Nakatabang ang Pagpatalinghog sa mga Pasidaan

MIYERKOLES, Agosto 24, 2005—usa ka mainit, umogong adlaw kadto sa New Orleans, Louisiana, U.S.A. Si Alan ug ang iyang pamilya mibiya sa ilang balay aron magbakasyon ug pipila ka adlaw sa Beaumont, Texas, nga kapin sa 300 kilometros pakasadpan. Nagdala sila ug mga sinina para sa lima ka adlaw. Si Alan misaysay: “Wala miy kalibotan nga moabotay ang Bagyong Katrina, nga niadtong tungora talisugod na sa sidlakan sa Florida. Apan, sa gabii sa Biyernes nadayag nga maigo sa malaglagong bagyo ang New Orleans.”

Sa Dominggo, Agosto 28, natino nga kusog kaayo ang bagyo nga ginganlag Katrina. Ang mayor sa New Orleans nagbaod sa mga tawo sa paghawa sa siyudad. Tungod niini, libolibong sakyanan ang miaginod paamihan ug pakasadpan, ug naghuot ang haywey. Libolibo ka tawo nga walay sakyanan nangadto sa mga silonganan o sa dakong estadyum nga ginganlag Superdome. Ang pipila nakahukom nga dili mobakwet ug nagpabilin na lang sa ilang mga balay.

‘Sa Sunod, Akoy Unang Mobakwet!’

Si Joe, nga usa sa mga Saksi ni Jehova, nagpabilin sa iyang balay. Nagtuo siyang luwas ra siya sa balay. Siya naghunahuna nga ang kadaot nga gipahinabo sa miaging mga bagyo dili ingon ka grabe sa gidahom sa mga awtoridad. “Nagtuo ako nga dili ra ko maunsa,” siya nag-ingon. “Nausab dihadiha ang akong opinyon! Mihaguros ang hangin ug ulan. Sa kalit lang, ang atop sa akong balay nalangkat. Dayon tulin nga mitaas ang tubig—tulo ka metro sulod sa tulo ka oras! Kini kusog kaayong nag-agos nga tungod niana kinahanglan akong mosaka sa ikaduhang andana. Nahadlok gyod ko kay naghaguros ang kusog nga hangin ug ang mga bungbong morag matumpag. Ang mga kisame nangahugno. Niadtong tungora naghunahuna ako kon unsaon pag-ikyas.

“Misantop sa akong hunahuna ang pag-ambak sa nagbul-og nga tubig. Apan balod kaayo sa gawas. Tungod sa kusog nga hangin, namuti ang balod sa mga karsada sa duol. Nahibalo ako nga kon moambak ako, lagmit malumos gayod ako.”

Sa ngadto-ngadto, dihay miabot nga lansa nga miluwas kang Joe ug midala kaniya sa usa ka taytayan. Sa ilalom sa taytayan, naglutaw ang mga patayng lawas ug kinalibang. Natulog siya sa kargahanan sa likod sa awto. Human niana siya misakayg helikopter ug bus paingon sa New Orleans Civic Center. “Giatiman kaayo ko sa mga tawo didto,” siya nag-ingon. “Dihay higayon nga naglibog ko. Nabalaka ako kon asa ko makakuhag mainom.”

Kon palandongon ni Joe ang nahitabo, siya nakahunahuna nga nalikayan unta niya ang maong pait nga kahimtang. “Nakakat-on na ko,” siya nag-ingon. “Sa sunod higayon nga sila moingong “Pamakwet mo,” akoy unang mobakwet!”

 Siya Wala Manumbaling sa Pasidaan, Nangupot sa Kahoy

Ang mga siyudad sa Biloxi ug Gulfport, sa baybayon sa Mississippi, nakaagom ug dakong kadaot ug daghang kinabuhi ang nakalas. Sumala sa The New York Times sa Agosto 31, 2005, si Vincent Creel, tagdumala sa publikong mga kahikayan sa Biloxi, nag-ingon: “Daghang tawo ang wala manumbaling sa dihang gimandoan sila sa pagbakwet tungod kay sila naluwas o ang ilang mga balay wala maguba sa Bagyong Camille [niadtong 1969].” Gituohan nga ang Camille mas kusog kay sa Katrina, apan sama sa giingon ni Creel, ang Katrina ‘nagpahinabog dagkong mga balod nga samag tsunami.’

Si Inell, nga dugay nang nagpuyo sa Biloxi, wala usab manumbaling sa mga pasidaan. Siya miingon: “Kami nakasugamak ug daghang bagyo sulod sa daghang tuig nga wala ra maunsa. Busa wala kaayo ko nabalaka sa Katrina.” Human nga natigom ni Inell ang iyang 88-anyos nga ugangan, iyang anak nga lalaki ug babaye, ug iyang umagad—apil ang duha ka iro ug tulo ka iring—sila nakahukom nga dili mohawa sa ilang lig-ong balay. Ang bagyo mihapak sa Biloxi sa mga alas 10:00 s.b. sa Agosto 29. Si Inell nahinumdom: “Akong namatikdan nga misulod ang tubig sa usa sa mga kuwarto sa likod nga bahin sa balay. Taudtaod misanap na ang tubig sa tibuok balay. Nakahukom kami sa pag-adto sa lawting aron malayo sa peligro. Apan ang tubig padayong misaka. Kinahanglang mogawas kami sa lawting kay basin matanggong mi didto. Apan asa man mi mangadto?

“Gibuslotan sa akong anak lalaki ang eskrin aron makalangoy kami pagawas ug makatunga gikan sa tubig. Dayon, nanggunit kami sa kilid sa atop aron dili maunlod. Tulo kanamo miadto sa tuong bahin sa balay, ug ang akong anak babaye miadto sa wala. Akong nakita ang usa ka dakong kahoy sa duol. Ang akong anak lalaki, akong ugangan, ug ako milangoy padulong sa kahoy ug nangupot pag-ayo niini. Dayon akong nadungog ang akong anak babaye nga misinggit, “Mama! Mama!” Ang akong umagad, nga kinaulahiang migawas sa lawting, milangoy paingon sa akong anak babaye aron sa pagluwas kaniya. Silang duha nakasakay sa lansa nga napondo diha sa agianan ug naglutaw-lutaw duol sa balay. Buot nila akong pasakyon sa lansa. Pero di  ko gustong mangarisgar sa kusog kaayong naglilo nga tubig. Para nako luwas na ako diha sa kahoy, ug dili gayod ko mobiya niini.

“Gikan sa akong nahimutangan, akong nakita nga natabonan ug tubig ang mga dalan ug ang palibot sa balay. Nakapamalandong ako sa akong kahimtang, ug naglagot ko sa akong kaugalingon kay wala ko mosunod sa mga pasidaan sa pagbakwet.

“Sa ngadto-ngadto, ang tubig inanayng mihubas, ug sa kataposan nagkauban na ming tanan sa lansa! Miabot ang trak sa bombero ug gidala kami sa ospital. Pagkadako sa among pasalamat nga buhi kami!”

Ang Kahikayan sa mga Saksi sa Pagbakwet

Naapektohan sa Bagyong Katrina ang Gulf Coast, diin libolibo ka balay ang nangaguba gikan sa Louisiana pasilangan ngadto sa Alabama. Apan kanunay nang gibagyo kining lugara sa Tinipong Bansa. Busa, sa pipila ka tuig ang mga Saksi ni Jehova may naandam na nga kahikayan sa pagbakwet. Kada tuig, kasagaran sa Hunyo, sa dili pa magsugod ang tingbagyo, ang 21 ka kongregasyon sa mga Saksi ni Jehova sa New Orleans ug sa sikbit nga mga dapit magrepaso sa kahikayan sa dinaliang pagbakwet. Busa, kadaghanang mga Saksi nianang dapita nahibalo sa mga lakang nga himoon panahon sa emerhensiya. Sa unsang paagi ang kahikayan misaler sa Bagyong Katrina?

Sa gianunsiyo sa mga opisyal sa gobyerno nga kinahanglang mobakwet, gikontak sa mga ansiyano sa matag kongregasyon ang ubang mga membro sa ilang kongregasyon aron aghaton sila sa pagbiya sa siyudad. Daghan ang nakaarang sa paghimo sa ilang kaugalingong mga kahikayan sa pagbiya duyog sa ilang pamilya o mga higala. Dunay gihikay nga linaing transportasyon alang sa mga tigulang ug baldado. Si John, nga membro sa komite sa paghatag ug hinabang sa mga Saksi, nag-ingon, “Ako nagtuo gayod nga pinaagi sa pagsunod niini nga kahikayan, kami nakaluwas ug daghang kinabuhi.” Busa, kadaghanan sa mga Saksi ni Jehova nakagawas na sa siyudad una pa mihapak ang bagyo. Aron mahatagan dayon ug praktikal nga tabang ang naapektohang mga dapit, ang sangang buhatan sa mga Saksi ni Jehova sa U.S. nag-organisar ug mga komite sa emerhensiyang hinabang.

Pagpangita sa mga Saksi Diha sa Astrodome

Mga 16,000 ka kagiw, kadaghanan gikan sa Louisiana, gihatagag pagkaon, tubig, ug puy-anan diha sa Astrodome sa Houston, Texas. Ang komite nga naghatag ug hinabang sa mga Saksi sa Houston nahibalo nga dihay pipila ka Saksi nianang dakong panon. Apan unsaon man nila pagpangita kanila?

Sayo sa buntag sa Biyernes, Septiyembre 2, usa ka grupo sa mga ansiyanong Saksi miabot sa Astrodome aron pangitaon ang ilang nagkatibulaag nga mga igsoon. Nakurat sila sa pagkakita sa libolibong lalaki, babaye, tin-edyer, kabataan, ug mga masuso diha sa dako kaayong estadyum. Ang dulaanag potbol napuno sa libolibo ka teheras ug sa mga kagiw nga mapailobong nagpaabot ug solusyon sa ilang mga problema. Daghan ang naglinya nga nagkinahanglan ug medikal nga pag-atiman, ug ang medikal nga mga kawani nagkapuliki pag-ayo sa pagdala sa mga pasyente ngadto sa mga ambulansiya.

“Gibati ko nga morag anaa ako sa kampo sa mga kagiw,” matod pa ni Samuel, nga usa sa mga ansiyano nga nangita sa mga Saksi. Sa unsang paagi man nila makit-an ang pipila ka Saksi sa kadaghan sa tawo? Sa sinugdan, ang mga ansiyano kapila mibalik-balik sa agianan nga nagdalag dagkong poster nga nag-awhag sa mga Saksi nga magpaila sa ilang kaugalingon. Human ang  tulo ka oras nga paglibot, wala silay nakit-an busa sila nakahunahuna nga kinahanglan ang mas praktikal nga sistema. Ilang gihangyo ang Red Cross sa pag-anunsiyo sa mikropono: “Tanang bawtismadong mga Saksi ni Jehova, palihog adto sa rampa sa sidlakang bahin sa ubos nga andana.”

Sa kataposan, anam-anam nga nangabot ang mga Saksi nga dagkog mga pahiyom. Si Samuel miingon: “Sila nahupong sa kalipay ug nanghilak. Ila kaming gihalog ug hugot ug gigunitan ang among mga kamot. Sila nahadlok nga mobuhi kay basin mawala sila sa kadaghan sa tawo.” Sa Biyernes ug Sabado, 24 ka Saksi ang nakaplagan ug gidala sa dapit diin ginahatagan ug tabang ang mga Saksi.

Kadaghanan kanila walay kabtangan gawas sa ilang gisul-ob nga sinina nga hugaw na. Usa ka Saksi nagdalag usa ka gamayng kahon nga samag gidak-on sa kahon sa sapatos. Naundan kinig pipila ka importanteng mga papeles—ang bugtong butang nga iyang nasalbar gikan sa malaglagong bagyo.

Sa Astrodome, daghang tawo ang nakaila sa miduaw nga mga ansiyano ingong mga ministro sa mga Saksi ni Jehova ug miduol kanila, nga nangayog mga Bibliya ug literatura sa Bibliya. Kapin sa 220 ka Bibliya ang gihangyo. Gitanyag usab sa mga Saksi ang Hulyo 22, 2005 nga gula sa Pagmata! nga tukma kaayong nagpasiugda sa serye nga “Natural nga mga Kalamidad—Nagkagrabe ba Kini?”

Namalik ang Uban sa Ilang Balay

Usa sa naluwas sa bagyo maoy usa ka beteranong reporter ug general manager sa usa ka estasyon sa TV sa New Orleans. Sa iyang trabaho, nakasaksi na siyag daghang katalagman sa miagi. Mibalik siya sa iyang balay sa Jefferson Parish, Louisiana, aron kuhaon ang uban niyang gamit. “Nakurat ako,” siya miingon. “Grabe ug  bug-os ang kalaglagan. Among nakita sa TV ang pagbaha sa dihang natumpag ang mga dike ug mibuhagay ang tubig gikan sa mga kanal. Apan dakong kadaot usab ang gipahinabo sa kusog nga hangin. Naguba ang akong tibuok apartment. Ang palibot giagup-op, nangadunot, ug nanimaho. Hilabihan gayod kini ka baho. Apan maayo na lang kay buhi kami.”

Si Alan, nga gihisgotan ganina, mibalik sa iyang balay sa Metairie, sa kasadpang bahin sa gawas sa New Orleans. Ang bagyo nagpahinabog dakong kadaot. “Kadto makapaguol ug makapakurat,” matod niya. “Morag gihulogan ug bomba atomika ang siyudad. Tingali ikaw nakadungog niini sa balita sa radyo ug nakakita niini sa TV. Apan lahi kaayo kon ikaw maglakaw o magdrayb diha sa imong komunidad ug makakita mismo sa kadaot ug kalaglagan—kini bug-os ug kaylap kaayo. Lisod dawaton ang maong panghitabo.

“Pananglitan, ang palibot nanimahong dunot nga patayng lawas. Daghang dapit sa negosyo nangadaot  gayod ug gilunopan. Nagkatag ang mga polis ug sundalo. Mora kinig natad panggubatan.”

Paghikay ug mga Hinabang

Naghikay ug mga hinabang ang mga awtoridad sa siyudad, estado, ug pederal nga gobyerno. Ang pangunang pederal nga ahensiya nga mitabang mao ang FEMA (Federal Emergency Management Agency). Ang ubang mga organisasyon milihok usab sa pagtabang sa libolibong biktima. Gihakot pinaagig trak ang daghang pagkaon, sinina, ug tubig ngadto sa gibahaan nga mga dapit. Wala magdugay, ang FEMA nanghatag ug mga tseke ug pinansiyal nga tabang aron ang mga tawo makasagubang sa unang pipila ka adlaw o semana. Sa kasamtangan, unsa may kahimtang sa mga Saksi ni Jehova?

Pagbanabana sa Kadaot ug Pagpang-ayo

Sa paghapak sa bagyo, ang mga Saksi nag-organisar ug mga tem nga maoy moadto sa naapektohang mga dapit ug motino kon unsa ka daghang balay sa mga Saksi ug mga Kingdom Hall ang nangaguba o nangadaot. Unsaon man nila paghimo kining dakong buluhaton? Giaprobahan sa Nagamandong Lawas sa mga Saksi ni Jehova, nga anaa sa Brooklyn, New York, ang pag-organisar ug mga komite sa paghatag ug hinabang ubos sa pagdumala sa Komite sa Sangang Buhatan sa Tinipong Bansa. Gidapit usab ang Rehiyonal nga mga Komite sa Pagpanukod gikan sa lainlaing bahin sa Tinipong Bansa aron sugdan ang pagpanukod pag-usab. a Unsay ilang nahimo?

Sa Pebrero 17, 2006, ang grupo gikan sa Long Beach, Mississippi, nga naghatag ug hinabang nagtaho nga sa 632 ka balay sa mga Saksi nga nangaguba sa ilang dapit, 531 ang bug-os nga nabag-o na, samtang 101 pa ang kinahanglang ayohon. Ang mga Saksi mitabang usab sa mga silingan nga dili Saksi. Ang atop sa 17 ka Kingdom Hall nadaot pag-ayo, ug sa tungatunga sa Pebrero, 16 niini ang nataoran ug bag-ong atop. Komosta ang komite sa Baton Rouge, Louisiana?

Giatiman niining grupoha ang dapit sa Louisiana, nga nakaagom ug labing dakong kadaot tungod sa Bagyong Katrina. Sa 2,700 ka balay sa mga Saksi didto nga kinahanglan ayohon, 1,119 ang natapos sa tungatunga sa Pebrero, busa aduna pay dakong buluhaton ang komite. Gitabangan usab ang mga silingan ug mga pamilya nga dakog panginahanglan. Singkuwenta ka Kingdom Hall ang nadaot pag-ayo. Sa pagka-Pebrero, 25 niini ang naayo na. Kinahanglang ayohon sa grupo gikan sa Houston ang 871 ka balay sa Texas, nga nadaot sa Bagyong Rita niadtong Septiyembre. Pagka-Pebrero 20, 830 na ang nahuman.

Mga Leksiyon Gikan sa Katrina

Ang libolibo nga nakasinati sa kabangis sa bagyong Katrina nakakat-on sa makapahinuklog nga leksiyon nga hinungdanon ang pagtagad sa mga pasidaan. Sa pagkatinuod, daghan ang mopatugbaw usab sa gibati ni Joe, nga gikutlo ganina, kinsa miingon: “Sa sunod higayon nga sila moingon nga “Pamakwet mo,” akoy unang mobakwet!”

Ang mga Saksi ni Jehova nagpadayon sa pagtabang sa mga biktima sa Gulf Coast. (Galacia 6:10) Apan, ang ilang ministeryo dili lamang lunlon paghatag ug mga hinabang. Sa kasukwahi, ang pangunang buluhaton sa mga Saksi ni Jehova—nga ginahimo sa 235 ka nasod sa tibuok kalibotan—mao ang paghatag ug pasidaan nga mas hinungdanon pa kay sa paghatag ug pasidaan bahin sa nagsingabot nga bagyo. Ang Bibliya nagtagna nga sa dili madugay taposon sa Diyos kining dili-diyosnong sistema sa mga butang, nga maghinlo sa atong yuta ug magpasig-uli sa kahimtang nga maoy iyang katuyoan alang niini. Kon gusto kang mahibalo kon unsay ginatudlo sa Bibliya mahitungod niining panahon sa paghukom, kontaka ang mga Saksi ni Jehova sa inyong dapit o pagsulat sa nahiangayng adres sa panid 5 niining magasina.—Marcos 13:10; 2 Timoteo 3:1-5; Pinadayag 14:6, 7; 16:14-16.

[Footnote]

[Hulagway sa panid 14, 15]

Hulagway sa mata sa Bagyong Katrina nga kuha sa satelayt

[Credit Line]

NOAA

[Hulagway sa panid 15]

Baha sa New Orleans

[Credit Line]

AP Photo/David J. Phillip

[Mga hulagway sa panid 15]

Tungod sa Bagyong Katrina ang mga tinukod naguba ug daghang kinabuhi ang nakalas

[Credit Line]

AP Photo/Ben Sklar

[Hulagway sa panid 16, 17]

Ang Astrodome sa Houston, Texas, gipuy-an sa mga 16,000 ka bakwet

[Mga hulagway sa panid 17]

Gipangita sa Kristohanong mga ansiyano ang mga Saksi taliwala sa mga bakwet

[Hulagway sa panid 18]

Ang mga boluntaryo nag-ayo sa nadaot pag-ayo nga atop

[Hulagway sa panid 18]

Ang mga Saksi mapasalamaton kaayo nga giayo ang ilang balay

[Hulagway sa panid 18]

Ang mga boluntaryo nagtagana ug pagkaon

[Hulagway sa panid 19]

Si Alan