Ang Hunahuna sa Bibliya

Nganong Magmahunahunaon Kita sa Kalikopan?

MAS dako karon ang kadaot nga nahimo sa tawo diha sa atong yuta. Sanglit nagkagrabe ang mga problema sama sa pag-init sa planeta, ang mga siyentipiko, gobyerno, ug industriya naghimog dugang paningkamot sa pagsulbad niini.

May responsibilidad ba ang matag usa kanato nga magmahunahunaon sa kalikopan? Kon duna, diin kutob ang atong responsibilidad? Gipakita diha sa Bibliya ang maayong mga katarongan kon nganong angay kitang molihok sa paagi nga dili makadaot sa yuta. Makatabang usab kanato ang Bibliya sa pagkahimong timbang sa atong paningkamot sa pag-atiman sa kalikopan.

Pagkinabuhi Uyon sa Katuyoan sa Atong Maglalalang

Ang yuta gilalang ni Jehova nga Diyos nga samag hardin aron puy-an sa tawo. Siya nag-ingon nga ang tanan niyang nahimo “maayo kaayo” ug siya nagsugo sa tawo “sa pagtikad [sa yuta] ug sa pag-atiman niini.” (Genesis 1:28, 31; 2:15) Unsay pagbati sa Diyos bahin sa kahimtang sa yuta karon? Seguradong wala siya malipay sa dili maayong paagi sa tawo sa pagdumala niini tungod kay ang Pinadayag 11:18 nagtagna nga iyang ‘laglagon ang mga nagalaglag sa yuta.’ Busa angay gayod nga magpakabana kita sa nagakahitabo sa yuta.

Ang Bibliya nagpasalig kanato nga ang tanang kadaot nga gipahinabo sa tawo pagaayohon sa dihang ‘bag-ohon [sa Diyos] ang tanang butang.’ (Pinadayag 21:5) Apan, dili kita angayng moingon nga kay bag-ohon man sa Diyos ang yuta sa gitakdang panahon, wala ray kaso bisag unsa pay atong buhaton karon. Dili gayod mahimong way kaso kini! Sa unsang paagi atong ikapasundayag nga ang atong panglantaw sa atong planeta sama usab sa panglantaw sa Diyos ug nga kita nagkinabuhi uyon sa iyang pagbuot nga kini himoong paraiso?

 Himoon Nato ang Atong Maarangan Aron Magpabiling Hinlo ang Yuta

Ang normal nga pagkinabuhi sa tawo makapatungha gayod ug basura. Si Jehova maalamong nagdisenyo sa kinaiyanhong mga siklo sa yuta aron sa pagproseso sa maong basura, nga makahinlo sa hangin, tubig, ug yuta. (Proverbio 3:19) Ang atong pagkinabuhi kinahanglang nahiuyon niana nga mga proseso. Busa kinahanglang mag-amping kita nga dili kita makapasamot sa mga problema sa kalikopan. Ang maong pagkamahunahunaon nagpakita nga atong gihigugma ang atong isigkatawo sama sa atong kaugalingon. (Marcos 12:31) Tagda ang usa ka makaiikag nga pananglitan sa kapanahonan sa Bibliya.

Gisugo sa Diyos ang nasod sa Israel nga magkalot sila “sa gawas sa kampo” sa dihang malibang. (Deuteronomio 23:12, 13) Busa hinlo ang kampo ug ang hugaw daling madugta kay nalubong man. Sa susamang paagi, maningkamot gayod ang tinuod nga mga Kristohanon sa paglabay sa basura dihadiha ug sa hustong paagi. Kinahanglang mag-amping gayod kon maglabay ug makahilong basura.

Daghang basura ang pwede pang gamiton pag-usab o iresiklo. Kon ang pagresiklo gihimong balaod sa lokal nga pamunoan, nan ang pagtuman niining mga balaora maoy bahin sa paghatag ‘kang Cesar sa mga butang ni Cesar.’ (Mateo 22:21) Tingali budlay ang pagresiklo, apan pagpasundayag kini nga kita gusto ug hinlo nga yuta.

Ayaw Usiki ang mga Kahinguhaan sa Yuta

Aron katagan-an ang atong mga panginahanglan alang sa pagkaon, puy-anan, ug enerhiya ug sa ingon magpadayong buhi, dili kalikayan nga mogamit gayod kita ug mga kahinguhaan sa kinaiyahan. Ang atong paagi sa paggamit niini nga mga kahinguhaan nagpadayag kon giila ba nato kini ingong mga gasa gikan sa Diyos. Sa dihang ang mga Israelinhon gihidlaw ug karne diha sa kamingawan, gihatagan sila ni Jehova ug daghan kaayong buntog. Tungod sa ilang kadalo ilang giabusohan ang maong gasa, nga nakapasuko pag-ayo kang Jehova nga Diyos. (Numeros 11:31-33) Hangtod karon wala mausab ang panglantaw sa Diyos bahin sa kadalo. Busa, ang mahunahunaong mga Kristohanon dili mag-usik-usik, nga mahimong ilhanan sa kadalo.

Tingali ang uban maghunahuna nga kon sila magpatuyang sa paggamit ug koryente o ubang kahinguhaan, nagtuo sila nga ila kanang katungod. Apan ang mga kahinguhaan sa kinaiyahan dili angayng usik-usikan tungod lang kay kita makaarang sa pagbayad niini o kaha tungod kay abunda kini. Human mapakaon ni Jesus sa milagrosong paagi ang dakong panon sa mga tawo, siya misugo sa pagtigom sa nahibiling mga isda ug tinapay. (Juan 6:12) Nag-amping siya nga dili mausik ang gihatag sa iyang Amahan.

Magmatimbang sa Atong mga Paningkamot

Matag adlaw mohimo kitag mga desisyon nga makaapektar sa kalikopan. Kinahanglan bang mohimo kita ug wala sa lugar nga lakang sama sa pagpalayo gikan sa sibilisasyon aron dili kita makadaot sa yuta? Wala kitay mabasa diha sa Bibliya nga nagsugyot niana. Tagda ang panig-ingnan ni Jesus. Samtang dinhi siya sa yuta, normal ang iyang paagi sa pagkinabuhi, nga tungod niini iyang natuman ang buluhatong pagsangyaw nga gisugo sa Diyos kaniya. (Lucas 4:43) Dugang pa, si Jesus midumili sa pag-apil-apil sa politika ingong paagi sa pagsulbad sa mga problema sa katilingban sa iyang panahon. Siya klarong miingon: “Ang akong gingharian dili bahin niining kalibotana.”​—Juan 18:36.

Apan, angay kitang maghunahuna sa epekto diha sa kalikopan sa mga butang nga atong paliton, sa atong paggamit ug transportasyon, ug sa atong paglingaw-lingaw. Pananglitan, ang uban mopalit ug mga produkto nga gigama o gamiton sa paagi nga dili kaayo makadaot sa kalikopan. Ang uban naningkamot sa paglimite sa ilang mga kalihokan nga moresultag polusyon o makausik sa mga kahinguhaan sa kinaiyahan.

Dili angayng ipugos sa usa ka tawo ngadto sa uban kon unsay iyang mga desisyon maylabot sa kalikopan. Ang personal ug lokal nga mga kahimtang nagkalainlain. Bisan pa niana, ang matag usa kanato manubag sa atong mga desisyon. Sumala pa sa giingon sa Bibliya, “ang matag usa magpas-an sa iyang kaugalingong luwan.”​—Galacia 6:5.

Ang responsibilidad sa pag-atiman sa yuta gihatag sa Maglalalang ngadto sa tawo. Ang atong pagpabili niini nga responsibilidad ug ang atong mapaubsanong pagtahod sa Diyos ug sa iyang kalalangan angayng magpalihok kanato sa paghunahunag maayo sa dihang maghimog mga desisyon maylabot sa atong pag-atiman sa yuta.

NAKAPAMALANDONG KA BA?

◼ Molihok ba ang Diyos sa pagsulbad sa mga problema sa yuta maylabot sa kalikopan?​—Pinadayag 11:18.

◼ Unsang responsibilidad ang gihatag sa Diyos sa tawo maylabot sa yuta?​—Genesis 1:28; 2:15.

◼ Unsang panig-ingnan ang gipasundayag ni Jesus sa paglikay sa pagkausik-usikan?​—Juan 6:12.