Mga Batan-on nga Naghatag ug Epektibong Pamatuod

Daghang batan-ong mga Saksi ni Jehova maisogong nagpaambit sa ilang pagtuo diha sa tunghaan ug sa Kristohanong ministeryo, ug malamposon kaayo sila. Tagda ang mosunod nga mga pananglitan. *

“Sa tersero grado pa ako,” matod ni Kristina, “tagsatagsa kaming gihatagan sa magtutudlo ug talaadlawan nga sulatan namo sa among adlaw-adlawng kalihokan. Basahon sa magtutudlo ang among mga talaadlawan ug dayon aduna siyay isulat dinhi para namo. Nakahunahuna ako sa pagsulat diha sa akong talaadlawan mahitungod sa akong umalabot nga bahin sa Teokratikanhong Tunghaan sa Ministeryo. Daw naikag niini ang magtutudlo, busa akong gidapit siya sa pagtambong sa Kingdom Hall aron iyang madungog ang akong bahin. Dili lang siya ang mitambong kondili ang akong magtutudlo usab sa primero grado. Human niadto, gisultihan sa magtutudlo ang tibuok klase nga naikag kaayo siya sa akong bahin. Nalipay kaayo ako. Apan diha pay laing nahitabo. Mga usa ka tuig sa ulahi, akong giasoy kini nga eksperyensiya diha sa usa ka sirkitong asembliya sa mga Saksi ni Jehova, ug mitambong usab ang akong magtutudlo niana nga asembliya. Sa ulahi, ako ug ang akong higala nga payunir miduaw kaniya ug gitanyagan siya ug librong Kahibalo nga Motultol sa Kinabuhing Walay Kataposan. Mitambong pa gani siya sa usa sa among mga distritong kombensiyon!”

Sa edad nga sayis anyos, si Sydnee batid na nga makigsulti sa maisogong paagi ngadto sa iyang mga klasmet sa mga kamatuoran bahin sa Pulong sa Diyos, lakip na ang bahin sa kahimtang sa mga patay ug ang posisyon ni Jesus kon itandi sa Diyos. “Siya usa ka masiboton ug maisogong gamayng ministro,” matod sa iyang inahan. Sa hapit nang matapos ang unang tuig sa iyang pag-eskuyla, si Sydnee nagpahayag ug kasubo. “Nabalaka ko sa akong mga klasmet,” matod niya. “Unsaon na man nila pagkat-on bahin kang Jehova?” May nahunahunaan si Sydnee. Sa kataposang adlaw sa klase, iyang gihatagan ang tagsatagsa ka estudyante ug regalo nga nindot nga pagkaputos. Kini mao ang publikasyong Akong Basahon sa mga Estorya sa Bibliya. Si Sydnee nakaapod-apod ug 26 ka kopya, ug iyang gisultihan ang mga estudyante nga pag-abot na nila sa balay ablihan ang ilang regalo uban sa ilang mga ginikanan. Giisip ni Sydnee ang iyang mga klasmet ingong iyang personal nga teritoryong pagasangyawan. Iya pa ganing gitawagan sila sa telepono  sa pagsusi kon nakagusto ba sila sa libro. Usa ka batang babaye miingon nga siya mobasa sa iyang kopya kada gabii uban sa iyang inahan.

Sa 15 anyos pa siya, gihatagan ni Ellen ug ubay-ubayng mga kopya sa Pagmata! ang iyang magtutudlo sa history. “Nagustohan niya kini,” matod ni Ellen, “ug duha ka tuig na siyang nagbasa ug Pagmata!” Si Ellen nagpadayon sa pag-ingon: “Dili pa dugay gihatagan nako siya ug publikasyong Akong Basahon sa mga Estorya sa Bibliya, ug iya kong giingnan nga nagustohan kaayo kini sa iyang duha ka anak nga babaye. Busa gihatagan na pod nako siya ug librong Pagkat-on Gikan sa Dakong Magtutudlo. Sa ulahi, iya akong gihatagan ug kard. Kini nag-ingon: ‘Daghang salamat sa imong gihatag nga mga libro. Ako ug ang akong mga anak ganahan kaayong mobasa niini. Makapalipay kaayong makakita ug usa ka batan-on nga sama nimo ka mabuot ug ka debotado. Walay gasa ang ikatandi sa gasa nga nadawat nimo, ang imong pagtuo. Mas daghan kag natudlo kanako kay sa akong posibleng ikatudlo kanimo!’ Tungod niini nga eksperyensiya akong nakita kon unsa ka dako ang pagtamod sa mga tawo sa kamatuoran sa Bibliya kon maningkamot kita sa pagpaambit niini ngadto kanila.”

Si Daniel sayis anyos pa sa dihang nagsugod siya sa pagtuon sa Bibliya. “Si Mama maoy nagtudlo nako sa Bibliya,” matod niya, “pero gusto ko nga duna koy tudloan.” Gipili ni Daniel si Gng. Ratcliff​—usa ka edarang babaye nga iyang napahimutangan ug literatura sa Bibliya. “Gusto nakong ipakita kanimo ang akong paboritong libro, ang Akong Basahon sa mga Estorya sa Bibliya,” iyang giingnan si Gng. Ratcliff, ug midugang: “Gusto unta kong moanhi kada semana ug basahan ka ini.” Misugot si Gng. Ratcliff sa tanyag ni Daniel. “Gisugdan dayon namo nianang hapona ang pagtuon uban kang Gng. Ratcliff,” matod ni Laura, ang inahan ni Daniel. “Nagpulipuli si Daniel ug Gng. Ratcliff sa pagbasa sa mga parapo, ug dayon gihangyo siya ni Daniel sa pagbasa sa pinili nga mga teksto nga gisitar sa kataposan sa estorya. Gikuyogan nako si Daniel, apan morag gusto ni Gng. Ratcliff nga sila lang ni Daniel ang maghisgot bahin niini!” Sa ngadtongadto, si Daniel ug Gng. Ratcliff nagsugod sa pagtuon sa librong Ikaw Mabuhing Walay Kataposan sa Paraiso sa Yuta. Nianang tungora ang manghod nga babaye ni Daniel nga si Natalie mahibalo nang mobasa, busa miapil siya sa pagtuon. Daghan ug pangutana si Gng. Ratcliff​—ang pipila niini medyo lisod. Apan gigamit ni Daniel ug Natalie ang pulyetong Mga Topiko sa Bibliya nga Kahisgotan ug ang konkordansiya diha sa kataposang mga panid sa Bibliya aron makahatag sila ug Kasulatanhong mga tubag. Si Gng. Ratcliff, nga usa ka Katoliko sa tibuok niyang kinabuhi, nalipay sa mga butang nga iyang nakat-onan. “Nagmahay ako nga wala dayon ako makatuon sa Bibliya!” siya miingon usa ka higayon human sa ilang pagtuon. Ikasubo, si Gng. Ratcliff namatay di pa dugay sa edad nga 91. Apan tungod sa pagtuon sa Bibliya iyang nasayran ang hamiling mga kamatuoran, lakip na ang paglaom nga gitudlo sa Bibliya bahin sa pagkabanhaw diha sa paraisong yuta. Si Daniel diyes anyos na karon ug nagdumalag duha ka pagtuon sa Bibliya. Si Natalie, nga otso anyos na karon, nagdumalag pagtuon sa Bibliya uban sa usa ka batang babaye nga kaedad niya.

Ang mga batan-on sama ni Kristina, Sydnee, Ellen, Daniel, ug Natalie nakapalipay sa ilang Kristohanong mga ginikanan. Labaw sa tanan, nakapalipay sila sa kasingkasing ni Jehova, ug dili niya kalimtan ang gugma nga gipasundayag niini nga mga batan-on alang sa iyang ngalan.​—Proverbio 27:11; Hebreohanon 6:10.

[Footnote]

[Mga hulagway sa panid 18]

Si Kristina (sa ibabaw) ug si Sydnee

[Hulagway sa panid 19]

Si Daniel ug Natalie

[Hulagway sa panid 19]

Si Ellen