Pagpaniid sa Kalibotan

◼ “Adunay daghan kaayong siyentipikanhong mga pamatuod pabor sa ebolusyon nga dayag natong makita ug kini nagdugang sa atong kahibalo bahin sa kinabuhi.”​—PAPA BENEDICT XVI.

◼ “Ang mga opisyales nagkapuliki . . . sa pagpangitag kuwarta nga igasto sa pag-inspeksiyon ug pag-ayo sa mga 74,000 ka ‘huyang’ nga mga taytayan sa U.S., human nga ang 40-anyos nga taytayan sa Minneapolis [Minnesota] nga punog sakyanan ug may gihabogong 60 piye kalit nga nahulog sa Mississippi River, nga nakapatay ug [13 ka tawo].”​—THE WEEK, U.S.A.

Ang Kadaghanan Naglapas sa Balaod

“Dili tinuod ang pagtuo nga ‘kadaghanan sa mga tawo masinundanon sa balaod,’” nag-ingon ang mantalaang Times sa London. “Kadaghanan sa mga taga-Britanya miadmitir nga mosunod lamang sila sa mga balaod kon gusto nila ug kon kanus-a nila gusto.” Gipadayag sa panukiduki nga gihimo alang sa Centre for Crime and Justice Studies sa King’s College, sa London, nga kadaghanan sa naglapas sa balaod naggikan sa “respetadong” hut-ong sa katilingban. Kapin sa 30 porsiyento sa mga tawo nga gisurbi mobayad ug cash aron dili makabayad ug buhis, kapin sa 30 porsiyento dili mouli ug sobra nga sukli, ug 20 porsiyento kanila miangkon nga nangawat diha sa trabahoan. Ang mga tigdukiduki mihinapos nga ang pagkamalinapason sa balaod “nagpaila kon unsa na ka ubos ang moral nga kahimtang sa katilingban​—tingali labaw pa kay sa grabeng mga krimen.”

Anaa ba sa “Kamot sa Diyos” ang Nukleyar nga mga Armas?

Giuyonan sa Rusong Ortodoksong Simbahan ang buluhaton sa mga lalaki ug babaye nga maoy responsable sa pagtipig ug pagmentinar sa nukleyar nga mga armas didto sa Rusya. Diha sa mensahe nga gibasa atol sa usa ka seremonyas didto sa Christ the Savior Cathedral, sa Moscow, ug gibalita sa mantalaang Krasnaya Zvezda, ang patriarka sa Rusong Ortodokso nga si Alexis II nag-ingon: “Ako nag-ampo sa Diyos . . . nga ang nukleyar nga mga hinagiban nga gihimo ninyo ug gipiyal kaninyo maanaa unta kanunay sa kamot sa Diyos ug maoy mopugong sa ubang mga nasod sa pag-atake kanato ug gamiton lamang kon dunay moatake kanato.”

Dugos sa Karaang Israel

“Nadiskobrehan na sa mga arkeologo ang pamatuod sa paghubit sa Bibliya sa Israel . . . ingong ‘yuta sa gatas ug dugos’ (o labing menos ang kahubitan nga kini maoy ‘yuta sa dugos’),” nag-ingon ang Hebrew University of Jerusalem Institute of Archaeology. Didto sa Tel Rehov sa Beth Shean Valley sa Israel, ilang nakita ang tulo ka laray sa linginon nga kulonong mga balay sa putyokan nga tulo ka lut-od ang gitas-on. Ang kolonya sa mga putyokan gibanabanang naglungtad “gikan sa ikanapulo nga siglo ngadto sa unang bahin sa ikasiyam nga siglo W.K.P.” ug base sa gidak-on sa maong lugar “lagmit nga dihay 100 ka balay sa putyokan” niadtong panahona, nag-ingon ang balita. Gibanabana sa mga tigbuhig putyokan nga ang maong buhianan lagmit nakapatunghag “tunga sa toneladang dugos” kada tuig.

Pinalabi ang mga Binuhing Hayop

Sumala sa usa ka surbi nga gihimo diha sa Internet, “usa sa upat ka Australiano nag-ingon nga pinangga kaayo nila ang ilang binuhing hayop nga labaw pa gani kay sa ilang kapikas o mga ginikanan,” nagbalita ang The Sydney Morning Herald diha sa Internet. Sumala sa surbi nga gihimo sa kompaniya sa Australia nga nagtaganag serbisyong pinansiyal, usa sa tulo ka tawong gisurbi migugol ug “mas dakong panahon ug [migastog] mas dakong salapi diha sa ilang binuhing hayop kay sa kaugalingong medikal nga panginahanglan.” Ang mga pagtambal nga gihimo naglakip sa magnetic resonance imaging (MRI), keyhole surgery (paagi sa pag-opera gamit ang instrumento nga ipasulod sa lawas sa pasyente agi sa gamayng hiwa), pag-ilis sa nadaot nga bukog, kemoterapiya, pag-ilis sa mga organo, pag-ilis sa bukog sa bat-ang, ug bisan sa pag-opera sa utok.