Pagpaniid sa Kalibotan

◼ Mga 5 porsiyento sa aberids nga bayranang koryente sa usa ka panimalay sa Canada naggikan sa koryente nga makonsumo sa elektrikal nga mga kagamitan nga wala paandara apan nakakonektar sa koryente.—NATIONAL POST, CANADA.

◼ Ang resulta sa usa ka surbi nagpakita nga ang mga Ruso nagtuo nga ang pipila sa labing hinungdanong mga isyu nga angayng sulbaron sa gobyerno mao ang “korapsiyon” ug “kusog nga pagtaas sa presyo sa mga palaliton.”—PRAVDA, RUSYA.

◼ Sumala sa usa ka surbi, mga 26.4 porsiyento sa mga batang grade five o grade six sa Taiwan “nakahunahuna na nga maghikog.”—THE CHINA POST, TAIWAN.

◼ “Bisan tuod nakatabang ang teknolohiya nga makunhoran ug 38% ang aberids nga gitas-on sa semana sa pagtrabaho sa U.S. sulod sa usa ka siglo, ang mga empleyado wala nay panahon sa paglingawlingaw tungod sa mas dugayng pagbiyahe paingon sa trabahoan, pagkuhag dugang edukasyon sa mga adulto ug mas daghang trabaho sa balay.”—FORBES, TINIPONG BANSA.

◼ Ang pagbuga ug mga gas nga makapainit sa atmospera sa industriyalisadong mga nasod misaka ug 1.6 porsiyento niadtong mga 2003 ug 2004, nga mao “ang kinatas-ang sukod sulod sa kapin sa napulo ka tuig.”—REUTERS, OSLO, NORWAY.

Krisis sa Tubig sa Tsina

Ang Tsina naproblema tungod sa “hugawng tubig ug kakulang ug hinlong tubig.” Kadaghanang siyudad dunay mga planta sa pagproseso ug paghinlo sa inawas nga tubig, apan daghan niini wala na paandara tungod sa kakulang ug pondo. “Kadaghanan sa mga suba, lanaw ug mga kanal sa maong nasod nahugawan tungod sa wala maproseso nga inawas nga tubig gikan sa mga pabrika ug kabalayan ug sa inagos gikan sa mga uma nga kargadog pangpatay sa peste,” nagtaho ang The Wall Street Journal. Dugang pa, “halos 300 milyones ka tawo walay mainom nga hinlong tubig.” Ang Journal nag-ingon nga ang kahimtang “makaguol” ug kini nagkagrabe.

“Saksi ni Jehova Mo?”

Sa miaging tuig, sa baybayon sa Isla sa Elba sa Italya, ang mga turista giduol ug mga batan-ong Katoliko nga misanong sa pag-awhag sa obispo sa Massa Marittima-Piombino. Iyang giingnan ang mga batan-on nga kon buot nila nga mahimo ug magpabilin nga mga Kristohanon, kinahanglang ilang isangyaw ang ilang pagtuo. Nakapakurat kini sa mga bakasyonista. Sumala sa mantalaang Il Tempo, ang kasagaran gayod nga isulti ngadto sa mga batan-on mao, “Saksi ni Jehova mo?”

Musika Nakaapektar sa Seksuwal nga Paggawi

Ang mga tin-edyer nga mamati ug awit nga dunay “malaw-ay nga mga pulong bahin sa sekso” dakog purohan nga sayong magsugod sa pagpakigsekso kay niadtong gustog ubang awit,” matod sa usa ka panukiduki nga gibalita sa Associated Press. “Ang mga kanta nga naghulagway sa mga lalaki ingong mahilayon ug mahiligon sa sekso, naghulagway sa mga babaye ingong mga galamiton alang sa seksuwal nga katagbawan ug may detalyadong mga pulong bahin sa pagpakigsekso dakog posibilidad nga makaaghat sa mga batan-on nga sayong magsugod sa pagpakigsekso kay sa mga awit nga dili direktang naghisgot ug sekso ug medyo nagpasiugda ug lig-ong relasyon,” matod pa sa balita. Kini nag-ingon nga “ang mga ginikanan, magtutudlo ug mga tin-edyer mismo kinahanglang magbantay gayod bahin sa mga mensahe sa mga awit.”

Usikan nga mga Mamamalit

Niadtong 2004, ang mga Australiano naglabay ug sobrang mga pagkaon nga balor ug 5.3 bilyones ($4.1 bilyones, U.S.), nagtaho ang The Australia Institute, usa ka organisasyon nga nagdumala ug panukiduki. Kini maoy kapin ug 13 ka pilo sa kantidad sa hinabang nga gihatag sa mga Australiano sa ubang nasod niadtong 2003. Ang katibuk-ang kantidad nga mausik diha sa mga pinalit ug mga serbisyo nga talagsa lang o dili gayod magamit sa mga Australiano mokabat ug kapin sa 10.5 bilyones ($8.1 bilyones, U.S.) matag tuig—labaw pa sa magasto sa maong nasod alang sa mga unibersidad ug mga karsada.