Ang Hunahuna sa Bibliya

Usa ba ka Persona ang Balaang Espiritu?

UNSA ang balaang espiritu sa Diyos? Ang pasiunang mga pulong sa Bibliya naghisgot bahin sa balaang espiritu—gihubad usab nga “aktibong puwersa sa Diyos”—nga “naglihok ngadto-nganhi ibabaw sa nawong sa mga tubig.” (Genesis 1:2) Sa asoy bahin sa bawtismo ni Jesus, samtang ang Diyos gihubit nga anaa sa “mga langit,” ang balaang espiritu “mikunsad . . . ingon sa usa ka salampati” diha kang Jesus. (Mateo 3:16, 17) Dugang pa, si Jesus naghisgot sa balaang espiritu ingong usa ka “magtatabang.”—Juan 14:16.

Tungod niini ug sa uban pang mga teksto sa Bibliya, ang uban nakahinapos nga ang balaang espiritu maoy usa ka persona, sama usab nga ang Diyos, si Jesus, ug ang mga manulonda maoy indibiduwal nga espiritung mga persona. Gani, sulod sa daghang siglo ang pipila sa labing impluwensiyadong mga relihiyon sa Kakristiyanohan nagtuo nga ang balaang espiritu maoy usa ka persona. Bisag dugay nang gituohan kining doktrinaha, daghang membro sa simbahan ang naglibog, ug ang uban wala gani mouyon sa mga lider sa ilang relihiyon. Pananglitan, sumala sa di pa dugayng surbi, 61 porsiyento niadtong giinterbiyo nagtuo nga ang espiritu sa Diyos maoy “simbolo sa presensiya o gahom sa Diyos apan kini dili persona.” Apan, unsay giingon sa Bibliya?

Kon Unsay Giingon sa Bibliya

Ang usa ka matinud-anong magbabasa sa Bibliya makahinapos gayod nga ang balaang espiritu lahi kay sa opisyal nga paghulagway niini sa simbahan ingong usa ka persona. Tagda ang mosunod nga mga asoy sa Bibliya.

1. Sa dihang si Maria, nga inahan ni Jesus, miduaw sa iyang ig-agaw nga si Elisabet, ang Bibliya nag-ingon nga miulpot ang bata diha sa tagoangkan ni Elisabet, “ug si Elisabet napuno sa balaang espiritu.” (Lucas 1:41) Makataronganon bang isipon nga ang usa ka persona ‘mapuno’ sa laing persona?

2. Sa dihang si Juan Bawtista nakigsulti sa iyang mga tinun-an bahin kang Jesus ingong ang usa nga mopuli kaniya, si Juan miingon: “Ako, sa akong bahin, nagbawtismo kaninyo sa tubig . . . , apan ang usa nga moanhi sunod kanako mas kusgan kay kanako, kansang mga sandalyas ako dili angayan sa paghubo. Kana siya magbawtismo kaninyo sa balaang espiritu.” (Mateo 3:11) Si Juan wala gayod magtumong sa balaang espiritu ingong usa ka persona sa dihang siya naghisgot bahin sa pagbawtismo sa mga tawo pinaagi niini.

3. Sa dihang miduaw sa opisyal sa kasundalohan sa Roma ug sa iyang panimalay, si apostol Pedro naghisgot kang Jesus nga gidihogan sa Diyos “ug balaang espiritu ug gahom.” (Buhat 10:38) Wala magdugay human niadto, “ang balaang espiritu mikunsad diha sa” panimalay sa opisyal sa kasundalohan. Ang asoy nag-ingon nga daghan ang nahibulong “tungod kay ang walay bayad nga gasa sa balaang espiritu gibubo man usab nganha sa katawhan sa kanasoran.” (Buhat 10:44, 45) Sa makausa pa, ang mga terminong gigamit sukwahi sa ideya nga ang balaang espiritu maoy usa ka persona.

Ang Pulong sa Diyos subsob nga nagpersonipikar sa mga butang. Lakip niini ang kaalam, katakos sa pag-ila, sala, kamatayon, ug dili-takos nga kalulot. (Proverbio 8:1–9:6; Roma 5:14, 17, 21; 6:12) Si Jesus mismo nag-ingon nga “ang kaalam mapamatud-ang matarong pinaagi sa tanang anak niini,” o sa maayong mga resulta niini. (Lucas  7:35) Tin-aw nga ang kaalam dili usa ka persona nga may literal nga mga anak! Sa susama, ang balaang espiritu dili usa ka persona bisan tuod gipersonipikar kini sa pipila ka higayon.

Unsa ang Balaang Espiritu?

Sa Bibliya, ang balaang espiritu sa Diyos gipaila ingong nagalihok nga puwersa sa Diyos. Busa, ang tukmang hubad sa Hebreohanong teksto sa Bibliya naghisgot sa espiritu sa Diyos ingong “aktibong puwersa sa Diyos.” (Genesis 1:2) Kining maong ideya gipaluyohan gayod sa tibuok Bibliya.—Miqueas 3:8; Lucas 1:35; Buhat 10:38.

Sukwahi sa gituohan sa kadaghanan, ang Diyos dili presente sa tanang dapit sa tanang higayon. Hinunoa, siya nagpuyo sa espirituhanong dapit, diha sa “pihong dapit nga puloy-anan.” (1 Hari 8:39; 2 Cronicas 6:39) Ang Kasulatan naghisgot usab ug espesipikong dapit diin ang Diyos nagpuyo ug diin nahimutang ang iyang “trono.” (1 Hari 22:19; Isaias 6:1; Daniel 7:9; Pinadayag 4:1-3) Apan, gikan sa iyang “pihong dapit nga puloy-anan,” iyang magamit ang iyang aktibong puwersa aron maabot ang tanang suok sa espirituhanon ug pisikal nga dapit.—Salmo 139:7.

Niadtong 1879, ang eskolar sa Bibliya nga si Charles L. Ives tukmang nag-ilustrar sa katakos sa Diyos sa pagpasundayag sa iyang gahom gikan sa usa ka tinong dapit. Siya misulat: “Pananglitan, kita moingon, ‘Ablihi nang bentana aron makasulod ang adlaw.’ Dili ang literal nga adlaw ang atong gipasabot kondili ang kahayag nga gikan sa adlaw.” Sa susama, ang Diyos dili na kinahanglang moadto pa sa mga dapit diin buot niyang gamiton ang iyang aktibong puwersa. Iyang gamiton ang iyang balaang espiritu, nga makaabot sa tanang kalalangan. Ang pagsabot kon unsa gayod ang balaang espiritu—gamhanan nga aktibong puwersa sa Diyos—makahatag kanimog pagsalig nga tumanon ni Jehova ang iyang mga saad.

NAHIBULONG KA BA?

◼ Ang Bibliya ba nagtudlo nga ang balaang espiritu usa ka persona?—Buhat 10:44, 45.

◼ Unsa ang balaang espiritu?—Genesis 1:2.

◼ Asa makaabot ang balaang espiritu sa Diyos?—Salmo 139:7.