Andam Ka na Bang Motambong?

◼Motambong sa unsa? Sa “Diyosnong Pagkamasinugtanon” nga Distritong Kombensiyon sa mga Saksi ni Jehova! Usa ka serye niining tulo-ka-adlaw nga mga kombensiyon gieskedyul nga ipahigayon sa Nobyembre, Disyembre, ug sayo sa Enero, 2006 diha sa kapin sa 50 ka dapit sa tibuok Pilipinas. Walay duhaduha nga adunay usa nga ipahigayon duol sa imong gipuy-an.

Sa kadaghanang dapit, ang mga sesyon magsugod sa alas 8:30 s.b. uban sa usa ka honi sa musika. Ang tema sa Biyernes maoy “Tumana Ninyo ang Akong Tingog, ug Ako Mahimong Inyong Diyos.” (Jeremias 7:23) Human sa pakigpulong sa buntag nga nag-ulohang “Kita ‘Katingalahan nga Pagkabuhat’” ug “Kon Nganong Angay Nimong Tuohan ang Pagkabanhaw,” ang sesyon matapos uban sa keynote address, “Sunda ang Sulondan sa Imong Pagkamasinugtanon sa Diyos.”

Ang sesyon sa hapon sa Biyernes magpasiugda sa mga pakigpulong nga “Kanunayng ‘Itumong ang Hunahuna Diha sa mga Butang sa Espiritu,’ ug Mabuhi,” “Pagbantay Batok sa Tanang Matang sa Hakog nga Pangibog,” ug “Ayawg Tuohi ang ‘Inantigong Pagkamugna nga mga Bakak nga Sugilanon.’” Dayon usa ka duhag-bahin nga simposyum ang magpresentar ug mga haylayt gikan sa mga basahon sa Bibliya sa Haggeo ug Zacarias. Ang sesyon sa adlaw matapos uban sa pakigpulong nga “Ang Tanang Pag-antos Matapos na sa Dili-Madugay!”

Ang tema alang sa programa sa Sabado maoy “‘Magmasinugtanon Kamo Gikan sa Kasingkasing’” “sa Tanang Butang,” nga gibase sa Roma 6:17 ug 2 Corinto 2:9. Ang sesyon sa buntag naglakip sa tulo-ka-bahin nga simposyum nga nag-ulohang “Malipayon ang mga Pamilya nga Nagapadapat sa mga Prinsipyo sa Diyos.” Aduna kiniy mga demonstrasyon ug mga interbiyo ug naghatag ug pagtagad kon sa unsang paagi ang mga membro sa pamilya—bana, asawa, ug mga anak—makaamot sa kalipay sa pamilya. Ang programa sa buntag matapos uban sa bahin nga “Himoa nga ang Inyong Oo Magkahulogang Oo,” ug human niana adunay kahigayonan alang niadtong mga kuwalipikado sa pagpabawtismo.

Ang mga pakigpulong sa Sabado sa Hapon naglakip sa “‘Paglikay sa Pagtan-aw sa Butang nga Walay-Pulos’” ug “‘Balik Kamo sa Magbalantay sa Inyong mga Kalag.’” Human niini mao ang duha-ka-bahin nga simposyum nga nag-ulohang “Magmasinugtanon Kamo sa mga Nagapanguna Kaninyo.” Ang kataposang pakigpulong sa hapon, nga nag-ulohang “Unsay Tinuod nga Gitudlo sa Bibliya?” maoy usa sa makaiikag nga mga bahin sa kombensiyon.

Ang programa sa Dominggo sa buntag maghisgot sa tema nga “Tumanon Mo Kining Tanang Pulong . . . Aron Maayo ang Imong Dangatan,” nga gibase sa Deuteronomio 12:28. Usa ka tulo-ka-bahin nga simposyum nga nag-ulohang “Tabangi ang Uban sa Pagsugot sa Kon Unsay Gitudlo sa Bibliya” nagtaganag praktikal nga tabang sa pagsugod ug pagdumala ug epektibong mga pagtuon sa Bibliya.

Ang sesyon sa buntag matapos uban sa full-costume nga drama nga nag-ulohang “Pangab-ot sa mga Tumong nga Nagpasidungog sa Diyos.” Unhan kini sa pakigpulong nga “Mga Batan-on—Ang Inyong mga Tumong Makatabang ba Kaninyo nga Magmalamposon?” Kini nga pakigpulong maghatag ug pasiunang impormasyon alang sa drama sa Bibliya, nga maoy mahitungod sa batan-ong si Timoteo, kinsa naghatag ug panig-ingnan sa dili mahakogon nga pag-alagad nga giawhag nga sundon sa modernong mga batan-on. Ang kataposang sesyon sa Dominggo sa hapon magpasiugda sa pakigpulong publiko, “Kinsa ba ang Angay Natong Sugton?”

Pagplano na karon aron makatambong. Aron mahibaloan ang dapit nga duol sa inyong pinuy-anan, kontaka ang lokal nga Kingdom Hall of Jehovah’s Witnesses o pagsulat sa Watch Tower, P.O. Box 2044, 1060 Manila.