Pagpakitag Gugma Panahon sa Kalisdanan

TINAMPO SA MAGSUSULAT SA PAGMATA! SA NIGERIA

ANG Dominggo, Enero 27, 2002, gitawag nga Itom nga Dominggo sa Lagos, Nigeria. Ang pagbuto sa tipiganan sa hinagiban sa ilalom sa yuta nakapahinabog grabeng pagtay-og sa tibuok siyudad ug nakapahayag sa gabii. Sulod sa daghang oras, ang pagbuto nagpaulan ug mga basiyo sa bala ug mga tipaka hangtod sa gilay-ong tulo ka kilometro, nga nakapaguliyang sa siyudad.

Ang minaomao nga mga hulungihong nakapasamot sa kahadlok. Napuno ang kadalanan sa dakong panon sa katawhan nga nahupngan sa kalisang, nga wala mahibalo kon unsay ilang gikalagiwan o kon asa sila mopaingon. Tungod sa kangitngit sa kagabhion, gatosan ka tawo, lakip sa nangalisang nga mga bata, ang nanagan ngadto sa lubog nga tubig sa kanal ug nangalumos. Nangabungkag o nangaguba pag-ayo ang mga balay, eskuylahan, ug mga balay patigayon, nga tungod niana linibo ka tawo ang nawad-ag balay ug trabaho. Gibanabana nga 1,000 ka tawo ang nangamatay sa maong trahedya. Mas taas pa gani ang ulahing mga banabana.

Duolag 1,350 ka bomba, mga rocket, ug mga granada nga wala mobuto ang nakuha gikan sa mga kabalayan sa palibot sa kampo sa militar diin nahitabo ang pagbuto. Dihay tawo nga nakakitag metal nga butang sa sulod sa iyang sala. Tungod kay wala mahibalo nga bomba diay kadto, iya kining gipunit, gibutang sa luyo sa iyang awto, ug giuli kini ngadto sa mga awtoridad.

Sa pagkahibalo sa balita bahin sa mga pagbuto, ang sangang buhatan sa mga Saksi ni Jehova sa Nigeria mikontak dayon sa usa ka ansiyano sa Lagos ug gisugo ang 16 ka nagapanawng mga magtatan-aw diha sa maong dapit sa pagsusi sa kahimtang sa 36,000 ka Saksi sa Lagos. Ang sangang buhatan nagpadalag usa ka milyong naira (mga $10,000 T.B.), uban ang instruksiyon nga magpormag komite sa paghatag ug hinabang.

Taliwala sa mga Saksi, usa ka tawo ang grabeng nasamdan tungod sa  bomba; ikasubo, duha ka batan-ong mga babaye ang namatay; ug duha ka Kingdom Hall ug mga balay sa 45 ka pamilya ang grabeng nadaot.

Unom ka adlaw human sa maong mga pagbuto, sa Pebrero 2, 2002, dihay panag-away sa tribo nga nahitabo sa nagkalainlaing dapit sa siyudad. Sumala sa Red Cross, tungod sa maong panag-away 100 ka tawo ang nangamatay, 430 ang samaran, ug 3,000 ka tawo ang napugos sa pagbiya sa ilang pinuy-anan, maingon man 50 ka balay ang nasunog. Ang komite sa hinabang nga nagaatiman sa mga panginahanglan sa mga biktima sa “Itom nga Dominggo” nangita dayon sa ilang Kristohanong mga igsoon niining dapita.

Walay mga Saksi nga namatay sa panag-away niadtong higayona, tungod kay kadaghanan kanila nanambong sa sirkitong asembliya sa pagsugod sa panag-away. Apan, daghang membro sa lima ka kongregasyon sa maong dapit wala nay mga balay nga kaulian. Dihadiha, gitagan-an silag kapuy-an sa ilang Kristohanong mga igsoon. Usa ka Saksi nga doktor ug iyang asawa nagpaestar sa 27 ka tawo nga napugos sa pagbiya sa ilang pinuy-anan.

Ang mga Saksi sa Lagos nga wala maapektohi sa mga pagbuto ug sa etnikong panag-away madagayaong nanghatag ug pagkaon, besti, ug mga gamit sa panimalay. Ang magtatan-aw sa siyudad mitaho: “Ang giamot sa mga igsoon sa Lagos nanobra kay sa gikinahanglan niadtong mga naapektohan.” Kinahanglang sulatan sa sangang buhatan ang mga kongregasyon sa pagpahibalo kanila nga igo na ang ilang mga amot. Tulo ka trak dekarga nga sobrang mga hinabang ang gipadala ngadto sa sangang buhatan aron ipondo.

Ang mga ansiyano sa kongregasyon nagduaw sa daghang biktima ug sa mga membro sa pamilyang namatyan. Naningkamot sila sa paghatag ug makahupay nga mga mensahe sa Kasulatan. Ang komite sa hinabang nag-organisar sa pagpang-ayo sa mga balay nga nangadaot. Ang mga biktima sa duha ka katalagman ilang gihatagan ug mga gamit sa panimalay, besti, ug mga pagkaon ug gitabangan nga makakaplag ug kapuy-an ang mga tawong napugos sa pagbiya sa ilang pinuy-anan. Dunay total nga 90 ka pamilya ug mga indibiduwal ang natabangan sa maong komite.

Natandog pag-ayo ang daghang biktima tungod sa tabang nga ilang nadawat. Usa ka Saksi miingon ngadto sa komite sa hinabang: “Samtang ako buhi, himoon ko si Jehova nga akong ‘dalangpanan ug kusog’!”​—Salmo 46:​1, 2.

Namatikdan sa mga dili-Saksi kon giunsa pag-atiman sa mga Saksi ni Jehova ang usag usa panahon sa maong mga kalisdanan. Ang uyoan sa usa ka patay nang Saksi miingon sa mga ansiyano sa kongregasyon sa iyang pag-umangkon: “Mobalik ako aron pasalamatan gayod kamo ug mokat-on pag dugang.” Ngadto sa iyang pamilya siya miingon: “Kahibulongan ang akong nakita sa Lagos. Bisan ang mga paryente wala makahimo sa nahimo niining mga tawhana.”

[Hulagway sa panid 13]

Trak dekarga nga puno sa mga hinabang

[Hulagway sa panid 13]

Pipila sa mga tawo nga natabangan

[Hulagway sa panid 14]

Kining magtiayona nagpaestar sa 27 ka tawo nga napugos sa pagbiya sa ilang pinuy-anan

[Hulagway sa panid 14]

Mga Saksi nga nagtrabaho sa nadaot nga balay

[Picture Credit Line sa panid 13]

Top: Sam Olusegun - The Guardian