Ang Pagpakaon ug Pagbansay sa mga Hayop sa Ilang mga Anak

Tinampo sa magsusulat sa Pagmata! sa Espanya

ANG tawhanong mga ginikanan sagad mogastog mga 20 anyos sa pagmatuto sa ilang mga anak. Sa laing bahin, ang daghang hayop kinahanglang magtapos sa usa ka programa sa pagpakaon ug pagbansay sa ilang mga anak sa pipila lang ka bulan panahon sa ting-init. Ihulagway sa pipila ka pananglitan ang lisod nga buluhaton nga atubangon kada tuig sa pipila ka ginikanang mga hayop.

1. White Stork Ang stork (kabanay sa madremadre nga langgam) sa nag-ubang hulagway walay panahon aron makarelaks sa ting-init. Tungod kay pakan-on man ang gigutom nga mga kuyabog, kini kanunayng moadto sa duol nga lanaw aron mangita ug mga baki, gagmayng isda, mga tabili, o mga alisiwsiw, gawas pa sa pag-ayo sa salag matag karon ug unya. Moabot ug molakaw kanunay ang duha ka ginikanan sa tibuok adlaw. Dagkog kaon ang mga kuyabog. Aw, sa unang pipila ka semana, sila makahurot ug katunga sa timbang sa ilang lawas kada adlaw! Bisan pag makakat-on na sila sa paglupad, ang bata pang mga stork padayong magsalig sa ilang mga ginikanan sa ubay-ubay pang mga semana.

2. Cheetah Ang mga pamilya sa mga cheetah (matang sa dagkong iring) halos kanunay nga usa rag ginikanan, ug ang inahan maoy mag-atiman sa mga anak. Siya kinahanglang mangitag tukbonon halos kada adlaw aron siya adunay igong makaon samtang nagpasuso sa iyang mga anak​—kasagarang tulo ngadto lima ka anak. Kini lisod nga trabaho, sanglit dili malamposon ang kadaghanang paningkamot niini sa pagpangayam. Dugang pa, kada pipila ka adlaw kinahanglan niyang balhinon ang iyang pamilya sa laing tagoanan kay ang mga leyon kanunayng manuop aron makatukob sa iyang mga anak samtang wala siya diha. Sa dihang ang iyang mga anak modangat sa edad nga pito ka bulan, sugdan niya ang pagbansay kanila sa pagpangayam sa ilang kaugalingon, nga usa ka gastoso-sa-panahon nga proseso nga dangtag usa pa ka tuig o sobra pa. Kasagarang mag-uban-uban pa ang mga anak sa ilang inahan sulod sa usa ngadto usag tunga ka tuig.

3. Little Grebe Halos dili magbulag ang mga grebe (pamilya sa gimao nga langgam) ug ang ilang mga anak. Pagkapusa sa mga kuyabog, ilang biyaan ang naglutaw nilang salag ug mosaka sa kaharuhay sa bukobuko sa ilang mga ginikanan tali sa pako ug balhibo sa dughan. Ang mga kuyabog dili tugnawon ug may panalipod sulod niana samtang ang inahan o amahan maglangoylangoy. Magturnohay pagsalom ang mga ginikanan aron sa pagpangitag pagkaon ug sa pagkarga sa mga kuyabog. Bisan pag ang mga kuyabog sa dili madugay makakat-on sa pagsalom ug pagpangitag pagkaon sa ilang kaugalingon, sila mopadayon sa pag-kuyog sa ilang mga ginikanan sa taastaas nga panahon.

4. Giraffe Ang mga giraffe talagsa rang manganak ug duha sa usa ka pagpanganak, ug masabtan ang hinungdan. Ang bag-ong gipanganak nga giraffe, sama sa usa nga makita sa nag-ubang letrato, tingali may timbang nga 60 kilos ug may tindog nga duha ka metro! Usa ka oras human ipanganak, ang nating giraffe makatindog na ug pagkataudtaod mosuso sa gatas sa inahan niini. Magsuso kini sulod sa siyam ka bulan, bisan pag kini manibsib dayon tapos ipanganak. Sa dihang mameligro ang nating giraffe, kini magpatunga sa mga bitiis sa iyang inahan, sanglit ang iyang kusgang mga patid maoy labing maayong panalipod batok sa kadaghanang mga manunukob.

5. Kasagarang Tikarol Ang mga tikarol kinahanglang batid ug magmapilion sa dihang manikop ug isda alang sa ilang mga kuyabog. Nadiskobrehan sa mga ornitologo nga ang duha ka ginikanan magpakaon ug gagmayng isda nga wala pay usa ka pulgada ang gitas-on sa bag-ong napusa nga kuyabog. Ang ginikanan magtangag sa isda nga nagawas  ang ulo niini. Mas sayon kini alang sa gigutom nga mga kuyabog, kay mas dali nilang matulon ang isda nga nag-una ang ulo. Inigkadagko sa mga kuyabog, ang mga ginikanan magdalag mas dagkong mga isda. Magkasubsob usab ang mga higayon sa pagpakaon kanila sa ilang mga ginikanan. Sa sinugdan, ang matag kuyabog pakan-on kada 45 minutos. Apan sa dihang mga 18 ka adlaw na ang edad sa mga kuyabog, sila ganado kaayong mokaon, nga mokaon ug isda kada 15 minutos! Sa dili madugay ang kuyabog mobiya na sa salag ug mangitag isda sa iyang kaugalingon. Niining tungora ikaw basin magtuo nga gusto sa mga ginikanan nga makapahulay gikan sa pag-atiman ug anak. Apan dili kana tinuod sa mga tikarol! Kasagarang sugdan na usab nila ang tibuok nga proseso sa ikaduhang grupo sa mga kuyabog sa maong ting-init mismo.

Hinuon, wala pa hisayri ang daghang detalye bahin sa paagi sa pag-atiman sa nagkalainlaing hayop sa ilang mga anak. Apan, kon mas daghan ang madiskobrehan sa mga biologo, mas matin-aw nga ang kinaiyanhong katakos sa ginikanan maoy kusog nga puwersa taliwala sa mga hayop. Kon ang Diyos naghatag sa maong kinaiyanhong katakos sa pag-amoma ug anak sa mga hayop nga iyang gilalang, seguradong gusto usab niyang ang tawhanong mga ginikanan magtagana sa ilang mga anak sa pagkaon ug pag-amoma nga angay kanila.