Usa ka Modernong-adlaw nga Maayong Samarianhon

TINAMPO SA MAGSUSULAT SA PAGMATA! SA MEXICO

Daghan kanato ang nakadungog sa estorya sa Bibliya bahin sa usa ka buotan nga tawo nga sagad gitawag ug Maayong Samarianhon. (Lucas 10:29-37) Niining maong sambingay, gipakita ni Jesu-Kristo ang talagsaong gihimo sa tawong Samarianhon sa pagpasundayag ug gugma alang sa iyang isigkatawo nga nanginahanglan. Duna bay maayong mga Samarianhon nga naglungtad karon? Tagda ang mosunod nga asoy gikan sa Mexico.

Sa pagpauli gikan sa biyahe, si Betuel ug ang iyang pamilya maoy pipila na lang ka kilometro gikan sa ilang balay sa dihang ilang nakita ang usa ka grabeng aksidente sa sakyanan diha sa haywey. Mihunong sila aron motabang. Ang usa sa mga drayber nga naaksidente, usa ka doktor, mihangyo kanila sa pagdala sa iyang mabdos nga asawa ug duha ka gagmayng mga anak babaye ngadto sa kinadul-ang ospital aron matambalan. Gihimo nila kana, ug dayon mibalik si Betuel ngadto sa dapit nga nahitaboan sa aksidente aron sa pagsusi kon unsa pay iyang ikatabang.

Si Betuel miasoy: “Miabot ang haywey patrol sa gobyerno, ug ang doktor imbestigahon tungod kay dunay nakalas nga kinabuhi. Sa dihang nangutana ang doktor kon nganong mitabang ko niya, akong gipatin-aw nga kami maoy mga Saksi ni Jehova ug among nakat-onan gikan sa Bibliya nga kinahanglan namong higugmaon ang among mga isigkatawo. Giingnan nako siya nga dili siya angayng mabalaka sa iyang asawa ug mga anak, tungod kay atimanon namo sila. Uban sa mapasalamatong mga luha sa iyang mga mata, iyang gitugyan kanako ang bililhon niyang mga kabtangan aron hiposan.”

Gidala ni Betuel ug sa iyang pamilya ang pamilya sa doktor ngadto sa ilang balay ug giatiman sila sulod sa pipila ka adlaw. Gipahimuslan ni Betuel ang kahigayonan sa pagsugod ug pagtuon sa Bibliya uban kanila. Sa dihang gibuhian na ang doktor, siya nagpahayag sa iyang pagpasalamat ug sa iyang pagdayeg sa mga Saksi ni Jehova. Siya misaad sa pagpadayon sa pagtuon sa Bibliya didto sa iyang lugar, ug siya miingon nga kon ang iyang asawa manganak ug lalaki, iyang nganlan siya ug Betuel. Si Betuel mipadayon: “Karon, duha ka tuig sa ulahi, nakahigayon mi sa pagduaw kanila. Sa akong katingala, sila nagpadayon sa pagtuon sa Bibliya, ug ang ngalan sa ilang batang lalaki maoy Betuel!”

[Hulagway sa panid 13]

Si Betuel