Pagsagubang sa Kanser sa Panit

ANG singkuwentay-uno-anyos nga si Jeremiah maoy Australiano nga Irlandes ug kagikan, nga adunay sanag-pula nga buhok ug gatason-ang-kaputi nga panit, nga gitumong sa pipila ingong “tunglo sa mga Celt.” Siya nag-asoy: “Sama sa kadaghanang Australiano, ang among pamilya kanunayng atua sa gawas, ilabina sa mga hinapos sa semana ug mga bakasyon sa ting-init. Sa pagkabata pa, ako molangoylangoy ug daghang oras sa swimming pool sa tugkaran sa balay o mosakay sa mga balod ug magdulag cricket sa kabaybayonan sa Gold Coast, habagatan sa Brisbane. Kasagaran, ako magsul-ob lang ug shorts pangkaligo.”

Si Jeremiah nagpadayon: “Hangtod sa akong pagkatin-edyer, walay mapalit nga epektibong mga krema nga panalipod batok sa adlaw. Niadtong mga adlawa, ang komersiyal nga mga pahibalo nagdasig kanunay sa mga tawo nga mogamit ug lana sa lubi nga makapatabonon sa panit aron maangkon ang Australianong dagway sa bronsehon-ug-panit nga tigluwas sa malumos. Wala kamiy nahibaloan niadtong panahona bahin sa kadaot nga ipahinabo sa adlaw nganha sa panit. Human lang ako makasinatig balikbalik nga kahapdos sa grabeng pagkapagba sa adlaw nga misugod ako paglikay nga mabulad sa naglagiting nga kainit aron dili ako madaot.” Apan ang kadaot nahitabo na. “Kadtong tanang katuigan miresulta sa daghang alom diha sa akong bukobuko ug dughan nga nabulad sa adlaw, nga nagsugod sa pagpangitom ug pagbaga, ilabina ang mga alom sa akong dughan.”

Naoperahan na si Jeremiah ug tulo ka melanoma nga kanser ug daghang basal cell carcinoma. Tungod niana iyang giusab ang iyang mga batasan sa pagkinabuhi. Matod niya: “Kada adlaw, sa dili pa ako mogawas sa balay, mamahid na akog moisturizer sa panit. Ibabaw niana, ako mamahid ug krema nga panalipod batok sa adlaw. Ako karon magsul-ob nag kalo o gora sa kadaghanang adlaw sa ting-init gikan sa mga alas 9:00 s.b. hangtod sa alas 4:00 s.h.” Siya magpatsek-ap usab sa dermatologist o doktor sa panit kada tulo ka bulan.

 Si Jeremiah nagpatin-aw kon unsay nakatabang kaniya sa pagsagubang sa iyang pait nga kahimtang: “Gihatagan ako ni Jehova nga Diyos ug sinserong pagtuo sa pagdahom nga mamaayo ra ako sa dihang ang uban naghunahuna nga ako mahimong mamatay sa bisan unsang tuig. Gipasukad sa gidugayon sa kinabuhi nga madahom niadtong mga nasakit ug melanoma nga kanser 20 ka tuig kanhi, ako giisip sa uban ingong tawo nga hapit nang mamatay. Akong nasinati sa personal ang kahulogan sa mga pulong ni Haring David: ‘Si Jehova magpalig-on [kanako] sa ibabaw sa higdaanan sa balatian; ang tibuok [nakong] higdaanan imong bag-ohon gayod sa panahon sa [akong] pagkasakit.’”​—Salmo 41:3.

Ang lain pa nga nakigbisog sa kanser sa panit mao si Maxine. Sa iyang pagkabatan-on pa, ang pution-ug-panit nga si Maxine gipadala ngadto sa Tropiko ingong misyonarya, sa sinugdan ngadto sa Dominican Republic ug sa ulahi ngadto sa Puerto Rico. Sulod sa 20 ka tuig, ingong misyonarya, siya namalaybalay sa pagsangyaw nga nabulad sa adlaw sa kinadak-ang bahin sa adlaw. Dugang pa, siya gustong magbulad sa adlaw sa panahon nga siya dili magsangyaw. Unya, niadtong 1971 nadiskobrehan ang basal cell carcinoma sa iyang nawong. Siya nagparadyum ug unya nagpaopera, nga gisundan ug mga pagpuli sa panit aron maayom-ayom ang kadaot. Bisan pa niana, ang kanserong mga selula nagpadayon sa pagtungha.

Misaysay si Maxine: “Ang suliran mao nga ang kanserong mga selula kasagarang dilimatiktikan, mao nga kana mopadayon sa pagtubo. Kini maoy dugay ug lisod nga panahon​—mga 30 ka tuig nga pag-adto sa mga doktor, mga klinika, ug mga ospital. Naoperahan akog labing menos napulo ka beses diha sa akong nawong, gawas pa sa daghang pag-adto sa klinika aron tambalan ang kanser sa laing paagi.” Karon, ang labing bag-ong tambal sa 80-anyos nga si Maxine maoy Mohs surgery, nga mas malamposon sa pagwagtang sa kanserong mga selula.

Ingong resulta sa iyang nagbalikbalik nga kanser sa panit, si Maxine kinahanglang mag-usab sa iyang paagi sa pag-alagad ingong misyonarya, nga magsangyaw siya sa gabii aron malikayan ang adlaw. Unsay nakatabang kang Maxine sa pagsagubang sa sakit? “Ang usa mao ang pagbaton ug malaomong tinamdan. Nahibalo ako nga ang kanserong mga selula mopadayon sa pagtungha ug kinahanglang moadto na usab ako sa doktor. Ako na kining gidawat. Naningkamot ako nga dili maluoy sa akong kaugalingon o moreklamo bahin sa akong mga kalisdanan. Kini dili makahanaw sa akong kalipay sa akong ministeryo. Ako makahimo gihapon sa pagpakigsulti sa uban bahin sa Gingharian ni Jehova. Ug ako naghambin sa paglaom nga permanenteng maayo sa duol nang bag-ong kalibotan. Mabatonan ko na unya ang batan-on ug walay-daot nga nawong.”

Oo, ang mga nasakit sa kanser sa panit ug mga biktima sa ubang mga sakit makapaabot sa adlaw sa dihang ang mga pulong nga nahitala sa basahon sa Job matuman na: “Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.” (Job 33:25) Hangtod sa pag-abot nianang panahona, hinaot kitang tanan magbantay sa kapeligrohan sa sobrang pagbulad sa adlaw ug maningkamot pag-ayo sa pagpanalipod sa atong panit.

[Mga hulagway sa panid 9]

Gikuhaan nag daghang kanser sa panit si Jeremiah, lakip ang tulo ka melanoma nga kanser. Bisan pa niana, siya malaomon gihapon

[Mga hulagway sa panid 10]

‘Sa bag-ong kalibotan mabatonan ko na unya ang batan-on ug walay-daot nga nawong.’​—Maxine