Ang Makadaot nga mga Resulta sa Pornograpiya

ANG tanang matang sa impormasyon bahin sa sekso sayon rang mabatonan pinaagi sa telebisyon, pelikula, music video, ug sa Internet. Kini bang walay-puas nga pagdagsang sa pornograpiya nga makapukaw ug mga handurawan labot sa sekso dili makadaot, sama sa gipatuo kanato sa daghang tawo? *

Mga Epekto sa Pornograpiya Diha sa mga Hingkod

Bisan pag unsay isulti sa mga manlalaban niini, ang pornograpiya dunay daotan kaayong mga epekto diha sa panglantaw sa mga tawo bahin sa sekso ug sa seksuwal nga panggawi. Ang mga tigdukiduki sa National Foundation for Family Research and Education mihinapos nga “ang pagtan-awg pornograpiya makapadako sa kapeligrohan sa mga tigtan-aw nga makaugmad ug abnormal nga mga panggawi labot sa sekso.” Sumala sa taho, “ang walay pasikaranang pagtuo bahin sa pagpanglugos (nga kono ang mga babaye maoy hinungdan sa pagpanglugos ug nga sila giganahan niana, ug nga ang mga manglugos maoy normal nga mga tawo) komon kaayo sa mga lalaking tigtan-awg pornograpiya.”

Ang ubang mga tigdukiduki nag-ingon nga ang kanunayng pagtan-aw ug pornograpiya makadaot sa katakos sa pagbatig kalalim ug sa normal nga pagpakigsekso uban sa kapikas. Si Dr. Victor Cline, usa ka espesyalista nga tigtambal sa pagkagiyan sa sekso, nakamatikod nga ang gana sa pagtan-awg pornograpiya magkasamot. Kon dili masanta, ang nasulagmaan nga pagtan-awg pornograpiya sa sinugdanan sa ngadtongadto moresulta sa kanunayng pagtan-awg mas grabe ka hilas, dili-normal nga mga talan-awon. Siya nag-ingon nga kini moresulta sa abnormal nga mga buhat sa sekso. Ang mga siyentipiko nga nagtuon bahin sa panggawi sa tawo miuyon. Si Dr. Cline nagtaho nga “ang bisan unsang matang sa abnormal  nga mga panggawi sa sekso makat-onan niining paagiha . . . ug nga kini dili mawagtang bisan pa sa grabeng mga pagbati sa pagkasad-an.” Sa kadugayan, ang tigtan-aw tingali mosulay sa pagbuhat sa imoral nga mga handurawan nga mitungha tungod sa pagtan-awg pornograpiya, ug kini kasagaran nga dunay makadaot nga mga resulta.

Mahimong anam-anam ug dili mamatikdan ang kaugmaran niini nga suliran, mihinapos si Cline. Siya miingon: “Samag kanser, kini magkadako ug magkakaylap. Kini magkagrabe, ug kini usab lisod kaayong tambalan ug lisod kaayong alimon. Kasagaran ug madahom nga ang lalaking giyanon dili moangkon ug dili moatubang sa problema, ug kini halos kanunayng moresulta ug dili-pagsinabtanay, usahay diborsiyo, ug usahay pagkadaot sa uban pang personal nga mga relasyon sa magtiayon.”

Ang Kadaot nga Moresulta Diha sa mga Batan-on

Gipakita sa estadistika nga ang pangunang mga tigtan-awg pornograpiya maoy mga lalaki nga nag-edad ug 12 ngadto sa 17. Sa pagkatinuod, alang sa daghan, ang pornograpiya mao ang ilang pangunang tinubdan sa seksuwal nga edukasyon. Kini dunay makahahadlok kaayo nga mga resulta. “Ang pagmabdos sa mga tin-edyer ug mga sakit nga mapasa pinaagig pakigsekso sama sa AIDS,” nag-ingon ang usa ka taho, “dili gayod ipakita diha sa pornograpiya, nga naghatag ug sayop nga pagtuo nga walay daotang mga resulta ang mga panggawi nga gipakita diha sa pornograpiya.”

Ang ubang mga tigdukiduki nag-ingon nga ang pagtan-awg pornograpiya makaapektar usab sa kinaiyanhong kaugmaran sa utok sa bata. Si Dr. Judith Reisman, presidente sa Institute for Media Education, mihinapos: “Ang sistema sa nerbiyos maapektohan sa kinaiyanhong sanong sa utok sa pornograpikong mga talan-awon ug mga tingog. Kini nga obserbasyon nagpakita nga ang pagtan-awg pornograpiya magpatunghag reaksiyon nga makausab sa utok sa biolohikal nga paagi nga makabalda sa normal nga proseso nga mao ang pagdawat sa usa ka butang human nga masabtan kon unsa kini​—ug makadaot kini sa daling-maimpluwensiyahan nga utok sa mga bata kay gipameligro niini ang ilang pagsabot sa kon unsay tinuod ug sa ingon gipameligro ang ilang hunahuna ug lawas, ang ilang kaayohan ug ang ilang pagtinguhag kalipay.”

Ang mga Epekto Diha sa mga Relasyon

Ang pornograpiya makaumol sa mga tinamdan ug makaimpluwensiya sa panggawi. Ang mga  mensahe niini makapadani tungod kay una sa tanan kini maoy handurawan ug sa ingon gipresentar nga mas makapaukyab kay sa kon unsay tinuod. (Tan-awa ang kahong “Unsang Mensahe ang Imong Dawaton?”) “Ang mga tawong tigtan-awg pornograpiya dili realistikanhon ug mga pagdahom ug tungod niini nadaot ang ilang mga relasyon,” nag-ingon ang usa ka taho.

Ang pornograpiya makadaot sa pagsalig ug pagkamatinud-anon, nga hinungdanong mga hiyas diha sa kaminyoon. Tungod kay kasagarang tan-awon nga tinagotago, ang pagtan-awg pornograpiya sagad nga moresulta sa pagpanglimbong ug pagpamakak. Ang mga kapikas mobati nga gibudhian. Dili sila makasabot kon nganong wala nay gana kanila ang ilang mga kapikas.

Espirituwal nga Kadaot

Ang pagtan-awg pornograpiya moresulta ug grabeng espirituwal nga kadaot. Kini mahimong dakong babag alang sa usa ka tawo nga naningkamot nga masuod sa Diyos. * Ang Bibliya naglangkit sa seksuwal nga gana ngadto sa hakog nga pangibog ug idolatriya. (Colosas 3:5) Ang tawong dunay hakog nga pangibog alang sa usa ka butang mangandoy pag-ayo niini nga mahimo na kining pangunang butang sa iyang kinabuhi, nga maawngan na niini ang ubang mga butang. Sa pagkatinuod, kadtong nagiyan sa pornograpiya naghimo sa ilang seksuwal nga tinguha nga mas labaw kay sa Diyos. Sa ingon kini ilang gihimong idolo. Ang sugo ni Jehova nga Diyos nag-ingon: “Dili ka magbaton ug laing mga diyos batok sa akong nawong.”​—Exodo 20:3.

Ang pornograpiya makaguba sa mahigugmaong mga relasyon. Si apostol Pedro, kinsa minyo usab, nag-awhag sa Kristohanong mga bana sa pagpasidungog sa ilang mga asawa. Kon ang bana dili magpasidungog sa iyang asawa, ang iyang mga pag-ampo ngadto sa Diyos mababagan. (1 Pedro 3:7) Kon ang usa ka bana tinagotago nga magtan-awg malaw-ay nga mga larawan sa mga babaye, siya ba nagpasidungog sa iyang asawa? Unsay bation sa asawa kon masayran niya kini? Ug unsay bation sa Diyos nga maoy ‘maghukom sa tanang matang sa buhat’ ug “nagatimbang sa mga espiritu”? (Ecclesiastes 12:14; Proverbio 16:2) Makadahom kaha ang tigtan-awg pornograpiya nga pamatian sa Diyos ang iyang mga pag-ampo?

Kinaiya sa tigtan-awg pornograpiya ang pag-insistir sa pagtagbaw sa iyang mahakogong mga tinguha bisag unsa pay mahitabo. Busa, dili pagpasundayag  ug gugma ang pagtan-awg pornograpiya. Makapahuyang kini sa pagpakigbugno sa usa ka Kristohanon sa pagpabiling putli ug paghupot ug hinlong moral nga baroganan atubangan sa Diyos. “Kini mao ang pagbuot sa Diyos,” nagsulat si apostol Pablo, “nga ayran ninyo ang pakighilawas; nga ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan, dili sa mahakogong kaibog sa seksuwal nga gana . . . , aron walay usa nga moabot sa punto nga magdaot ug maglapas sa mga katungod sa iyang igsoon.”​—1 Tesalonica 4:3-7.

Ang pornograpiya nagpahimulos ilabina sa mga babaye ug mga bata. Kini makadaot sa ilang dungog ug makawala sa ilang dignidad ug mga katungod. Ang usa nga tigtan-awg pornograpiya nakig-ambit ug nagpaluyo sa maong pagpahimulos. “Bisan pag ang usa ka tawo nagtuo . . . nga maayo siya,” nag-ingon ang mga tigdukiduki nga si Steven Hill ug Nina Silver, “ang iyang hilom nga pag-uyon sa pornograpiya naghimo kaniya nga dili-mabination, ug siya nagdumot sa mismong babaye nga iyang giangkong iyang gimahal.”

Paglingkawas Gikan sa Bisyo sa Pagtan-awg Pornograpiya

Komosta kon sa pagkakaron ikaw nakigbisog batok sa pagkagiyan sa pornograpiya? Duna ka bay mahimo aron makalingkawas gikan niini? Ang Bibliya naghatag ug paglaom! Sa wala pa makaila kang Kristo, ang pipila sa unang mga Kristohanon maoy mga tawong makihilawason, mananapaw, ug dalo. “Apan kamo nahugasan na,” nag-ingon si Pablo. Sa unsang paagi nahitabo kana? Siya mitubag: “Kamo nabalaan na . . . sa espiritu sa atong Diyos.”​—1 Corinto 6:9-11.

 Ayaw gayod pakamenosa ang gahom sa balaang espiritu sa Diyos. “Ang Diyos kasaligan,” ang Bibliya nag-ingon, “ug dili niya itugot nga tentalon kamo nga labaw sa inyong maantos.” Sa pagkatinuod, siya motaganag paagi aron makalingkawas. (1 Corinto 10:13) Ang kinasingkasing nga pag-ampo​—padayong pagpadayag sa imong problema ngadto sa Diyos​—magpatunghag mga resulta. Ang iyang Pulong nagdasig: “Itugyan ang imong palas-anon kang Jehova, ug siya magasapnay kanimo.”​—Salmo 55:22.

Siyempre, kinahanglang molihok ka uyon sa imong mga pag-ampo. Ikaw kinahanglang maghimog determinado ug kinasingkasing nga desisyon sa pagsalikway sa pornograpiya. Ang usa ka kasaligang higala o membro sa pamilya dako kaayog ikatabang, nga makahatag sa gikinahanglang pagpaluyo ug pagdasig aron imong mabarogan ang imong desisyon. (Tan-awa ang kahong “Pagpangayog Tabang.”) Ang paghinumdom nga ang maong buhat makapalipay gayod sa Diyos makatabang kanimo sa pagpadayon sa imong paningkamot. (Proverbio 27:11) Dugang pa, ang pagkahibalo nga ang imong pagtan-awg pornograpiya makapasuko sa Diyos magsilbi usab nga dugang panukmod sa pag-undang niini. (Genesis 6:​5, 6) Kini dili sayon nga pagpakigbugno, apan madaog kini. Posibleng mabuntog ang bisyo sa pagtan-awg pornograpiya!

Tinuod gayod ang mga kapeligrohan sa pagtan-awg pornograpiya. Kini makadaot. Makadaot kini sa mogama ug motan-aw niini. Usa kini ka insulto sa mga lalaki ug babaye, makapameligro sa mga bata, ug usa ka buhat nga kinahanglang isalikway.

[Mga footnote]

[Kahon/Hulagway sa panid 10]

Pagpangayog Tabang

Dili angayng isipon nga sayon ang pagpakigbisog nga makalingkawas sa pornograpiya; kini mahimong usa ka malisod nga pagpakigbugno. Si Dr. Victor Cline, kinsa nakatambal ug daghang mga giyanon sa sekso, nag-ingon: “Ang mga saad dili epektibo. Ang maayong mga intensiyon dili mosaler. [Ang usa ka tawong nagiyan sa sekso] dili gayod makatambal sa iyang kaugalingon nga siyasiya ra.” Ang usa ka kinahanglanon aron epektibo ang pagtambal, sumala pa kang Cline, mao ang pagpalangkit sa kapikas, kon minyo ang maong tawo. “Mas dali ang pagkaayo kon malangkit silang duha sa pagpatambal,” matod pa niya. “Silang duha ang nasamdan. Silang duha ang nagkinahanglan ug tabang.”

Kon ang maong tawo tagsaanon, dakog ikatabang ang usa ka kasaligang higala o membro sa pamilya. Bisag kinsa pay nalangkit sa pagpatambal, dunay usa ka estriktong lagda si Cline: Prangkang hisgotan ang problema ug ang bisan unsang pagbalik sa bisyo. “Ang mga sekreto ‘mopatay kanimo’,” matod pa niya. “Magpabati kinig kaulaw ug pagkasad-an.”

[Chart sa panid 9]

Unsang Mensahe ang Imong Dawaton?

Ang Mensahe sa Pornograpiya Ang Hunahuna sa Bibliya

◼ Dili sayop ang ◼ “Himoa nga dungganon ang

pagpakigsekso kang kaminyoon taliwala sa tanan,

bisan kinsa, sa bisan ug ang higdaanan sa

unsang panahon, sa kaminyoon nga dili mahugawan,

bisan unsang mga kay hukman sa Diyos ang mga

kahimtang, ug sa makihilawason ug ang mga

bisan unsang paagi mananapaw.”​—Hebreohanon 13:4.

ug kini walay

daotang mga resulta. “Siya nga nagapakighilawas

nagapakasala batok sa iyang

kaugalingong lawas.”​—1 Corinto

6:18; tan-awa usab ang Roma 1:​

26, 27.

◼ Ang kaminyoon ◼ “Pagmaya uban sa asawa

makababag sa seksuwal sa imong pagkabatan-on . . .

nga katagbawan. Sa iyang gugma maanaa ka

unta kanunay sa hilabihang

kalipay.”​—Proverbio 5:​18, 19;

Genesis 1:28; 2:24; 1 Corinto 7:3.

◼ Ang mga babaye ◼ “Buhatan ko [Jehova

nagsilbi alang sa usa lamang nga Diyos] siyag katabang,

ka katuyoan​—ang pagtagbaw ingon nga iyang katimbang.”​

sa seksuwal nga mga —Genesis 2:18; tan-awa

panginahanglan sa mga lalaki. usab ang Efeso 5:28.

◼ Ang mga lalaki ug mga ◼ “Busa, patya ang inyong

babaye maoy mga ulipon mga sangkap sa lawas nga

sa ilang seksuwal nga mga gana. anaa sa yuta maylabot sa

pakighilawas, kahugawan, seksuwal

nga gana, makadaot nga tinguha, ug

hakog nga pangibog, nga maoy

idolatriya.”​—Colosas 3:5.

 

“Ang matag usa kaninyo

kinahanglang mahibalo kon

unsaon paghupot sa iyang

kaugalingong sudlanan diha sa

kabalaan ug kadungganan.”

 

​—1 Tesalonica 4:4.

Isipa ang“tigulang nga mga

babaye ingong mga inahan,

ang batan-ong mga babaye

ingong igsoong mga babaye

uban sa bug-os nga kaputli.”

​—1 Timoteo 5:​1, 2; tan-awa

usab ang 1 Corinto 9:27.

[Hulagway sa panid 7]

Ang ubang mga tigdukiduki nag-ingon nga ang pagtan-awg pornograpiya makaapektar sa kinaiyanhong kaugmaran sa utok sa bata

[Hulagway sa panid 8]

Ang pornograpiya makadaot sa pagsalig ug pagkamatinud-anon diha sa kaminyoon

[Hulagway sa panid 10]

Adunay mga resulta ang kinasingkasing nga pag-ampo