Angay ba Natong Gamiton ang Ngalan sa Diyos?

NIADTONG 1902, ang The Presbyterian and Reformed Review nagtaho mahitungod sa pagluwat sa 1901 American Standard nga bersiyon sa Bibliya, usa ka rebisadong edisyon sa ika-17ng siglo nga King James Version. Diha sa artikulo niini, ang magasin nag-ingon bahin sa pagkahusto sa makanunayong paggamit sa ngalan sa Diyos, nga Jehova, diha sa Iningles nga Bibliya:

“Wala kami makasabot kon nganong adunay panagsumpaki mahitungod sa pagkahusto niini nga lakang. Kini ang personal nga ngalan sa Ginoo, nga Iyang gipili nga mailhan sa Iyang katawhan: morag dako gayod ang mawala kanato kon ang iyang personal nga ngalan atong ilisan sa Iyang mahubitong mga titulo. Tinuod nga gilantugian gayod kon unsay tinuod nga porma sa maong ngalan, ug walay nagtuo nga ‘Jehova’ ang tinuod nga porma. Apan kini adunay tinuod nga kahulogan alang sa magbabasa ug Iningles; ug pagkamakutihon lamang sa dili-hinungdanong mga detalye kon ilisan kana ug Yahwé o uban pang porma nga gigamit karon sa mga magsusulat nga adunay nagkalainlaing sukod sa pagkadili-tukma. Nagtuo kami nga dakong bentaha para sa magbabasa ug Iningles sa Daang Testamento nga sa unang higayon diha sa usa ka popular nga bersiyon nga klarong naggamit ug ‘Jehova,’ iyang makat-onan ang tanan nga gipasabot ug gihimo ni ‘Jehova’ para sa Iyang katawhan.”

Daghan pang Iningles nga mga hubad sa Bibliya ang naggamit ug “Jehova” o sa usa ka porma sa ngalan sa Diyos. Sa susama, ang personal nga ngalan sa Diyos makita diha sa daghang dili-Iningles nga mga hubad sa Bibliya, nga ang mga pananglitan niana makita niining panira. Ang Diyos miingon kang Moises mahitungod sa iyang ngalan nga Jehova: “Kini ang akong ngalan hangtod sa panahong walay tino, ug kini ang handomanan kanako hangtod sa sunodsunod nga mga kaliwatan.” Busa, dayag nga dili kaduhaduhaan nga angay gayong gamiton ang ngalan sa Diyos karon!​—Exodo 3:​13-​15.

[Mga hulagway sa panid 31]

Ang Salmo 83:18 nga makita diha sa nagkalainlaing mga pinulongan

Tsonga

Shona

Vietnamese

Kinatsila

Hindi

Tagalog

Iningles