Bililhong Likido sa Kinabuhi—Tubig

SA USA ka babayeng Samarianhon nga nagkalos ug tubig gikan sa usa ka atabay, naghisgot si Jesus ug tuboran nga nagbugwak ug tubig nga mohatag ug kinabuhing walay kataposan. (Juan 4:14) Bisag simboliko ang tubig nga iyang gihisgotan, sa literal nga diwa ang tubig maoy kinahanglanon sa kinabuhi, nga ikaduha sa oksiheno sa pagkahinungdanon. Mahimong mabuhi ang tawo ug daghang semana nga walay pagkaon apan mahimong mabuhi lamang ug lima ka adlaw nga walay tubig!

Halos tres-kuwarto sa timbang sa atong lawas maoy tubig. Pananglitan, ang utok maoy 75 ngadto 85 porsiyento nga tubig, ug ang kaunoran maoy 70 porsiyento. Dugang pa sa ubang mga kapuslanan sa tubig, kini makatabang kanato sa paghilis ug pagsuhop sa pagkaon, pinaagi sa pagdalag mga sustansiya ngadto sa mga selula. Kini magpagawas sa mga hilo ug ubang biya, magpadanlog sa mga lutahan ug sa dakong tinai, ug magtimpla sa temperatura sa lawas. Apan nahibalo ka ba nga ang pag-inom ug igong tubig makapaniwang usab?

Inom ug Tubig Aron Maniwang

Una sa tanan, ang tubig walay mga kaloriya, walay tambok ug kolesterol, ug diyutay rag sodium. Ikaduha, kini makawalag gana sa pagkaon. Ikatulo, ang tubig magproseso sa gipondong tambok. Sa unsang paagi? Ania, sa dihang ang mga rinyon makulangan ug tubig, kana dili makaobra sa tukmang paagi. Ang atay maoy mopuli sa mga obra sa rinyon, apan sa paghimo niana, ang katakos sa pagproseso sa epektibong paagi sa tambok mohinay. Busa ang tambok magpabiling napondo sa lawas, ug ikaw manambok. Busa, sumala sa giingon ni Dr. Donald Robertson sa Southwest Bariatric Nutrition  Center sa Scottsdale, Arizona, T.B.A., “ang pag-inom ug igong tubig maoy usa ka hinungdanong paagi sa pagpaniwang. Kon dili moinom ug igong tubig ang mga tawong nagsulay sa pagpaniwang, ang lawas dili tukmang makaproseso sa tambok.”

Tinuod, ang dili-normal nga paghawid ug tubig sa lawas sagad maoy hinungdan sa pagpanambok. Busa, ang daghan nga lagmit maghawid ug tubig sa lawas naghunahuna nga ang kasulbaran mao nga menosan ang tubig nga ilang imnon. Ugaling lang, ang kaatbang maoy mahitabo. Sa dihang ang lawas makulangan ug tubig, tinguhaon niini ang pagtipig sa tanang tubig nga mainom pinaagi sa pagpondo niini diha sa mga tiil, mga kamot, ug mga bitiis. Busa ang mga nutrisyonista nagsugyot nga hatagan nato ang atong lawas kon unsay gikinahanglan niini​—igong tubig. Ug hinumdomi, kon ikaw mokaon ug mas daghang asin, mas daghang tubig ang imong hawiran aron sa pagpalasaw niana.

Hatagig Tubig ang Imong Lawas

Kada adlaw, sa aberids, mga duha ka litrong tubig ang ipagawas pinaagi sa panit, baga, tinai, ug rinyon. Mga tunga sa litrong tubig ang mawala nato kada adlaw pinaagi lamang sa gininhawa. Kon dili pulihan ang maong tubig, maughan ang atong lawas. Ang pipila ka ilhanan sa pagkanaughan sa lawas mao ang labad-sa-ulo, pangapoy, panakit sa kaunoran, dalag kaayong ihi, pagkagil-ason, ug ugang baba ug mga mata.

Busa unsa ka daghang tubig ang angay natong imnon? Si Dr. Howard Flaks, usa ka espesyalista sa pagkatambok, nag-ingon: “Alang sa himsog nga tawo ang labing diyutay maoy walo ngadto napulo ka kasagarang baso sa usa ka adlaw. Mas daghan ang imong gikinahanglan kon sige kag ehersisyo o nagpuyo sa init nga klima. Ug ang sobrag-timbang nga mga tawo angayng moinom ug usa ka ekstrang baso alang sa matag 10 kilos nga sobra sa ilang angayan nga timbang.” Hinuon, ang pipila karon moingon nga igo na ang pag-inom ug tubig sa panahong ikaw uhawon, apan kon giuhaw ka na pag-ayo, basin ug naughan ka nag diyutay.

Mahimo bang moinom ug mga ilimnon puli sa tubig? Bisan pag makaayo ang mga duga sa prutas ug utanon nga sinambogan ug tubig, kana may kaloriya. Gawas pa, ang mga likido nga daghag asukar ug gatas mopadako sa panginahanglan sa lawas sa tubig, kay ang tubig gikinahanglan sa paghilis niana. Ug ang mga ilimnong may alkohol ug caffeine sama sa kape ug tsa makapaihi, nga tungod niana kinahanglan ang pag-inom ug mas daghang tubig aron ipuli sa gipagawas. Wala gayoy makapuli nianang bililhong likido, ang tubig. Busa nganong dili moinom ug usa ka baso karon dayon?

[Kahon/Hulagway sa panid 12]

Mga Sugyot Aron Modaghan ang Mainom nga Tubig

● Pagdaladalag botelya sa tubig.

● Pag-inom ug usa ka baso kada kaon.

● Inom una pa, panahon sa, ug human sa pag-ehersisyo.

● Inom ug tubig inay kape sa pagpahulay sa trabaho.

● Aron molami ang tubig sa gripo, dugangig duga sa lemon o gamit ug salaan.

[Picture Credit Line sa panid 12]

Photo: www.comstock.com