Sa Among mga Magbabasa

Mga Batan-on Nangutana . . . Duna ba Akoy Abnormalidad sa Pagkaon? (Oktubre 2006) Human mabasa kining artikuloha, ako naguol. Ako nakigbisog sa abnormalidad sa pagkaon sa tibuok kong kinabuhi. Kining artikuloha nagpabati kanako nga angay untang “gisulbad” ko na kini nga abnormalidad sa bata pa ako. Apan, hangtod karon ako nag-antos gihapon niini, ug ako karon mibati nga dili gayod nako kini mabuntog. Kining artikuloha morag nag-ingon nga mabuntog nako kini nga abnormalidad pinaagi sa pagbaton ug lig-ong pagtuo.

J. J., Tinipong Bansa

Ang “Pagmata!” nagtubag: Bisan tuod ang mga ulohan nga gihisgotan diha sa serye sa “Mga Batan-on Nangutana . . .” gituyo sa pagpatik alang sa mga batan-on, ang mga prinsipyo sa Bibliya nga anaa niining mga artikuloha mapadapat sa tanang tawo nga lainlain ug pangedaron. Kami nasayod nga ang abnormalidad sa pagkaon maoy usa sa labing lisod buntogon nga suliran. Ang artikulo wala mag-ingon nga kadtong nakigbisog sa maong abnormalidad kulang ug pagtuo. Kini nagsugyot lamang nga ang mga nagsagubang niini makaampo kang Jehova alang sa tabang sa pagbuntog sa abnormalidad sa pagkaon. Gawas pa sa pag-ampo sa Diyos, ang mga nag-antos niini gidasig sa pagpangayog tabang gikan sa “usa ka ginikanan o laing hamtong” nga tawo. Dugang pa, ang artikulo prangkang nag-ingon nga ang usa “dili daling maulian” ug ang suliran mahimong mobalik. Ang imong pagpakigbisog sulod sa daghang katuigan hangtod karon nagpasabot nga ikaw wala mawad-ig paglaom.

Mga Batan-on Nangutana . . . Unsay Angay Nakong Himoon sa Akong Kinabuhi? (Hulyo 2006) Hapit na akong mograduwar sa pag-eskuyla, ug panahon na nga ako magplano kon unsay angay nakong himoon sa akong kinabuhi. Kining artikuloha nakatabang kanako nga mahimong mas determinado sa pagpangagpas sa bug-os-panahong ministeryo. Walay laing buluhaton nga mas maayo ug mas makapalipay kanako.

H. W., Hong Kong

Mapasalamaton kaayo ako niining artikuloha tungod kay kini nakatabang kanako sa pagkaamgo nga niining materyalistikong kalibotan, ang labing maayong butang nga mahimo sa mga batan-on nga sama nako mao ang pag-una sa espirituwal nga mga tumong.

A. S., Brazil

Sa akong puliking kinabuhi adlaw-adlaw, kanunay nakong makalimtan ang akong mga tumong. Sa nabasa nako kining artikuloha, nabuhi pag-usab ang akong determinasyon nga buhaton ang tanan nga akong maarangan sa pag-alagad kang Jehova. Daghan kaayong salamat sa pag-atiman kanamong mga batan-on.

E. M., Japan

Kon Unsaon Pagtukod ug Usa ka Malipayong Kaminyoon (Hulyo 2006) Maayo gayong pagkasulat kining mga artikuloha. Ang paggamit kang Jesus ug sa iyang tinagdan sa iyang mga apostoles ingong panig-ingnan kon unsaon pagtratar sa magtiayon ang usag usa mao gayod ang kinamaayohang pananglitan. Ipadayon ang pagpatik ug matulon-anong mga magasin nga sama niini. Kami mahinamong magpaabot sa among mga magasin kada bulan.

S. C., Tinipong Bansa

Kawalay-Paglaom nga Nailisan ug Kalipay (Hulyo 2006) Sama kang Brader González, ako nagsagubang usab sa pagbati nga kulang ug katakos. Ako nangatarongan, ‘Imposibleng higugmaon ako ni Jehova, ilabina kay ako tuman ka makasasala kanhi.’ Makapadasig kaayo ang pagkahibalo nga si Jehova mapuangoron, mapinasayloon, ug mahigugmaon gayod! Pinaagi sa daghang tambag, mahigugmaong pagpaluyo sa kongregasyon, ug sa balaang espiritu ni Jehova, ako natabangan sa pagpadapat sa kamatuoran sa Bibliya sa akong kinabuhi. Salamat niining nunot-sa-panahong espirituwal nga pagkaon.

T. A., Tinipong Bansa