Ang Honi sa “Siyudad nga Way Paglubad”

TINAMPO SA MAGSUSULAT SA PAGMATA! SA ITALYA

Ang talan-awon ug honi sa daghang busay-busay, o fountain, sa Roma nakainspirar sa Italyanong tigkomposo ug musika nga si Ottorino Respighi sa pagkomposog musika nga nag-ulohan ug “The Fountains of Rome.” Atong tan-awon ang usa sa kinanindotan niini​—ang Trevi Fountain.

Atong subayon ang gagmayng mga karsada paingon sa busay-busay, dayon moliko ta sa eskina, ug ang nindot kaayong talan-awon mosugat kanato. Kini ang dako kaayong Trevi Fountain, nga 20 metros ang gilapdon ug 26 metros ang gihabogon, nga halos nakalukop sa gamayng plasa. Pagkanindot kaayo niini nga tagoon lang sa usa ka gamayng lugar!

Ang Trevi Fountain gipatukod ni Papa Clemente XII ug gidisenyo sa Italyanong arkitekto nga si Niccolò Salvi. Gisugdan kini pagtukod sa 1732 ug nahuman sa 1762. Ang tuboran sa busay-busay naggikan sa Aqua Virgo nga tulotaytayan sa tubig nga gitukod sa unang siglo W.K.P., nga 13 kilometros gikan sa siyudad.

Dagat ang tema sa busay-busay, nga nagtindog atubangan sa palasyo. Ang estatwa ni Oceanus (o gitawag sa uban nga Neptune), nga usa ka karakter sa sugilanon, magarbohong nagtindog sa iyang pormag kinhason nga karo, nga nagpugong sa tubig nga nagdagayday sa iyang tiilan. Ang tubig nga nagbuhagay palibot sa ubang mga estatwa ug nagbusagak sa mga bato diha sa ubos morag mga balod pamation nga naglapya-lapya sa baybayon. Ang lanaw-lanaw niini nakakaon ug dakong lugar sa plasa nga daw ang tibuok plasa bahin sa busay-busay.

Daghan kaayong bisita ang modugok adlaw-adlaw niining gamayng plasa ug moitsag mga sensilyo sa usa sa labing popular nga mga talan-awon sa mga turista sa Roma. Kas-a sa usa ka semana, ang busay-busay pahubsan. Ang kuwarta nga gipang-itsa sa mga turista, nga mokabat ug mga $11,000 sa usa ka semana, kuhaon ug ihatag ngadto sa relihiyosong institusyon nga nanghatag ug hinabang.

Kon tinuod man nga nagaawit ang mga busay-busay sa honi sa siyudad, sumala sa gituohan ni Respighi, nan ang Trevi Fountain mao ang solowista​—ang kinanindotan sa tanang busay-busay nga nakabihag sa daghang turista sa Roma, ang ginaingong Siyudad nga Way Paglubad.