Gikan sa Among mga Magbabasa

Luwas nga Pagtrabaho Salamat sa inyong panghapin nga serye nga “Luwas Ka ba Diha sa Imong Trabahoan?” (Pebrero 22, 2002) Usa lang ka adlaw sa wala pa nako mabasa kining mga artikuloha, usa ka init kaayo nga situwasyon ang nahitabo sa akong gitrabahoan. Mouyon ako nga ang malumong tubag, ingon sa gisugyot sa inyong magasin, mao ang labing maayong tambag. Ang impormasyon maylabot sa pagtrabaho sayo sa buntag ug sa lawom nga gabii maoy haom usab. Sa miaging adlaw lang, gipit-os ako sa pagdawat sa maong matang sa trabaho, apan wala ko kadto dawata. Sa dihang nabasa ko ang magasin, nalipay kaayo ako nga mao kadtoy akong gihimo!

M. H., Japan

Mga Batan-on Nangutana Mao pay akong pagkahuman ug basa sa artikulong “Mga Batan-on Nangutana . . . Komosta Kon Duna Koy Ikahibalag nga Eskolmet Samtang Ako Nagsangyaw?” (Pebrero 22, 2002) Ingong usa ka estudyante sa hayskul ug bug-os-panahong ebanghelisador, gibati ko kanunay ang sama sa gibati ni Simon nga gikutlo diha sa artikulo. Ako usab nanghinaot nga dili makahibalag ug eskolmet diha sa ministeryo. Kining ekselenteng artikulo maoy usa ka pahinumdom gikan kang Jehova. Pasalamatan ko siya tungod niana.

S. S., Tinipong Bansa

Ako 14 anyos, ug nahadlok akong makahibalag ug mga eskolmet diha sa teritoryo nga akong sangyawan. Nahupayan ako sa pagkahibalo nga si Jehova nagtabang kanako samtang ako mamalaybalay. Ang artikulo nakapalig-on kanako.

M. L., Italya

“Chewing Gum” Salamat sa inyong artikulo nga “‘Chewing Gum’​—Moderno Apan Karaan Na.” (Pebrero 22, 2002) Gusto kog chewing gum, apan halos sa matag panahon nga mag-usap-usap ako niini, dili nako tuyoon nga ako kining matulon. Kining artikuloha nagpasidaan kanako sa dili pagtulon sa gum. Akong sundon ang inyong tambag!

K. B., Thailand

Mga Masai Daghang salamat sa artikulong “Mga Masai​—Talagsaon ug Mabulokong mga Tawo.” (Pebrero 22, 2002) Nangandoy akong makaadto sa Kenya sukad pa sa pagkabata, ug gipangandoy ko gihapon kana. Bisan tuod ug daghan na akog nadukiduki bahin sa mga kostumbre ug mga tradisyon sa mga Masai, wala ko magdahom nga duna diay mga Saksi ni Jehova taliwala kanila. Usa na ako karon ka bug-os-panahong ebanghelisador, ug nanghinaot ako nga makatambong ug usa ka kombensiyon sa Kenya sa umaabot. Palihog padayona ang pagpatik ug mga impormasyon bahin sa Aprika.

Y. H., Japan

Mga Lumod Ako 14 anyos, ug buot ko kamong pasalamatan pag-ayo tungod sa artikulong “Nangitag mga Lumod sa New Zealand.” (Enero 8, 2002) Natandog gayod ako niining artikuloha. Nindot kaayo ang impormasyon ug nagpakita kini kon unsa ka katingalahan sa gahom ni Jehova sa paglalang sa maong kahibulongan, intelihente nga mga linalang. Sanglit ang mga lumod mao ang akong paboritong mananap, ako nagpaabot sa panahon nga masinati ko sila pag-ayo sa bag-ong kalibotan sa Diyos.

A. C., Australia

Ako 15 anyos, ug gusto ko gayod ang mga mananap. Ako ilabinang nainteres sa mga lumod, nga nindot kaayong molangoy. Human mabasa kining artikuloha, mapasalamaton ako kang Jehova nga Diyos. Gusto kong atimanon ang kinaiyahan ug ang mga mananap nga iyang gilalang.

A. N., Japan

Mga Tubag sa mga Magsusulat Dayegon ko gayod kamo tungod sa inyong mga tubag sa mga sulat nga motungha matag karon ug unya diha sa “Gikan sa Among mga Magbabasa.” Ang magsusulat sa among lokal nga mantalaan ilado sa iyang pintok, bastos, ug makantalitahon nga mga tubag niadtong nagpadalag sulat, bisag sayop ang napatik sa mantalaan. Makalingaw ang pagbasa sa mga tubag sa mga magsusulat sa Pagmata! nga nagbanaag sa timbang nga dignidad sa magasin ug konsiderasyon alang sa magbabasa.

K. W., Tinipong Bansa