Kinamot nga Paagi sa Pagkaon

TINAMPO SA MAGSUSULAT SA PAGMATA! SA GHANA

DAGHANG tawo mogamit ug tinidor, kutsilyo, ug kutsara sa paghungit sa lamiang pagkaon ngadto sa baba. Ang uban, sama sa mga tawong nanagko sa Sidlakan, mogamit ug mga chopstick sa dihang mokaon. Apan, dunay mga pagkaon nga matod pa sa uban mas lami kon kaonon nga magkinamot. Hunahunaa ang barbekyu nga mga gusok sa baka, mga piraso sa hiniwang manok, sopas, lumpiya, ug mga taco.

Apan unsaon pagkaon sa sabaw? Makinamot ba nimo kana? ‘Imposible!’ tingali moingon ka. ‘Init kini ug pilitpilit, ug dili gayod nimo kini makaptan.’ Diha sa daghang nasod sa Aprika, ang mga tawo naanad sa pagkaon sa sabaw pinaagi sa ilang mga tudlo sama sa mga taga-Asia nga mokaon pinaagi sa paggamit ug mga chopstick. Among ipailaila kaninyo ang usa ka kalan-on sa Ghana ug ang makalingaw nga pagsinati sa kinamot nga paagi sa pagkaon niini.

Ang Fufu ug ang Sinabwang Mani

Ang fufu hinimo gikan sa linung-ag nga saging tindok, ug kamoteng-kahoy, nga usa ka tanom nga mangunod ilalom sa yuta, nga gipananom sa tibuok kalibotan sa tropiko. Ang saging tindok ug kamoteng-kahoy panitan, hugasan, ug lung-agon hangtod mohumok. Ang sabaw niini iyabo, dayon ang linung-ag nga saging ug kamoteng kahoy lusakon sa lusong ug alho aron mapino. Sa dihang pino ug humok na, kini linginlinginon.

Ang mga sagol sa sinabwang mani mao ang ginaling nga mani, karne o isda, tamates, mga sibuyas, sili, ug ubang mga lamas. Ang karne o isda lutoon pinaagig alisngaw ug lamasan, ug dayon butangag tubig ug ilunod ang ginaling nga mani. Ang mga utanon isagol ug idugang diha sa sabaw, ug ukayon ug lutoon ug maayo. Dayon ang bolabola nga fufu ibutang diha sa panaksan, uban sa nag-aso-aso nga sinabwang mani ibabaw niana.

 Ang Teknik

Karon nga kining lamiang pagkaon nahikay na alang kanimo, unsaon nimo kini paghungit nga kinamot? Buweno, hustong teknik lang ang gikinahanglan niini.

Siyempre, una sa tanan panghunaw ug maayo. Dayon ituslob ang mga tudlo sa imong tuong kamot diha sa sabaw. Apan pagbantay! Kon dili ka anad, ang kainit sa sabaw basig dili nimo maagwanta!

Karon pudyot ug fufu, gamita ang imong kumagko, igtutudlo, anlalabaw, ug aniningsing. Ibutang ang gamayng pudyot sa fufu diha sa sabaw, ug pislata kinig diyutay sa kumagko aron mohulpa, nga masudlan ug diyutayng sabaw.

Dayon iisa ang kamot nga may pudyot nga fufu. Inighungit niini itunong ang imong pulso ug mga tudlo paatubang sa imong baba ug paneguroa nga ang imong mga tudlo dili molabaw sa imong pulso. Kay kon imo kining himoon, ang sabaw dili motulo sa imong bukton paingon sa imong siko.

Iduko ug diyutay ang imong ulo, ug inig-abot sa imong kamot diha sa imong baba, gamita ang anlalabaw ug aniningsing sa pagduso sa fufu ug sabaw direkta sa imong baba. Dimdima ang kalami niini apan, pagbantay gayod. Karon ang halang nga sili na usab  ang imong agwantahon, kay ang mga pagkaon sa Ghana kasagarang halang kaayo!

Ingon niining paagiha nga magkaon ka hangtod mahurot ang fufu. Kan-a ang ubang mga sagol, sama sa mga pirasong karne, nga dili idungan sa fufu. Ug kon duna pay sabaw nga mabilin, makagamit ka sa imong kamot sa pagtiwas niini.

Ang Kasinatian sa Pagkinamot

Ang ubang mga taga-Ghana moingon nga gusto nilang gamiton ang lima ka pangunang mga igbalati sa dihang mokaon. Imong madunggan ug masimhotan ang pagkaon sa dihang kini lutoon. Imong makita ug madimdim kini samtang magkaon. Apan aron magamit ang imong ikalimang igbalati, kinahanglang imong hikapon ug bation kini.

Bisag unsa pay imong kagikan, ikaw makasalig nga ang atong Maglalalang, si Jehova nga Diyos, interesado sa “tanang matang sa mga tawo.” (1 Timoteo 2:4) Kini nakahatag sa katawhan ug kagawasan sa pagbaton ug makaiikag nga nagkalainlaing mga kostumbre. Ug bisag wala ka maanad sa pagkaon sa imong sabaw nga kinamot, imong makita nga kini mahimong usa ka lamian ug makalingaw nga kasinatian.