Kon sa Unsang Paagi Nimo Mahuptan ang Imong Trabaho

“Nakakita ka na ba ug usa ka tawo nga hanas sa iyang buhat? Siya magatindog sa atubangan sa mga hari.”​—Proverbio 22:29.

SUMALA sa gipakita sa teksto sa Bibliya sa ibabaw, ang hanas nga mga mamumuo sagad nga magustoan pag-ayo. Unsa ang pipila sa mga kahanas ug mga hiyas nga gusto sa mga agalon diha sa ilang mga mamumuo? Si George, tigdumala sa mga mamumuo sa usa ka kompaniya nga adunay 700 ka empleyado, miingon sa Pagmata!: “Ang gusto namo sa usa ka empleyado mao ang iyang katakos sa pagpakigkomunikar ug maayo ug pagpakigtambayayong nga malinawon sa uban.” Ang Bibliya adunay praktikal nga tambag nga makatabang kanimo nga mas maugmad kining mga hiyasa, sa ingon magpadako sa purohan nga mahuptan nimo ang imong trabaho. Tagda ang pipila ka mga pananglitan.

Ayoha ang Imong Paagi sa Pakigkomunikar

Ang magsusulat sa Bibliya nga si Santiago nagpakita nga ang usa ka tawo nga maayong makigkomunikar aduna unay himoon ayha siya mosulti. Si Santiago misulat nga ang usa kinahanglang “magmaabtik sa pagpaminaw, magmahinay sa pagsulti.” (Santiago 1:19) Nganong mapuslanon man kini? Si Solomon misulat: “Kon ang usa magahatag ug tubag sa usa ka butang nga wala pa niya madungog, kana maoy kabuangan sa iyang bahin ug usa ka kaulawan.” (Proverbio 18:13) Sa pagkatinuod, kon ikaw maminawg maayo sa imong agalon ug mga kauban sa trabaho, malikayan nimo ang dili-pagsinabtanay ug ang paghimog grabeng mga sayop.

Sa dihang mosulti ka, ang paagi sa imong pagsulti hinungdanon usab. Kon ang imong sinultihan klaro ug may igong gikusgon, lagmit nga masabtan sa uban ang imong giingon, ug mas tahoron sa imong kaestorya ang imong gisulti. Si Brian, usa ka konsultant sa pangempleyo nga gihisgotan  sa miaging artikulo, miingon: “Basin makurat ka sa pagkasayod nga daghang tawo ang natangtang sa trabaho, dili tungod kay sila dili hanas sa ilang trabaho, kondili tungod kay sila dili maayong mokomunikar.”

Pakigkooperar sa Uban

Sanglit kanunay nimong makauban ang imong mga kauban sa trabaho, walay duhaduha nga mailhan nimo sila pag-ayo. Tungod niini, basin matental ka sa pagtabi bahin kanila, nga magsugid sa uban sa ilang mga kasaypanan ug mga kahuyangan. Apan, ang Bibliya nagtambag nga “himoon ninyong tumong nga magkinabuhing malinawon ug magtagad sa inyong kaugalingong kalihokan.” (1 Tesalonica 4:11) Kon himoon nimo kini, malikayan nimo ang pagbaton ug reputasyon ingong “usa ka hilabtanon sa mga butang sa uban.” (1 Pedro 4:15) Dugang pa, malikayan nimo ang pag-usik-usik ug panahon ug ang wala-kinahanglanang kasungian batok sa imong mga kauban sa trabaho.

Sa dihang hangyoon ka sa pagbuhat ug usa ka butang, hinumdomi ang maalamong tambag ni Jesus: “Kon ang tawong may awtoridad magpugos kanimo sa pag-alagad ug usa ka milya, ubani siya ug duha ka milya.” (Mateo 5:41) Si Jesus naghisgot dinhi bahin sa awtoridad sa gobyerno, apan ang prinsipyo tinong mapadapat sa trabahoan. Kon ikaw nailhan ingong usa ka kugihang empleyado​—usa nga andam mohimo ug labaw sa gidahom kanimo​—dakog kalagmitan nga mahuptan nimo ang imong trabaho. Siyempre, adunay limitasyon sa kon unsay makataronganong ihangyo kanimo sa imong agalon. Si Jesus miingon nga kinahanglang ibayad sa usa “kang Cesar ang mga butang ni Cesar, apan ang mga butang sa Diyos ngadto sa Diyos.” (Mateo 22:21) Gipaila dinhi ni Jesus ang prinsipyo nga dili nimo angayng tugtan ang mga tawong anaa sa awtoridad sa pagpugong kanimo sa pagbuhat sa labawng hinungdanong mga butang, sama sa pagsimba sa Diyos.

Magmatinud-anon

Usa ka surbi sa kapig 1,400 ka kompaniya ang nagpakita nga ang ‘mga hiyas nga ilabinang nagustoan sa kadaghanang agalon diha sa mga nangaplay ug trabaho mao ang pagkamatinud-anon ug integridad.’ Siyempre, ang pagkamatinud-anon nagpasabot nga dili ka mangawat ug kuwarta o mga butang gikan sa imong agalon. Nagpasabot usab kini nga dili ka mangawat ug panahon. Usa ka pagtuon nga gipahigayon sa usa ka ahensiya sa pangempleyo nakakaplag nga ang panahon nga nakawat sa mga empleyado mikabat ug aberids nga 4 ka oras ug 15 minutos matag empleyado kada semana. Gawas pa sa ubang mga butang, kining mga kawatan ug panahon kanunayng moabot nga ulahi, sayong mohawa sa trabaho, ug makighugoyhugoy sa ubang empleyado panahon sa trabaho.

Ang Bibliya nagtambag: “Ang kawatan kinahanglan nga dili na mangawat, hinuon maghago siya, nga magbuhat pinaagi sa iyang mga kamot sa maayong buluhaton.” (Efeso 4:28) Dugang pa, ang Pulong sa Diyos nagdasig sa mga Kristohanon sa pagkugi, bisan kon sila wala direktang panid-i niadtong anaa sa awtoridad. Si apostol Pablo misulat: “Magmasinugtanon kamo sa inyong mga agalon nga unodnon sa tanang butang, dili pinaagig mga buhat sa pakita-lang nga pag-alagad, ingong mga tigpahimuot sa mga tawo, kondili uban ang katim-os sa kasingkasing, nga may kahadlok kang Jehova.” (Colosas 3:22) Kon nailhan ka ingong kugihang trabahante​—bisan kon walay naniid kanimo​—kasaligan ka nga empleyado.

Magmarealistiko

Ang Bibliya tukmang nagtagna nga ang atong panahon mahimong makuyaw ug lisod sagubangon. (2 Timoteo 3:1) Ang nagakahitabong kawalay-kasegurohan ug kagubot sa politika ug katilingban sa ngadtongadto mosangpot sa dili-matag-an nga kahimtang sa ekonomiya. (Mateo 24:3-8) Busa, bisan pag sundon nimo ang mga sugyot sa ibabaw, basin mawad-an ka gihapon ug trabaho.

Bisan pa niana, ang pagpadapat sa mga prinsipyo sa Bibliya motabang kanimo nga dili kaayo mabalaka sa dihang mawad-ag trabaho. Si Jesus miingon: “Karon, kon ang Diyos sa ingon nagbesti sa mga tanom sa kapatagan, nga ania karong adlawa ug ugma isalibay ngadto sa hudno, dili ba kamo labaw pa nga iyang pagabestihan, kamo nga diyutay ug pagtuo? Busa ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Kay ang inyong langitnong Amahan nahibalo nga gikinahanglan ninyo kining tanang butanga.”​—Mateo 6:30-32.

Sama sa daghang uban pa sa tibuok kalibotan, si Ericka, nga gihisgotan ganina, nakasinati nga tinuod ang mga pulong nga gikutlo sa ibabaw. Mao kiniy iyang giingon: “Ganahan kaayo ko sa akong presenteng trabaho. Apan nasayran nako sumala sa akong kasinatian nga ang mga butang mahimong mausab. Bisan pa niana, pinaagi sa pagpadapat sa mga prinsipyo sa Bibliya ug pagsalig kang Jehova, nakat-onan nako kon unsaon nga dili kaayo mabalaka sa dihang mawad-ag trabaho ug kon unsaon nga magmakontento gayod sa trabaho nga akong makuha.”

[Hulagway sa panid 10]

Mahimo kang matangtang sa trabaho kon dili ka maminaw panahon sa mga miting