Usa ka Butang nga Mas Maayo pa kay sa “Hingpit Pagkalukot nga mga Balod”

Sumala sa Giasoy ni Karl Heinz Schwoerer

Natawo ako sa 1952 sa Pittsburgh, Pennsylvania, U.S.A., apan nagdako ako sa New Smyrna Beach, Florida. Sa tin-edyer pa, gusto kaayo kong mag-surf. Gani, kini ang akong gikalingahan.

SA 1970, nagpaenrol ako sa Embry-Riddle Aeronautical University sa Daytona Beach, Florida, nga nangambisyon nga mahimong piloto. Apan, nahigawad kaayo ako sa gobyerno, nga niadtong higayona nakiggubat nianang giisip ko nga dili makitawhanong gubat sa Vietnam. Naglagot ako sa palakaw sa gobyerno sama sa ubang mga batan-on niadtong panahona, busa miundang ako pagtungha ug nahimong hippie. Nagpataas ako ug buhok ug nagdroga.

Wala magdugay nakaila nako si Susan, usa ka arisgadang dalaga nga hawod modibuho ug moletrato. Sa akong hunahuna, kon himoon lang namong simple ang among kinabuhi, pwede akong magtrabaho sa konstruksiyon sulod sa unom hangtod sa walo ka bulan sa Florida ug sa nahibiling mga bulan mopuyo lang sa tolda sa kabaybayonan sa Pacific Coast sa Mexico ug sa Sentral Amerika.

Mahunahunaon sa Espirituwal nga Panginahanglan

Makawili kaayo ang pagkinabuhi nga walay sabal diha sa nindot nga mga baybayon sa tropiko, diin si Sue nagkalingaw ug dibuho ug kuhag letrato ug ako nagkalingaw ug surf. Apan paglabay sa daghang tuig, among nakita nga walay kahulogan ang among kinabuhi. Morag dunay butang nga kulang kanamo. Busa, sa tunga-tungang bahin sa 1975, samtang nagpuyo didto sa Pacific Coast sa Costa Rica, nangita ako ug espirituwal nga kahayag. Nagsugod ako sa pagbasag mga libro bahin sa mga relihiyon ug pilosopiya sa Silangan, nga popular niadtong panahona.

Sanglit ang mga libro nga akong ginabasa nagkutlo man ug mga teksto sa Bibliya sa pagpamatuod nga tinuod ang ilang mga doktrina, nakaingon ako nga ang Bibliya mao gayoy basehanan sa kamatuoran. Busa ang akong makahubog nga mga uhong akong gibayloan ug daang King James Version nga Bibliya. Matag hapon, magbasa kog Bibliya human mag-surf sa tibuok buntag. Bisan tuod naikag kaayo ako sa Bibliya, ang akong pagsabot niana kulang pa kaayo.

“Duna Ka bay mga Pangutana Bahin sa Bibliya?”

Sa among pagpaingon sa Amerika gikan sa Costa Rica sa Agosto 1975, mihapit kami ni Sue sa usa ka botika sa El Salvador sa pagpalit ug tambal. Kay naglisod man kami sa pagpakigsulti sa parmasista, gitabangan kami sa usa ka kustomer nga ginganlag Jenny. Siya 16 anyos nga Amerikana nga larinong mosultig Kinatsila. Siya miingon nga siya ug ang iyang mga ginikanan mga Saksi ni Jehova ug nga sila namalhin sa El Salvador aron sa pagtudlo sa mga tawo bahin sa Bibliya.

Gipangutana ako ni Jenny, “Duna ka bay mga pangutana bahin sa Bibliya?”

“Oo, duna!” matod ko. Bisan pag hippie kami ug panagway, gidapit dayon kami ni Jenny sa ilang  balay aron makaila ang iyang mga ginikanan nga si Joe ug Nancy Trembley. Misugot kami. Tibuok hapon kami nga naghisgot bahin sa Bibliya ug naikag kaayo kami sa paagi sa pagtubag ni Joe ug Nancy sa among mga pangutana. Sila moingon kanunay, “Tan-awa kana nga teksto diha sa imong Bibliya ug basaha kana.”

Wala kami makaalinggat nga lawom na diay ang kagabhion, busa ila na lang kaming gipatulog sa ilang balay. Apan wala sila mosugot nga usa ra kamig kuwarto ni Sue, kay wala pa man kami makasal. Nianang gabhiona, si Sue ug Jenny nabuntagag hisgot bahin sa Bibliya​—gikan kang Adan ngadto sa Armagedon.

Ang Berdeng Bibliya

Pagkabuntag, sa wala pa kami mogikan sa lungsod, gihatagan kami ni Joe ug Nancy ug daghang kopya sa mga magasing Bantayanang Torre ug Pagmata!, mga libro, ug usa ka Bibliya. Ang Bibliya mao ang New World Translation of the Holy Scriptures, nga niadtong panahona hinimo sa gahi, berdeng hapin. Gipatan-aw usab kami ni Joe sa Kingdom Hall. Kini simple ug kasarangang tinukod nga ginatigoman sa mga Saksi ni Jehova sa pagtuon sa Bibliya. Nakaingon ako, ‘Pagkalahi niini kon itandi sa maluhong mga simbahan sa Kakristiyanohan, diin wala kaayoy makat-onan ang mga tawo bahin sa Bibliya!’

Pagkahapon, sa mihunong kami sa checkpoint sa wala pa motabok sa utlanan sa Guatemala, ang berdeng Bibliya nakapagubot sa mga sundalo. Sila naglibog kay nahibalo sila nga gigamit kini sa mga Saksi ni Jehova. Apan dili Saksi ang among panagway. Bisan pa niana, gipalahos ra kami sa mga sundalo paglabay sa pipila ka minutos. Naglibog usab kami kay kasagaran ila gayong rekisahon ang among sakyanan ug mga gamit kon may gitago ba kami nga mga droga ug ilegal nga mga butang. Busa nakatuo hinuon kami nga anting-anting ang berdeng Bibliya.

Samtang nagpadayon kami pagbasa sa Bibliya ug sa mga giya sa pagtuon sa Bibliya, nakombinsir kami nga among nakaplagan ang kamatuoran bahin sa Diyos. Samtang nagbiyahe sa Mexico, naghinam-hinam ako sa pag-surf ug duha ka semana sa Puerto Escondido​—ang akong paboritong lugar. Human sa pagkalingaw ug surf, midesisyon ako sa pagpauli sa Florida ug sa pagkahimong alagad ni Jehova.

Duha ka semana ako nga nag-surf mabuntag. Mahapon diha sa baybay, magbasa ako ug Bibliya uban sa mga giya sa pagtuon sa Bibliya. Ang berdeng Bibliya nakakuha sa pagtagad sa otso-anyos nga batang babaye, kinsa namugos kanamo sa pag-uban kaniya sa usa ka dapit pagkagabii. Naglibog kami kon asa niya kami dalhon, apan among nasabtan nga may kalabotan kini sa berdeng Bibliya. Mibalibad kami, apan siya nagsigeg pangimbitar. Sa kataposan, paglabay sa pipila ka adlaw misugot kami sa pagkuyog kaniya. Iya kaming gidala sa gamayng Kingdom Hall sa mga Saksi ni Jehova, nga kawayan nga tinukod nga pawod ug atop. Gilamano ug gihalog kami sa tanan didto nga morag daan nang mga higala.

Nakadayeg kami sa matinahorong batasan sa tanang nanambong. Gitutokan kami sa ubang mga bata panahon sa tigom, tingali kay wala pa sila sukad makakitag tawo nga taas ug bulagaw ug  buhok. Ang ilang mga ginikanan sigeg buyag kanila sa pagpaminaw sa tigom. Apan usa ka bata nga sama nila ang gigamit ni Jehova aron kami makatambong sa among unang tigom.

Determinado sa Pag-alagad kang Jehova

Human sa duha ka semana nga pag-surf, akong gibaligya ang akong mga surf board, ug mipauli kami sa Florida. Didto nagsugod kami sa pagtuon sa Bibliya uban sa mga Saksi ni Jehova ug sa pagtambong sa tanang miting sa kongregasyon. Kay determinadong moalagad kang Jehova, wala na kami magpuyo-puyo ug makighugoyhugoy sa among mga higala kanhi. Nanghimungot ako ug nagpatupi, ug si Sue mipalit ug mga sinina. Nagpakasal kami paglabay sa upat ka bulan, ug sa Abril 1976, kami gibawtismohan ingong simbolo sa among pagpahinungod sa pag-alagad sa Diyos.

Karon ang among kinabuhi duna nay katuyoan. Kay mapasalamaton kang Jehova sa tanan namong mga panalangin, naghinam-hinam kami pagbalik sa Kinatsila ug pinulongan nga nasod sa pagsangyaw sa maayong balita sa Gingharian sa Diyos. Apan gitambagan kami sa mga ansiyano sa among kongregasyon: “Ayaw una kamo pag-adto. Lig-ona usa ang inyong espirituwalidad aron makatabang kamo didto.” Namati kami sa ilang tambag, ug gihimo namong tumong ang pagpayunir, nga maoy pagtawag sa bug-os-panahong mga ministro sa mga Saksi ni Jehova.

Si Sue nagpayunir sa Enero 1978. Gusto sab ko nga magpayunir, apan dako pa kaayo akog utang sa unibersidad. Nakahunahuna akog solusyon. Modeklarar ako nga nabangkarota aron dili ako mapugos sa pagbayad sa akong utang ug makapayunir na ako.

Apan, maalamong gitambagan ako sa mga ansiyano nga dili husto ang maong plano, nga nag-ingon nga supak kini sa mga prinsipyo sa Bibliya, nga nagsugo kanato nga “magmaminatud-on sa tanang butang.” (Hebreohanon 13:18) Busa nagpadayon ako pagtrabaho aron makabayad sa akong utang. Sa Septiyembre 1979 nakab-ot ra gayod nako ang akong tumong nga magpayunir uban kang Sue. Dayon, kay gipasimple man namo ang among kinabuhi, pipila lang ka adlaw akong motrabaho sa usa ka semana aron may kapanginabuhian.

Nag-alagad sa Bethel sa Brooklyn

Wala pay usa ka tuig nga nag-uban sa pagpayunir, nakadawat kami ug dakong sorpresa sa Abril 1980. Una pa niana, dunay panginahanglag mga boluntaryo sa konstruksiyon, busa misumiter kami ug aplikasyon sa pag-alagad sa Bethel, sa tibuok-kalibotang hedkuwarter sa mga Saksi ni Jehova sa Brooklyn, New York. Niining tungora nakadawat kami ug imbitasyon nga kinahanglang atua na kami didto sulod sa 30 ka adlaw! Wala kami makasabot sa among gibati, kay malipayon na man kaayo kami sa among pagpayunir. Sanglit naglibog kon unsay himoon, nakigsulti kami sa duha ka ansiyano, kinsa mitabang kanamo sa pag-apresyar nga dakong pribilehiyo ang gitanyag kanamo. Kami ilang gitambagan, “Sige, sulayi ninyo ang pag-alagad sa Bethel ug usa ka tuig.” Busa among gibaligya ang tanan namong butang ug miadto sa Brooklyn.

Human nagtrabaho sa konstruksiyon ug duha ka tuig, gidapit ako sa pag-alagad sa Construction Engineering Office, diin gibansay ako sa paghimog mga plano sa tinukod. Si Sue nagtrabaho sa Bindery ug usa ka tuig ug dayon siya gibalhin didto sa Graphics Department. Matag anibersaryo sa among kasal, among pamalandongon ang among pag-alagad sa tibuok tuig ug among timbangtimbangon ang among kahimtang ug tinguha ug dayon modesisyon kami nga magpadayon sa pag-alagad sa Bethel.

Sa milabay ang mga tuig, nakakita kamig suod ug buotang mga higala. Dugang pa, kay sa Bethel makaalagad man kami kang Jehova ug sa among mga igsoon sa tibuok kalibotan sa mapuslanong paagi, determinado kami sa pagpadayon. Niadtong 1989 nagsugod kami pagtuon ug Kinatsila, mao nga giasayn kami sa Kinatsila nga kongregasyon sa Brooklyn. Tungod niini, duha ka talagsaong pribilehiyo ang among nabatonan​—pag-alagad sa Bethel ug pag-alagad sa langyaw ug pinulongan nga kongregasyon.

Si Jenny, nga gihisgotan sa sinugdan, miduaw kanamo kas-a sa Brooklyn Bethel, ug nalipay kaayo kaming namati sa iyang sugilanon bahin sa adlaw nga nagkakita kami sa El Salvador. Nagdumala siya ug pagtuon sa Bibliya ug naglain ang iyang gibati. Sa iyang pagpauli, mihapit siya ug botika aron sa pagpalit ug tambal. Sa usa ka katarongan  wala siya moadto sa iyang suki nga botika apan miadto sa botika nga among gipalitan niadtong tungora.

Nag-alagad sa Ubang Nasod

Usa ka adlaw sa 1999, nakuratan ako sa pangutana sa akong magtatan-aw sa Bethel, “Gusto ka bang moadto sa sanga sa Australia aron sa pagtrabaho sa usa ka proyekto sa Regional Engineering Office sa tulo ka bulan?”

“Oo,” mitubag dayon ako. Wala magdugay mipaingon kami sa Australia diin nag-alagad kami ug tulo ka tuig. Nalipay ako nga nakatabang sa paghimog plano sa mga pasilidad sa sanga sa daghang nasod sa Sidlakan ug sa Habagatang Pasipiko. Sa mibalik kami sa Brooklyn sa 2003, laing sorpresa ang naghulat kanamo. Kami gidapit sa laing langyawng asaynment​—sa pag-alagad sa Regional Kingdom Hall Office sa sanga sa Brazil, nga layolayo sa dakong siyudad sa São Paulo.

Hangtod karon ania gihapon kami dinhi. Ang opisina maoy nagdumala sa pagpanukod ug mga Kingdom Hall sa kadaghanang siyudad sa Amerika del Sur. Lakip sa akong asaynment mao ang pagbiyahe sa pagsusi sa buluhaton sa pagpanukod ug sa pagdasig niadtong nagtrabaho sa daghang proyekto ug mag-uban-uban usab si Sue kanako.

Among Giuna ang Labing Importante Alang Kanamo

Dili nako ikalimod nga gusto gihapon ako nga mag-surf, apan nakakita ako ug mas maayo pa kay sa “hingpit pagkalukot nga mga balod.” Busa gibutang nako ang pag-surf sa hustong dapit niini, ingong matang sa paglingawlingaw. Pinaagi sa mahigugmaong pagpaluyo ni Sue, nabug-os ko ang akong hunahuna sa butang nga mas hinungdanon, ang pag-alagad sa among mahigugmaong Diyos, si Jehova.

Ang labing hinungdanong kanamo karon mao ang paggamit sa among kinabuhi ug katakos sa pagpauswag sa intereses sa Gingharian ug sa pagpauswag sa putli nga pagsimba kang Jehova nga Diyos. Kami nakakat-on nga dili importante kon diing dapita kita nag-alagad kang Jehova kondili nga kita nag-alagad kaniya sa bug-os kasingkasing bisag diin pa kitang suoka sa kalibotan.​—Colosas 3:23.

[Blurb sa panid 25]

“Gusto gihapon ako nga mag-surf, apan nakakita ako ug usa ka butang nga mas maayo pa kay sa ‘hingpit pagkalukot nga mga balod’”

[Hulagway sa panid 22, 23]

Akong letrato nga nag-surf, nga gigamit sa poster sa Summer Surf Festival

[Hulagway sa panid 23]

Sa 13 anyos pa ako

[Hulagway sa panid 23]

Akong nasuta nga ang akong pagka-hippie dili makapalipay

[Mga hulagway sa panid 25]

Ibabaw: Nagtabang sa pagtukod ug Kingdom Hall

Tuo: Uban kang Sue karon