Kon Nganong Nagakausab ang mga Prinsipyo

“Unsay labing hinungdanon sa kinabuhi?”

Kana gisukna sa 50,000 ka tawo sa 60 ka nasod. Ang mga tigsurbi sa Gallup nagtaho nga ang labing kasagarang tubag gikan sa halos tanang bahin sa kalibotan maoy “pagbaton ug malipayong pamilya” ug “maayong panglawas.”

SA PANGIBABAW, daw nabatonan sa mga tawo sa tibuok yuta ang samang hamiling mga prinsipyo. Apan ang kahimtang dili kaayo makapadasig. Sa nangaging kapanahonan, ang mga prinsipyo sa mga tawo gipasukad sa naandang relihiyoso ug moral nga mga prinsipyo. Ugaling, kusog nagakausab ang mga butang. Ang tigdukiduki nga si Marisa Ferrari Occhionero nag-ingon bahin sa Italya: “Ang mga batan-on nagpadayag ug mga prinsipyo nga may nagakamenos nga impluwensiya sa ginikanan, sa tradisyon ug sa relihiyon.” Ang samang butang ikasulti usab bahin sa mga tawo​—ang samang batag tigulang—​sa tibuok kalibotan.

Si Propesor Ronald Inglehart, nga maoy nagdumala sa usa ka proyekto sa panukiduki nga ginganlag World Values Survey, nag-ingon: “Ang nagkadaghan nga ebidensiya nagpaila nga ang may-pasikaranang mga kausaban sa mga panglantaw sa kalibotan nagakahitabo.” Unsay hinungdan sa maong mga kausaban? Si Inglehart miingon: “Ang maong mga kausaban nagpabanaag sa mga kausaban diha sa ekonomiya ug teknolohiya.”

Pananglitan, ang surbing Gallup nagpadayag nga sa datong kanasoran ang panarbaho “giisip nga iwit kaayo” taliwala sa labing hinungdanon nga mga butang sa kinabuhi. Apan diha sa kabos nga kanasoran, ang pagkadunay trabaho giisip nga labing hinungdanon! Oo, sa dihang kabos ang mga tawo, ang adlaw-adlaw nga pangabuhi mao ang panguna. Sa dihang mouswag ang ekonomiya sa mga nasod, unahon na sa mga tawo ang mga butang nga sama sa maayong panglawas, malipayong kinabuhi isip pamilya, ug pagpahayag sa kaugalingong panglantaw.

Tungod sa pag-uswag sa teknolohiya, kining nagagimaw nga mga prinsipyo segurado nga dakog epekto diha sa kabos nga kanasoran. Ang magasing The Futurist nag-ingon: “Ang atong mga tinuohan ug mga prinsipyo maimpluwensiyahan sa butang nga atong makita ug madungog.” Busa ang agianan sa balita sa masa dako kaayog epekto sa mga prinsipyo sa taga-Kasadpan. Matod sa The Futurist: “Ang maong agianan sa balita nag-impluwensiya sa tibuok yuta.”

Busa, unsay atong nakitang mga kausaban sa mga tinamdan ug panggawi? Sa unsang paagi kining nagakausab nga mga prinsipyo nagaapektar kanimo ug sa imong pamilya?