Ang Dili-Maayong Bahin sa Pisikal nga Kaanyag

WALAY duhaduha nga ang pagsunod sa uso makatabang kanimo sa pagpaarang-arang sa imong panagway ug sa pagpauswag sa imong pagsalig sa kaugalingon. Kon angayan ka sa imong gisul-ob, dili kaayo mamatikdan ang pipila nimo ka apan sa lawas ug mosamot ka nindot ang imong madanihon kaayong mga parte sa lawas. Makaapektar usab kini sa panglantaw sa uban kanimo.

Apan dunay dili-maayong bahin sa kalibotan sa mga uso, usa nga dili ikasalikway. Ang mga pumapalit mahimong malit-agan sa walay kataposang siklo sa pagpamalit ug bag-ong mga sinina. Kon buot hunahunaon, ang industriya sa uso nagsigeg gama ug bag-ong mga estilo. Gituyo kini, tungod kay ang mga negosyo sa uso dagkog kita kon ang mga sinina dali rang mawala sa uso. Sumala sa pagkapahayag niana sa tigdisenyo nga si Gabrielle Chanel, “ang uso gihimo aron mawala sa uso.” Busa, ang dili-mabinantayong pumapalit maobligar tingali sa pagpalit ug bag-ong mga sinina aron lamang makanunot sa uso.

May kapeligrohan usab sa pagpadala sa malimbongong pagpit-os sa panganunsiyo. Ang mga kompaniya sa uso mogasto ug milyonmilyong dolyar sa pagpasiugda sa ilang mga produkto, nga kasagaran nagpasundayag ug usa ka walay-kabalaka nga estilo sa kinabuhi nga gitagamtam kono niadtong nagsul-ob sa ilang marka. Kining maong mga mensahe mahimong dunay dakong epekto. “Maguol kaayo ang mga tin-edyer kon dili mahalon ang ilang sapatos,” matod sa usa ka maestro sa Espanya.

Ang Pagkamakapadani sa mga Urog

Ang ubang mga grupo mogamit ug usa ka estilo sa sinina aron sa pagpaila sa ilang kaugalingon. Ang ilang isul-ob mahimong magpaila ug pagsalikway sa katilingban, usa ka matugoton nga estilo sa kinabuhi, o bisan mapintas o rasistang mga mithi. Bisan tuod ang pipila niining maong mga estilo naghinobra o ngil-ad, kasagaran ang kadaghanan diha sa grupo mosul-ob sa susamang matang sa mga sinina. Bisan ang pipila nga wala magduso sa mga mithi sa grupo madani usab sa maong estilo. Kadtong nagsunod niining maong mga moda sa sinina makapahunahuna sa uban nga sila susama ug nagpasiugda sa sukaranang mga pagtulon-an sa grupo.

Ang mga urog kasagarang nag-usab-usab, ang uban sulod sa pipila ka bulan. Tingali gipauso kini sa usa ka popular nga musikero o sa uban pang tigpauso. Apan, ang pipila ka uso mahimong dumalayong mga estilo. Pananglitan, ang maong nga karsones napopular taliwala sa batan-ong mga tigprotesta sa katuigan sa 1950 ug 1960. Apan, karon gisul-ob kini sa lainlaing mga okasyon sa mga tawo sa lainlaing pangedaron.

Ang Pagpangita sa Hingpit nga Pigura

Kadtong seryosong nagsunod sa uso mahimong sobra ka mahunahunaon sa ilang panagway. Ang mga modelo sa uso kasagarang tag-as ug yagpis, ug kanunay natong makita ang ilang mga hulagway. * Ang “hustong” pamarog gigamit sa pagbaligya sa tanan gikan sa mga awto ngadto sa mga kendi. Ang Social Issues Research Centre sa Britanya nagbanabana nga ang “batan-ong mga babaye karon mas daghag nakita nga mga hulagway sa maanyag kaayong mga babaye sa usa ka adlaw kay sa nakita sa atong mga inahan sa tibuok yugto sa ilang pagkabatan-on.”

Kining daghan kaayong hulagway mahimong makadaot. Sa Tinipong Bansa, pananglitan, ang usa ka surbi nga gikutlo sa Newsweek nakakaplag nga 90 porsiyento sa puti nga mga tin-edyer ang dili-tagbaw sa ilang mga lawas. Ang uban kanila mohimo halos sa bisan unsa aron makab-ot ang ‘hingpit nga pigura.’  Bisan pa niana, ang Social Issues Research Centre nag-angkon nga wala makaabot ug 5 porsiyento sa mga babaye ang makakab-ot sa hingpit nga timbang ug gidak-on segun sa gipresentar sa media. Bisan pa niana, tungod sa pag-idolo sa yagpis kaayong pigura, milyonmilyon nga batan-ong mga babaye ang naulipon niana. Kini maoy hinungdan nga ang uban nakaugmad ug abnormalidad sa pagkaon nga lisod nang maayo, ang anorexia nervosa. * Ang Katsilang modelo nga si Nieves Álvarez, kinsa nag-antos kanhi sa anorexia, miangkon: “Mas mahadlok ko nga madugangan ang akong timbang kay sa mamatay.”

Tinuod, ang mga abnormalidad sa pagkaon sama sa anorexia ug bulimia mahimong gipahinabo sa ubang mga hinungdan. Apan, sila si Dra. Anne Guillemot ug Michel Laxenaire nag-ingon: “Peligroso ang pag-idolo sa yagpis nga lawas.”

Klaro nga ang uso dunay maayong bahin ug  dili-maayong bahin. Kini nagtagbaw sa usa ka sukaranang tinguha sa tawo nga presentableng tan-awon ug dunay gisul-ob nga bag-o. Apan ang mga paghingapin sa uso mahimong motultol kanato sa pagsul-ob ug mga sinina nga naghatag sa uban ug sayop nga hunahuna. Ug kon atong hatagan ug hilabihang importansiya ang atong panagway, kita mahimong sayop nga magtuo nga ang atong bili nagdepende sa atong panggawas nga panagway imbes sa atong pangsulod nga bili. “Kinahanglang magsugod kita sa pagpabili ug labaw pa sa katakos ug pangsulod nga pagkatawo, imbes sa panggawas nga panagway lamang,” matod ni Álvarez, nga gikutlo ganina. Apan ang maong kausaban sa mga sukdanan lagmit nga dili dayon mahitabo. Nan, sa unsang paagi mahimo kitang timbang maylabot sa uso?

[Mga footnote]

 [Kahon/Mga hulagway sa panid 8, 9]

Duna ba Gayoy Mosul-ob Niana?

Ang mga negosyo sa uso sa New York, Paris, ug Milan nagpasundayag sa eksklusibong mga sinina sa nag-unang mga tigdisenyo matag tingpamulak ug tinghunlak. Gawas pa nga mahal kaayo kini, daghan niining mga sininaa ang dili gayod praktikal, dili pa gani masul-ob. “Ang naghingapin, law-ay nga mga disenyo nga imong makita wala gayod mugnaa aron isul-ob sa kadaghanan,” matod sa Katsila nga tigdisenyo nga si Juan Duyos. “Ang naglabi nga tuyo sa pasundayag sa uso mahimong mao ang pagdani sa pagtagad nganha sa tigdisenyo o sa marka inay kay sa pagbaligya sa mga sinina nga gidispley. Pananglitan, ang usa ka makapahingangha nga bag-ong gidisenyo nga mga sinina nga gikomentohan pag-ayo sa mga tigbalita mahimong makapausbaw sa halin sa usa ka mahalong pahumot.”

[Hulagway sa panid 7]

Makagasto ka ug dako sa pagsunod sa uso

[Hulagway sa panid 7]

Ang uban nakaugmad ug abnormalidad sa pagkaon nga lisod nang maayo, ang anorexia

[Hulagway sa panid 7]

Ang pagsunod sa pipila ka moda sa sinina mahimong magpaila kanimo nga kauban sa usa ka grupo