita nga gipabilhan pag-ayo ni Jehova ang kaminyoon, ug ang magtiayon angayng maningkamot kutob sa mahimo sa pagpreserbar sa ilang kaminyoon. Hinunoa, dayag nga dili katuyoan ni Pablo nga mugnaon ang duha ka sukdanan​—usa alang sa asawa ug laing sukdanan alang sa bana. Ang bersikulo 10 ug 11 nag-awhag sa bana ug asawa nga dili mobiya, kon posible gayod. Nan, makataronganon nga kon unsay mapadapat ngadto sa asawa mapadapat usab sa bana.

Kea “‘Kea’​—Ang Siaw sa Kabukiran” (Pebrero 8, 2002) maoy makalingaw kaayong artikulo nga basahon nga nakakatawa ako ug kusog kaayo. Si Jehova malipayon gayod nga Diyos! Ang usa lamang ka mahigugmaon gayod nga Maglalalang ang makalalang ug butang nga makapalipay pag-ayo sa tawo. Gipaabot ko ang adlaw nga mailhan ko sa personal kanang makalingawng langgam, ang kea. Salamat kaayo dili lamang tungod niining artikuloha kondili tungod usab sa daghang laing makaiikag ug makapalig-on-sa-pagtuo nga mga artikulo nga inyong gisulat.

R. R., Alemanya

Wala madugay human ako biyai sa akong bana, akong nadawat ang Pebrero 8, 2002, nga Pagmata! Nalisdan kaayo ako sa pagtuo sa hapin nga “Ang Adlaw sa Kasal.” Nakahunahuna ako, ‘Ngano bang ang akong bana ug ako wala man magmalipayon sama sa parisan diha sa hapin?’ Bisan pa niana, sa gibasa ko ang artikulo bahin sa kea diha sa mao rang magasin, ako mikatawag kusog. Wala ako mahibalo nga may ingon kanindot nga langgam! Miluag ang akong dughan. Nahisama kadto nga si Jehova nagdasig kanako, nga nag-ingon: “Magkalipay sa kinabuhi!” Salamat kaayo.

M. Y., Hapon