Usa ka Realistikong Solusyon—Posible Ba?

ANG krimen daw permanenteng bahin sa modernong katilingban. Bisan pa sa maayog-tuyo nga panlimbasog sa mga social worker, mga sulugoon sa balaod, ug mga propesyonal labot sa pagpabag-o sa kriminal, ang kalibotan nagakahimong mas makuyaw nga dapit. Aduna bay solusyon?

Gipadayag sa Bibliya nga ang dakong kausaban umaabot. Dili kini moabot pinaagi sa panlimbasog sa mga gobyerno sa tawo. Limitado ang tanang tawhanong magmamando, bisan pag unsa ka hamili ang ilang mga tumong. Sila yanong walay gahom ug kahinguhaan aron langkaton ang hinungdan sa krimen o tukoron ang permanente nga seguradong sistema.

Ang kausaban nga gihisgotan sa Bibliya ipatuman sa atong Maglalalang. Isip Magbubuhat sa uniberso, siya may gahom ug legal nga katungod sa pagbuhat sa butang nga dili mabuhat sa mga tawo. Ang Bibliya nagbatbat kaniya ingong “ang Usa nga naghimo sa hataas nga mga opisyal nga walay-bili, nga naghimo sa mismong mga maghuhukom  sa yuta ingong dili tinuod nga butang lamang . . . , siya usab mabaskog sa gahom.” (Isaias 40:23-26) Unsang mga kausaban ang gisaad sa Diyos, ug sa unsang paagi kini naghatag kanato ug tinuod nga paglaom alang sa mas maayong kalibotan?

Ang Salmo 37:10 nagpahibalo kanato sa saad sa Diyos: “Sa dili na madugay, ug ang daotan mawala na; ug pagasusihon mo gayod ang iyang dapit, ug [ang daotan] mawala diha.” Katuyoan sa Diyos nga hanawon kadtong mga daotan nga dili na matul-id ug walay tuyo nga magbag-o. Bisan pa niana, dili niya laglagon ang tanang tawo. Ngadto sa mga gustong mahimong maaghop, mapaubsanon, ug makigdaiton, ang salmista nagsaad: “Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.” Kay nahanaw na ang mga daotan, kadtong nahibilin magtagamtam ug “kadagaya sa pakigdait”​—usa ka kalibotan nga walay bisan unsang matang sa krimen.​—Salmo 37:​11, 34.

Kausaban sa Hunahuna ug Kasingkasing Gikinahanglan

Dili igo nga laglagon lang ang daotan ug luwason ang maayong mga tawo aron bug-os masulbad ang suliran sa krimen. Ang krimen kadaghanan mao ang resulta sa dili-hustong pagbansay sa mga kasingkasing ug mga hunahuna sa mga tawo. Bisan pa, diha niana molabaw ang gobyerno sa Diyos. Ang praktikal nga instruksiyon ug edukasyon itagana sa pagbansay sa mga tawo aron sila mahigugma sa pagkamatarong. Ang Isaias 54:13 nag-ingon: “Ang tanan nimong mga anak mahimong mga tinudloan ni Jehova, ug dagaya unya ang pakigdait sa imong mga anak.”

Ang mga resulta mahimong makapatagbaw gayod! Ang Bibliya mahulagwayong naghisgot sa kausaban diha sa mga tawo nga sa nangagi may mananapong mga kinaiya. Kini nag-ingon: “Ang lobo mopuyo gayod sa makadiyot uban sa laki nga nating karnero, ug ang leopardo mohigda uban sa nating kanding, ug ang nating baka ug ang may-lambungay nga nating leyon ug ang pinakaon-pag-ayo nga hayop magkauban ang tanan.” Ngano? “Tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:​6, 9) Bisan pa niana, ikaw ug ang imong pamilya dili kinahanglang maghulat sa umaabot alang sa maong mga kausaban. Sa unsang paagi mahitabo kana?

Ikaw Makabaton ug Kaayohan Karon

Adunay mga tawo nga karon naghimog mga kausaban nga gikinahanglan sa pagpangandam alang sa walay-krimen nga kalibotan. Sila nagsul-ob na ug bag-ong pagkatawo, ang matang sa pagkatawo nga gusto sa Diyos diha sa mga tawo nga mopuyo sa iyang bag-ong kalibotan. (2 Pedro 3:13) Gihimo nila kini pinaagi sa pagpadapat sa mga prinsipyo sa Bibliya diha sa ilang kinabuhi. Matikdi ang makaiikag nga kabatbatan nga gihatag sa Bibliya: “Magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.”​—Efeso 4:​23, 24.

Ang Colosas 3:12-14 dugang nagbatbat sa positibong mga hiyas nga ginaugmad karon sa daghang buotan-ug-kasingkasing nga mga indibiduwal. Kini nag-ingon: “Ingon nga mga pinili sa Diyos, balaan ug hinigugma, isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”

Buot ba nimong matabangan sa pagsul-ob ug bag-o nga Kristohanong pagkatawo? Ang milyonmilyong tawo sa tibuok kalibotan nagabuhat na niana sa tabang sa mga Saksi ni Jehova. Sa mga tigom nga gipahigayon nga regular diha sa mga Kingdom Hall, ug sa dagkong mga kombensiyon, bisan ang mga tawo nga kanhi mapintasong mga kriminal nakakat-on kon unsaon pagsul-ob ug malinawong pagkatawo. * Kon buot nimong makabaton ug kaayohan gikan nianang maayo kaayong programa sa pagtudlo bahin sa Bibliya, ayaw pagpanuko sa pagkontak sa mga magpapatik niining magasina. Malipay sila sa pagtabang kanimo nga mahiapil sa mga tawo nga nagaandam na karon sa pagkinabuhi sa bag-ong kalibotan sa Diyos nga walay krimen.

[Footnote]

[Mga hulagway sa panid 10]

Ang milyonmilyon ginatudloan na alang sa kinabuhi diha sa usa ka kalibotang walay krimen