Mga Katarongan Kon Nganong Kasaligan ang Bibliya
4. Tukma Kon Bahin sa Siyensiya
Ang siyensiya daghan na kaayog nahimo karon. Busa ang daang mga teoriya kaniadto napulihan na ug bag-ong mga teoriya. Ang gilantaw kaniadto nga tinuod giisip na lang karon nga sugilanon. Ang mga libro sa siyensiya sagad nga ginausab.
ANG Bibliya dili usa ka basahon sa siyensiya. Apan kon bahin na sa siyensiya ang hisgotan, ang Bibliya talagsaon dili lamang sa kon unsay gipadayag niini kondili sa kon unsay wala ipadayag niini.
Nahiuyon sa siyensiya nga panglantaw.
Sa karaang panahon ang mga tawo motuo dayon ug sayop nga mga opinyon. Ang pipila naghunahuna nga plat ang yuta ug ang uban nagtuo nga dunay nagsangga niini. Sa wala pa makadiskobre ang siyensiya kon sa unsang paagi motakod ug mapugngan ang sakit, ang mga doktor migamit ug mga pamaagi sa pagpanambal nga dili epektibo, o gani makapatay. Apan wala gayoy mabasa diha sa kapin sa 1,100 ka kapitulo sa Bibliya nga nagduso kini ug bisan unsang panglantaw nga wala mahiuyon sa siyensiya o pamaagi sa pagpanambal nga makadaot.
Nahiuyon sa siyensiya nga mga pahayag.
Duolan sa 3,500 ka tuig kanhi, ang Bibliya nag-ingon nga ang yuta nagbitay “sa wala.” (Job 26:7) Sa ikawalong siglo W.K.P., si Isaias klarong nag-ingon nga ‘lingin ang yuta.’ (Isaias 40:22) Usa ka lingin nga yuta nga nagbitay sa kawanangan—dili ba kini nga paghubit nahiuyon gayod sa modernong siyensiya?
Gisulat sa mga 1500 W.K.P., ang Moisesnong Balaod (nga makita diha sa unang lima ka basahon sa Bibliya) naghisgot na ug nahiangayng mga balaod bahin sa pagkuwarentinas sa masakiton, pagdispatsar sa mga hugaw, ug kon unsay himoon dihang makahikap ug patayng lawas.—Levitico 13:1-5; Numeros 19:1-13; Deuteronomio 23:13, 14.
Pinaagi sa paggamit ug dagkong mga teleskopyo sa pag-aninaw sa kabituonan, ang mga siyentipiko nakaingon nga ang uniberso kalit nga “nahimugso.” Ang ubang mga siyentipiko wala mouyon niini nga eksplinasyon. Usa ka propesor miingon: “Dili mahitabong motungha lang ang uniberso nga walay nagpahinabo; kay puwede ba diayng motungha ang uniberso kon walay nagpahinabo?” Apan sa wala pa maimbento ang mga teleskopyo, ang unang bersikulo mismo sa Bibliya tin-awng nag-ingon: “Sa sinugdan gilalang sa Diyos ang mga langit ug ang yuta.”—Genesis 1:1.
Bisan tuod ang Bibliya karaan na ug naghisgot ug daghang butang, ang mga panglantaw ug pahayag niini nahiuyon sa siyensiya. Dili ba angay gayod natong susihon kini? *
^ par. 9 Alang sa uban pang mga pananglitan sa pagkatukma sa Bibliya maylabot sa siyensiya, tan-awa ang mga panid 18-21 sa brosyur nga Usa ka Basahon Alang sa Tanang Tawo, nga gipatik sa mga Saksi ni Jehova.