Luwas ba sa HIV ang Gieksamin na nga Dugo?

TINAMPO SA MAGSUSULAT SA PAGMATA! SA NIGERIA

◼ KINING pangutanaha mitungha didto sa Nigeria sa dihang nadiskobrehan nga ang usa ka batang babaye nataptan ug HIV (kagaw nga maoy hinungdan sa AIDS) gikan sa dugo nga giabono kaniya diha sa usa ka inilang ospital sa Nigeria.

Sumala pa sa direktor sa ospital, dili dugay human matawo si Eniola, nadayagnos nga siya may jaundice (pagpangdalag sa panit ug mata). Aron matambalan, ang doktor midesisyon nga ilisan ang dugo sa bata mao nga nagdonar ug dugo ang iyang amahan. Apan lahi diayg tipo ang dugo sa amahan, busa giabonohan siyag dugo nga gipondo sa ospital. Sa wala madugay, ang bata nadayagnos nga adunay HIV, bisag ang mga ginikanan niini walay HIV. Sumala pa sa ospital, “ang dugo nga giabono sa bata gieksamin ug kini walay HIV sa dihang kini giabono kaniya.”

Nan, sa unsang paagi natakboyan ang bata ug HIV? Ang kagamhanan sa Nigeria nag-imbestigar sa nahitabo ug ilang nakaplagan nga ang kagaw lagmit naggikan sa giabono nga dugo. Ang mantalaang Nigerian Tribune nagkutlo sa giingon sa usa ka siyentipiko nga nagtuon bahin sa mga kagaw: “Sa panahon nga gidonar ang dugo, ang tawo nga nagdonar niini anaa pa sa gitawag nga window period.”

Usa lamang kini ka kaso, apan gipakita niini nga adunay kapeligrohan ang pag-abonog dugo. Kon bahin sa window period sa HIV, ang U.S. Centers for Disease Control and Prevention nag-ingon: “Dangtan pag pipila ka panahon una makapatungha ang sistema sa imyunidad sa lawas ug igong gidaghanon sa antibody diha sa dugo nga gikinahanglan aron mahibaloan nga ang usa adunay HIV ug ang maong panahon managlahi sa matag tawo. Kini nga yugto sa panahon gitawag nga ‘window period.’ Ang kadaghanan sa mga tawo makapatunghag igong gidaghanon sa antibody sulod sa 2 ngadto sa 8 ka semana (sa aberids, 25 ka adlaw). Gani, posible nga ang pipila mas dugay makapatunghag igong gidaghanon sa antibody. . . . Usahay, kini dangtag 6 ka bulan.”

Busa, bisag gieksamin na ang dugo, walay garantiya nga kini luwas sa HIV. Ang San Francisco AIDS Foundation nagpasidaan: “Bisag dili pa makita ang HIV sa dihang kini eksaminon panahon sa window period, mahimo na kining mapasa nianang panahona. Sa pagkatinuod, mas daling makatakod ang usa ka tawo niining yugtoa (dili dugay human siya mataptan ug HIV).”

Ang mga Saksi ni Jehova dugay nang nagsunod sa sugo sa Bibliya nga “padayong magaayad sa . . . dugo.” (Buhat 15:29) Ang kaayohan nga ilang nakuha gikan niana nagpakita nga maalamon gayod ang pagsunod sa sugo sa Diyos. Alang sa dugang impormasyon kon unsay mahimong ipuli sa pag-abonog dugo, palihog tan-awa ang brosyur nga Sa Unsang Paagi ang Dugo Makaluwas sa Imong Kinabuhi? a

[Footnote]