Ang Kinalisdang Pangutana

“NGANO?” Makapasubo kaayong makita kon unsa ka grabeng kaguol o kasakit ang gipahayag nianang yanong pulong. Mao kanay subsob nga ipangutana sa mga tawo human sa katalagman o trahedya: Gilampornas sa bagyo ang usa ka dapit, nga miresulta sa kamatayon ug kagun-oban. Gigun-ob sa linog ang usa ka siyudad. Ang malinawon, ordinaryong adlaw nahimong usa ka adlaw sa kalisang ug kapintasan tungod sa pag-atake sa mga terorista. O nadaot ang panglawas o nakalas ang kinabuhi sa usa ka minahal tungod sa usa ka aksidente.

Ikasubo nga kasagarang maapil sa mga biktima ang labing inosente ug ang dili makapanalipod sa kaugalingon diha sa atong taliwala. Ning bag-o pa, daghan ang sama niana nga mga katalagman, nga nag-aghat sa daghang tawo sa pagtuaw ngadto sa Diyos, “Ngano?” Tagda ang pipila ka pananglitan:

◼ “Diyos ko, nganong gibuhat man nimo kini kanamo? Unsa may among nabuhat nga nakapasuko kanimo?” Ang Reuters nga ahensiya sa balita nagtaho nga usa ka tigulang nga babaye sa India ang misukna nianang mga pangutanaha human sa tsunami nga mihapay sa iyang balangay.

◼ “Diin man ang Diyos? Ug kon bug-os nga kontrolado sa Diyos ang mga butang, nganong gitugotan man niya nga mahitabo kini?” Kining mga pangutanaha gipatungha sa usa ka mantalaan sa Texas, T.B.A., human nga ang usa ka lalaki namusil diha sa sulod sa simbahan, nga nakaangol ug nakapatay ug daghang maninimba.

◼ “Nganong gitugotan man sa Diyos nga mamatay siya?” Usa ka babaye ang misukna niini human mamatay ang iyang higalang babaye sa kanser, nga tungod niana ang bana sa namatay mao na lay mag-atiman sa ilang lima ka anak.

Dili kay kini rang mga tawhana ang naghunahuna nga ang Diyos sa usa ka bahin maoy hinungdan sa ilang mga problema. Pananglitan, mahitungod sa kinaiyanhong mga katalagman, duolan sa katunga sa miapil sa usa ka bag-ong surbi nga gihimo pinaagi sa Internet ang mibati nga ang mga katalagman sama sa bagyo naggikan sa Diyos. Nganong daghan man kaayo ang mibatig sama niana?

Relihiyosong Kalibog

Inay mohatag ug makapatagbawng mga tubag, ang mga lider sa relihiyon subsob nga nakadugang sa maong kalibog. Hisgotan nato ang tulo lamang sa ilang kasagarang mga tubag.

Una, daghang relihiyosong mga lider ang nagwali nga ang Diyos nagpahinabog mga katalagman aron silotan ang mga tawong nahisalaag. Pananglitan, sa Tinipong Bansa, human mahapay ang New Orleans, Louisiana, sa Bagyong Katrina, ang pipila ka ministro nag-ingon nga gisilotan sa Diyos ang siyudad. Ilang gipunting ang pagkakaylap sa korapsiyon, pagsugal, ug imoralidad. Ang uban naghisgot pa gani sa Bibliya ingong ebidensiya, nga nagpunting sa mga higayon sa dihang gilaglag sa Diyos ang mga daotan pinaagi sa lunop o kalayo. Apan, ang maong mga pangangkon nagtuis sa Bibliya.—Tan-awa ang kahong “Pagbuot ba sa Diyos?”

Ikaduha, ang pipila ka klerigo nag-ingon nga ang Diyos may mga katarongan sa pagpahinabo sa mga kalamidad nganha sa mga tawo apan kining maong mga katarongan dili nato matugkad. Daghang tawo ang naghunahuna nga kanang ideyaha dili makapatagbaw. Sila mangutana, ‘Mahimo ba gayod sa usa ka mahigugmaong Diyos ang maong kadaot ug unya dili lamdagan kadtong kinsa nangandoy ug kahupayan ug nangaliyupong nangutana, “Ngano?”’ Sa pagkatinuod, ang Bibliya nag-ingon: “Ang Diyos gugma.”—1 Juan 4:8.

Ikatulo, gibati sa ubang relihiyosong mga lider nga tingali ang Diyos dili gayod gamhanan sa tanan ug dili mahigugmaon. Sa makausa pa, ang maong katin-awan magpatungha ug hinungdanong  mga pangutana. Ang Usa ba nga ‘naglalang sa tanang butang’—lakip ang dili matugkad nga halapad kaayong uniberso—dili makasanta sa pag-antos dinhi sa yuta? (Pinadayag 4:11) Dili ba diay maluoy sa pag-antos sa tawo ang Usa nga naghatag kanato sa kapasidad nga mahigugma, kansang Pulong naghubit kaniya ingong larawan sa gugma?—Genesis 1:27; 1 Juan 4:8.

Siyempre, ang tulo ka punto nga bag-o pang gihisgotan maoy pipila lamang sa mga paagi diin ang mga tawo naningkamot sa pagpatin-aw kon nganong gitugotan sa Diyos ang pag-antos—usa ka pangutana nga nakapalibog sa naghunahunang mga tawo sulod sa kasiglohan. Sa sunod nga artikulo, atong hisgotan kon unsay gitudlo sa Bibliya bahin niining hinungdanon ug nunot-sa-panahon nga ulohan. Sa imo unyang makita, ang kasaligan, lohikal nga katin-awan sa Bibliya magwagtang sa kalibog. Dugang pa, ang Bibliya naghatag ug dakong kahupayan sa tanan nga nag-antos ug mga trahedya sa kinabuhi.

[Kahon/Hulagway sa panid 4]

Pagbuot ba sa Diyos?

Gitudlo ba sa Bibliya nga ang Diyos maoy nagpahinabo sa kinaiyanhong mga katalagman nga atong makita karon? Wala gayod! Ang mga paghukom sa Diyos ingon sa gihubit diha sa Bibliya lahi kaayo sa kinaiyanhong mga katalagman. Pananglitan, ang Diyos mapilion; siya makabasa sa mga kasingkasing sa mga tawo ug maglaglag lamang niadtong iyang gihukman nga daotan. (Genesis 18:23-32) Dugang pa, ang Diyos maghatag una ug mga pasidaan, busa ang mga matarong mahatagan ug kahigayonan nga makaikyas.

Ang kinaiyanhong mga katalagman, sa laing bahin, mahitabo nga diyutay ra o walay pasidaan, ug kini mopatay ug makapabaldado ni bisan kinsa. Sa usa ka sukod, gipasamot sa mga tawo ang maong mga katalagman pinaagi sa pagdaot sa kinaiyanhong palibot ug pinaagi sa pagtukod ug mga balay diha sa mga dapit diin kanunayng mahitabo ang linog, lunop, ug dili-maayong klima.

[Credit Line]

SENA VIDANAGAMA/AFP/Getty Images

[Hulagway sa panid 4]

Ang mga lider sa relihiyon naghatag ug nagkadaiyang makapalibog nga mga tubag