Usa ka Umaabot nga Ikaw Makasalig!

Sa imong pag-abot sa usa ka nagsanga nga dalan, dihay karatula nga nag-ingon, “Isalig ang imong umaabot sa mga tawo ug sa ilang mga saad.” Ang laing karatula mabasa, “Salig sa Diyos ug sa iyang Gingharian.” Asa sa duha ka dalan ang imong subayon?

ANG pagsalig sa Diyos maoy maalamong dalan. Siya nag-ingon: “Sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.” (Proverbio 1:33) Kita magpatalinghog sa atong Maglalalang pinaagi sa pagsunod sa iyang mga pagtulon-an sa Bibliya, kay kita nahibalo nga kini kasaligan. (2 Timoteo 3:16) Makasalig ba gayod kita niana? Siyempre! Pananglitan, sama sa atong nakita sa ikaduhang artikulo niining magasina, ang Bibliya lamang ang tin-awng makasaysay kon nganong ang tawo dili molampos sa pagmando sa isigkatawo. Dili ba tukma gayod ang gisulti sa Bibliya kon unsay kahimtang karon?

Ingon usab niana ka tukma ang gipakita sa mga tagna sa Bibliya. Pananglitan, gitagna sa Bibliya ang makapasubong mga kahimtang nga magtimaan sa “kataposang mga adlaw.” Ingon gayod niana ang atong makita karon. (Mateo 24:3-7; 2 Timoteo 3:15) Gitagna pa gani sa Bibliya nga daoton sa tawo ang yuta. Ang Diyos ‘maglaglag sa mga nagalaglag sa yuta,’ nag-ingon ang Pinadayag 11:18.

Sa dihang kini gisulat mga 2,000 ka tuig kanhi,  ang polusyon sa hangin, dagat, ug yuta; pag-init sa klima; ug ang pagkapuo sa daghang hayop ug tanom gumikan sa tawo daw dili katuohan nga mahitabo. Apan nahitabo gayod kini karon! Oo, ang Diyos dili magbakak. Ang iyang sinulat nga Pulong kanunayng matuman nga detalyado. a (Tito 1:2; Hebreohanon 6:18) Sa pagkatinuod, gigarantiya sa Diyos ang iyang ngalan diha sa iyang pulong.

Usa ka Ngalan nga Imong Masaligan

Sama nga ang pirma maoy garantiya nga tinuod ang tseke​—ang Jehova, nga maoy personal nga ngalan sa Diyos, maoy garantiya nga tinuod ang tanang gisaad sa Bibliya. b “Sa iyang balaan nga ngalan kami nagsalig,” matod sa usa ka magsusulat sa Bibliya nga kanunayng nakasinati sa mahigugmaong pag-atiman sa Diyos.​—Salmo 33:21; 34:4, 6.

Ang Proverbio 18:10 naglangkit sa ngalan sa Diyos sa iyang inamahan nga pag-atiman, nga nagaingon: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.” Sa samang diwa, ang Roma 10:13 mabasa: “Ang matag usa nga magatawag sa ngalan ni Jehova maluwas.” Siyempre, ang personal nga ngalan sa Diyos dili anting-anting nga manalipod kanato batok sa daotan. Hinunoa, ang moluwas mao gayod ang Diyos, ug sumala nianang tekstoha, kadtong mosangpit kaniya nagasalig kaniya sa bug-os, kay sila nahibalo nga si Jehova kasaligan gayod. “Ang Dios nag-ingon, ‘Luwason ko kadtong nahigugma kanako, ug panalipdan ko kadtong miila sa akong ngalan.’”​—Salmo 91:14, Ang Bag-ong Maayong Balita Biblia.

Pangutan-a ang imong kaugalingon, ‘Kang kinsa ako misalig, sa Diyos o sa tawo?’ Gipili sa mga Saksi ni Jehova ang Diyos ug ang iyang Gingharian tungod sa ilang lig-ong pagtuo nga gipasukad sa tukmang kahibalo sa Bibliya, dili kay buot lamang nilang motuo niini o tuohan ang tanan nilang madungog. (Hebreohanon 11:1; 1 Juan 4:1) Tungod niini sila wala mahadlok sa umaabot, hinunoa sila ‘nagamaya sa paglaom’ nga gibutang sa ilang atubangan. Ikaw ilang gidapit sa pagpahimulos nianang masanag nga paglaom.​—Roma 12:12.

[Mga footnote]

[Blurb sa panid 9]

Sama nga ang pirma maoy garantiya nga tinuod ang tseke, ang ngalan sa Diyos maoy garantiya nga tinuod ang tanang saad sa Bibliya

[Kahon sa panid 9]

Usa Ka Ngalan Ug Garantiya

Ang ngalan sa Diyos nga Jehova, dili lamang basta ngalan. c Ngano? Kay kanang ngalana nagkahulogang “Siya Magpahinabo.” Kini nagpasabot nga ang Diyos adunay gugma, gahom, ug kaalam aron mahitabo ang bisan unsa nga gusto niyang himoon sa pagpalampos sa iyang katuyoan ug sa pagtuman sa iyang pulong. Pananglitan, siya mahimong Manluluwas sa mga matarong, Tiglaglag sa mga daotan, Tigpatalinghog sa pag-ampo, o mahigugmaong Amahan​—bisan unsa nga gusto niyang mahitabo.

“Ako ang Diyos,” si Jehova nag-ingon, “ang Usa nga nagsulti sa kataposan sukad sa sinugdan, . . . ang Usa nga nag-ingon, ‘Ang akong kaugalingong laraw mobarog, ug ang tanang butang nga akong gikahimut-an akong pagabuhaton.’” (Isaias 46:9, 10) Sanglit ang Diyos matinud-anon gayod sa iyang kaugalingon, ug tungod kay nalangkit niini ang iyang ngalan o dungog, nan ang iyang nasulat nga Pulong mamatuman gayod. “Ang Diyos dili usa ka tawo nga siya mamakak.”​—Numeros 23:19.

[Footnote]