Pagpaniid sa Kalibotan

◼ “Ang usa ka tem sa mga astronomo nga naggamit sa Subaru ug Keck nga mga teleskopyo sa Mauna Kea [Hawaii] nakadiskobreg dagko kaayong gaway-gaway sa mga galaksiya nga moabot ug 200 ka milyong light-year diha sa kawanangan.” Kini nga mga gaway-gaway mao ang kinadak-an nga nadiskobrehan sukad.​—SUBARU TELESCOPE WEB SITE, JAPAN.

◼ Ang Office for National Statistics sa United Kingdom nagtaho nga “ang gidaghanon sa mga nagpakasal [sa Inglaterra ug Wales] niadtong 2006 mao ang kinaubsan sulod sa 110 ka tuig. Nagkadaghan ang nagpuyo-puyo.”​—THE GUARDIAN WEEKLY, BRITANYA.

◼ Sumala sa Pew Forum on Religion and Public Life, “44% sa edad-edaran nagbag-o ug relihiyon, nagpamembro sa usa ka relihiyon, o kaha wala na gayod moanib ug bisan unsang relihiyon.”​—U.S.A.

Mga Kolehiyo ug ang “Hookup” nga Pagpakigsekso

“Gawas sa pipila ka Protestanteng mga kolehiyo . . . , halos walay kalainan ang publiko, pribado ug Katolikong mga kolehiyo ug unibersidad kon bahin sa ‘hook-up culture’ nga ginahimo diha sa eskuylahan​—diin ang mga estudyante makigsekso kang bisan kinsa na lang.” Mao kanay giingon sa Katolikong teologo ug luyo-luyong propesor sa unibersidad nga si Donna Freitas human makapanukiduki bahin sa seksuwal nga panggawi ug sa relihiyon diha sa mga kolehiyo sa Amerika. Sumala sa National Catholic Reporter, si Freitas miingon nga kay wala may moral nga mga sukdanan ang relihiyon labot sa seksuwal nga panggawi, “ang pagpakigsekso diha sa mga kolehiyo kaylap kaayo” ug “walay nahimo ang dagkong mga relihiyon sa pagsumpo niini.”

Mga Ginikanan Gibayran Aron Dili Nila Ipakuha ang Gisabak nga mga Batang Babaye

Ang gobyerno sa India nagtanyag sa kabos nga mga ginikanan ug kantidad nga motumbas ug halos $3,000 (U.S.) aron dili ipakuha ang gisabak nga mga batang babaye, nag-ingon ang taho sa BBC News. Ang mga pamilya makadawat ug kuwarta inigkatawo sa batang babaye ug sa bisan unsang yugto sa iyang kinabuhi hangtod sa edad nga 18. Bisan pag gidili na sa balaod niadtong 1994 ang pagkuha sa gisabak kon ang sekso sa bata dili mao ang gusto sa mga ginikanan, kaylap gihapon kini nga batasan. Sa pagkatinuod, gibanabana nga sulod sa miaging 20 ka tuig, mga 10 milyones ka batang babaye ang gipakuha, nga tungod niana midaghan ang mga batang lalaki kay sa mga batang babaye diha sa ubang mga dapit. Sumala sa 2001 nga senso sa tibuok nasod, dunay 927 ka batang babaye sa matag 1,000 ka batang lalaki nga wala pay sayis anyos ug mas nagkadaghan ang mga lalaki kay sa mga babaye. Diha sa usa ka dapit sa nasod dunay mahimugso nga 793 ka batang babaye sa matag 1,000 ka batang lalaki.

Reaksiyon sa mga Langgam sa Kabanha

Ang ubang mga langgam maningkamot gayod nga madunggan diha sa banha kaayo nga siyudad. Ang kabanha sa siyudad tingali makapikal sa tawo, apan “kinabuhi o kamatayon” kini para sa mga langgam, nag-ingon ang magasing New Scientist, kay ang mga laki motuwit-tuwit aron sa “pagdanig kaparis ug sa pagpahibalo sa utlanan sa ilang teritoryo.” Tungod sa kabanha sa siyudad, pakusgan pa gayod sa ubang mga langgam ang ilang pagtuwit-tuwit magabii. Dugang pa, dili kay mga langgam sa siyudad lang ang magpakusog sa ilang tingog, nag-ingon ang magasin. Ang mga langgam nga nagpuyo duol sa “mga busay ug mga suba magpakusog usab sa ilang pagtuwit-tuwit.”