Gikan sa Among mga Magbabasa

Pagkamapihigon Salamat sa seryeng “Matapos pa ba Kaha ang Pagkamapihigon?” (Septiyembre 8, 2004) Samtang gibasa nako kini, akong naamgohan nga may pagkamapihigon usab diay ako. Katingad-an kini kay kasagaran masuko ko sa mga tawong mapihigon. Nasayod ko nga kining magasina makatabang kanako.

M. U., Tinipong Bansa

Bisan tuod nagpuyo ako nga layo sa akong yutang natawhan, wala nako batia nga biktima ako sa pagpihig. Apan kini nga serye nakatabang kanako sa pagpakitag empatiya sa mga biktima niini. Mapasalamaton kita nga sa dili madugay taposon na ni Jehova kining problemaha!

T. G., Norway

Gidayeg ko kamo tungod sa inyong tinguha sa pagpaalinggat sa mga tawo bahin sa problema sa pagpihig. Apan, sa akong hunahuna kamo mismo nagpakitag pagpihig diha sa mga panid 8 ug 9. Gisaysay ninyo didto ang bahin sa duha ka Hudiyong lumalabay nga dili gustong motabang sa usa ka tawong nasamdan. Nganong mga Hudiyo man gyod ang gipili ninyo?

H. H., Tinipong Bansa

Ang Pagmata! nagtubag: Ang Hudiyong si Jesus mao ang nag-asoy sa sugilanon bahin sa matinabangong Samarianhon. Sa panahon ni Jesus, daghang Hudiyo ang mapihigon sa mga Samarianhon. Busa pinaagi sa pagpakita nga ang tawong lahi ug rasa mahimo gayong motabang sa usa ka Hudiyo, si Jesus nagtudlo ug mapuslanon kaayong pagtulon-an sa iyang Hudiyong mga mamiminaw.

Sakit sa Utok Salamat sa artikulong “Sa Dihang ang Imong Minahal Adunay Sakit sa Utok.” (Septiyembre 8, 2004) Ang akong inahan dugay na nga may sakit sa utok. Karon akong nasabtan nga kinahanglang dasigon nako siya sa pagpangayog tabang ug nga ang paghimo niini dili angay ikaulaw.

M. P., Ukraine

Ako 16 anyos lamang, apan dugay na akong nag-antos sa depresyon. Daghan kaayong salamat sa pagsulat niining mapuslanong artikulo nga makagiya kanako latas sa malisod nga mga panahon. Segurado ko nga ang uban makabenepisyo usab niini.

K. J., Alemanya

Padayona ang pagsulat sa maong mga artikulo! Makatabang kini kanatong tanan sa pagkaamgo nga kita angayng mas magmapailobon ug mahigugmaon ug makatabang kanato sa pagpangayo sa tabang nga atong gikinahanglan. Nangandoy gayod kita sa pagpuyo diha sa bag-ong kalibotan sa Diyos, nga dili na mag-antos pa niining makalilisang nga sakit!

K. F., Tinipong Bansa

Mga Batan-on Ako 15 anyos, ug kanunay usab nakong ipaambit ang akong pagtuo ngadto sa akong mga magtutudlo ug mga klasmet. Tinuod ang giingon sa artikulong “Mga Batan-on nga Maisogong Nagpahayag sa Ilang Pagtuo” (Septiyembre 8, 2004)​—usa gayod ka panalipod ang pagsangyaw diha sa tunghaan. Padayona ang pagsulat nianang ekselenteng mga artikulo!

R. B., Alemanya

Paraiso Nalingaw ako sa artikulong “Usa ka Gamayng Luna sa Paraiso.” (Septiyembre 8, 2004) Wala koy kalibotan bahin sa kadaghanang mananap nga gihisgotan! Sukad karon paningkamotan nako nga mabasa ang matag gula sa Pagmata!

W. C., Pransiya

Daghan kaayong salamat niining artikuloha. Talagsa ra ako makaadto sa ubang dapit gawas sa baryo nga akong gipuy-an, apan pinaagi sa mga panid sa Pagmata! ako kanunayng “makabiyahe.” Ang katahom sa kalalangan ni Jehova makapahingangha gayod kanato ug makapaalinggat kanato sa iyang dakong gugma.

D. H., Tinipong Bansa

Mas Maayong Butang Natandog gayod ako sa sugilanon sa kinabuhi ni Charles Sinutko nga giasoy diha sa artikulong “Usa ka Butang nga Mas Maayo pa kay sa Kabantog.” (Agosto 22, 2004) Si Brader Sinutko mihunong sa iyang karera ug gibiyaan ang kabantog ug bahandi aron sa pag-alagad kang Jehova. Siya ug ang iyang asawa kontento na sa simple nga kahimtang sa pagkinabuhi. Ang ilang lig-ong pagtuo nakapahilak kanako ug nakapausbaw sa akong pagsalig kang Jehova. Nakadasig kini kanako sa pagkugi gayod diha sa ministeryo. Salamat alang niining makapadasig nga sugilanon sa kinabuhi.

I. B., Polandia