Mga Batan-on nga Nag-Internet!

Handurawa ang imong anak nga nag-inusarang naglakaw-lakaw diha sa kadalanan nga gabiing dako.

Handurawa ang imong tin-edyer nga nagparti sa inyong balay nga wala kay kalibotan.

Handurawa ang imong anak nga lalaki o babaye nga nagpaduplikar ug mga yawi sa inyong balay ug nanghatag niini ngadto sa mga tawong dili ninyo kaila.

KON ang imong anak naggamit sa Internet, posibleng mahitabo usab kaniya ang mga kapeligrohang gihisgotan sa ibabaw. “Sa Internet, dunay daghan ug nagkalainlaing kahigayonan sa paghimamat sa uban, sama sa mga message board, instant messaging, ug sa gitawag nga mga social networking site,” matod sa magasing Science News.

Ang mga batan-on nakakat-on dayon sa paggamit sa Internet. Gani, sa 2004 halos 9 sa matag 10 ka tawo sa Tinipong Bansa nga nag-edad ug 12 ngadto sa 17 anyos ang naggamit ug Internet, diin halos aduna niini ang tanang suok sa kalibotan.

Halos ang tanan mouyon nga mapuslanon ang Internet. Apan ang tanan angayng mahibalo nga kini peligroso usab. Pananglitan, daghang batan-on nag-Internet nga walay nagbantay, nga kaamgid sa kahimtang diin sila nag-inusara sa paglakaw-lakaw diha sa kadalanan, ug ang uban nakig-estorya diha sa Internet sa mga tawong kuwestiyonable nga sa tinuod nga kahimtang ikaw—ug bisan ang imong anak—dili gayod modapit kanila sa pagsulod sa inyong balay.

Ang ubang wala pa kaayoy buot nga mga batan-on nagpaskin ug personal nga mga impormasyon, opinyon, ug mga hulagway diha sa Internet nga dili unta angay ibutang. Sumala pa kang Propesor Zheng Yan sa State University sa New York, ang mga batan-on “walay ideya nga daghan kaayong tawo ang makabasa sa maong impormasyon, apil na ang mga tawong mahilayon ug katuyoan.”

Atong susihon kon unsay ginahimo sa daghang batan-on diha sa Internet. Makatabang kini kanato sa pagkakita sa problema nga posibleng motungha, sa pagkahibalo kon unsa gayoy gipangita sa atong mga anak, ug sa pagsabot kon sa unsang paagi atong matagbaw ang ilang tinuod nga mga panginahanglan. Makatabang usab kini sa Kristohanong mga batan-on sa pagsagubang sa mga babag sa pagpabiling matinumanon ngadto sa Diyos niining malisod nga mga panahon.—2 Timoteo 3:1-5.