Ang Hunahuna sa Bibliya

Angay Ka Bang Mahadlok sa Armagedon?

UNSA ang “Armagedon”? Sa yanong pagkasulti, kining pulonga nagtumong sa kondisyon o kahimtang diin ang mga magmamando sa kalibotan magkahiusa sa pagsupak sa Diyos ug sa iyang Gingharian ubos sa pagmando ni Jesu-Kristo. Diha sa basahong Pinadayag sa Bibliya, si apostol Juan may panan-awon diin ang mga magmamando natigom ug nahiusa sa pagsupak sa Diyos diha sa usa ka mahulagwayong dapit nga gitawag ug Armagedon.

Ang pulong “Armagedon” kas-a lang makita diha sa Kasulatan, apan kini kasagarang gigamit karon sa paghulagway ug katalagman. Kining pulonga gigamit sa paghulagway sa dagko ug gagmayng mga katalagman, gikan sa nukleyar nga pagkapuo ngadto sa virus sa kompiyuter. Daghang himalitan kaayong mga libro ang gisulat base sa gikaingong kataposan sa kalibotan, o sa yugto nga hapit na ang Armagedon. Usa ka serye sa mga nobela niana nga tema nakabaligya ug kapin sa 60 milyones ka kopya sulod sa miaging napulo ka tuig.

Ang ubang tawo nahadlok sa Armagedon. Sila nagtuo nga ang mga terorista, mga nasod nga tigpasiugda ug gubat, o mga katalagman nga dili makontrolar sa tawo mosangpot sa tibuok-kalibotang kalaglagan, nga tungod niana ang yuta dili na makasustiner ug kinabuhi. Ang uban nagtuo nga sa gitakdang panahon, ang Diyos masuk-anong molaglag sa atong planeta ug sa tanan nga ania dinhi. Makahadlok gayod kining hunahunaon! Apan unsa man ang hustong pagsabot sa “gubat sa dakong adlaw sa Diyos nga Labing Gamhanan” sa Armagedon?​—Pinadayag 16:​14, 16.

Laglagon ba ang Yuta?

Dili tanang tawo laglagon sa Armagedon. Sa unsang paagi kita nahibalo niini? Ang Bibliya nagpasalig kanato nga “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom aron pagalaglagon.” (2 Pedro 2:9) Busa, kita makasalig nga hingpit nga makontrolar sa Diyos ang iyang supremong gahom. Ang mga tawo lamang nga mosupak sa pagkasoberano sa Diyos maoy makaagom sa iyang kapungot sa Armagedon. Walay mga tawo nga dili-tinuyo nga malaglag.​—Salmo 2:​2, 9; Genesis 18:​23, 25.

Ang Bibliya nag-ingon nga ang Diyos ‘maglaglag sa mga nagalaglag sa yuta.’ (Pinadayag 11:18) Busa, tin-aw nga dili katuyoan ni Jehova nga Diyos  ang paglaglag sa atong planeta. Hinunoa, iyang wad-on ang daotang katilingban sa mga tawo nga supak sa iyang pagmando. Subay kini sa sumbanan nga iyang gitakda panahon sa Lunop sa adlaw ni Noe.​—Genesis 6:11-14; 7:1; Mateo 24:37-39.

Usa ka “Makalilisang nga Adlaw”

Tinuod, makahadlok ang ubay-ubayng mga tagna sa Bibliya bahin sa nagsingabot nga kalaglagan. Pananglitan, ang manalagnang si Joel naghisgot bahin sa “dako ug makalilisang nga adlaw ni Jehova.” (Joel 2:31) Ang Diyos molaglag pinaagig niyebe, ulan nga yelo, linog, mananakod nga sakit, makapabahang ulan, ulan nga kalayo ug asupre, makamatay nga kaguliyang, kilat, ug mout-ot-sa-unod nga kamatay. * (Job 38:​22, 23; Ezequiel 38:14-23; Habacuc 3:​10, 11; Zacarias 14:​12, 13) Ug ang Bibliya detalyadong naghubit sa panahon diin ang yuta mapuno unya sa mga patay, nga pasagdan lang aron mahimong abono o pagkaon sa mga langgam ug ubang mga mananap. (Jeremias 25:​33, 34; Ezequiel 39:17-20) Ang mga kaaway sa Diyos mahupngan unya sa kalisang panahon niana nga gubat.​—Pinadayag 6:​16, 17.

Kini ba nagpasabot nga ang masinugtanong mga magsisimba sa matuod nga Diyos mahadlok unya sa makapahingangha nga mga panghitabo sa Armagedon? Dili gayod, tungod kay ang mga alagad sa Diyos dinhi sa yuta dili makigbahin niini nga panag-away. Dugang pa, sila pagapanalipdan ni Jehova. Bisan pa niana, ang matuod nga mga magsisimba mahingangha unya sa makalilisang nga pasundayag sa gahom sa Diyos.​—Salmo 37:34; Proverbio 3:​25, 26.

Apan, makaiikag nga si apostol Juan giinspirar aron sa pagpasalig kanato: “Malipayon ang si bisan kinsa nga magatuman sa mga pulong sa tagna niining linukot nga basahon,” lakip na sa pasidaan bahin sa Armagedon. (Pinadayag 1:3; 22:7) Posible kaha nga malipay ang usa sa pagpalandong bahin sa Armagedon? Sa unsang paagi man kini posible?

Ang Diyos Nag-awhag Kanato sa Paglihok

Sa dihang magsingabot ang kusog kaayong bagyo, o unos, ang lokal nga mga awtoridad mohatag ug mga pasidaan aron mapanalipdan ang kinabuhi. Aron maseguro nga ang tanan makadungog sa pasidaan, ang mga polis mahimong sugoon sa paggamit ug mga sistema sa pagpasidaan o sa pagpamalaybalay. Ang katuyoan niining tanan dili mao ang paghadlok sa mga tawo kondili pagtabang kanila sa paglihok aron maluwas. Ang maalamong mga tawo mapasalamatong mamati sa pasidaan, ug kadtong molihok agig sanong nalipay nga ila kining gihimo.

Sama usab niini ang pasidaang mensahe sa Diyos bahin sa nagsingabot nga “unos” sa Armagedon. (Proverbio 10:25) Si Jehova naghatag ug mga detalye bahin sa iyang gubat diha sa iyang sinulat nga Pulong. Dili niya tinguha ang pagsabwag ug kalisang kondili ang paghatag ug igong pasidaan ug pagtultol sa mga tawo sa paghinulsol ug sa pagpaningkamot gayod sa pag-alagad kaniya. (Sofonias 2:​2, 3; 2 Pedro 3:9) Kadtong molihok gantihan ug kaluwasan. Busa, dili kita angayng mahadlok sa nagsingabot nga gubat sa Diyos. Hinunoa, kita masaligong makalantaw sa umaabot nga “ang matag usa nga magatawag sa ngalan ni Jehova maluwas.”​—Joel 2:32.

[Footnote]

[Hulagway sa panid 12]

Sa dihang magsingabot ang kusog kaayong bagyo, ang lokal nga mga awtoridad mohatag ug mga pasidaan aron mapanalipdan ang kinabuhi

[Hulagway sa panid 13]

Ang pasidaang mensahe sa Diyos bahin sa Armagedon nag-awhag kanato sa paglihok