Mga Batan-on Nangutana

Sa Unsang Paagi Mahupayan Ako sa Among Panagbulag?

“Unom ka bulan na kaming managtrato ug lima ka tuig nang managhigala. Sa dihang gusto na siyang makigbulag, dili siya makasulti nako. Wala na lang ko niya tagda. Mibati ko nga sinalikway. Grabe gyod ang akong kaguol. Magsige kog pangutana sa akong kaugalingon, ‘Unsa may akong sayop?’”​—Rachel. a

ANG panagbulag makawala sa imong kalipay ug magsige ka na lag hilak. Tagda pananglitan si Jeff ug Susan, nga nagkatrato sulod sa duha ka tuig. Sulod nianang panahona nagkasuod sila pag-ayo. Sa tibuok adlaw, si Jeff mag-text kang Susan nga siya iyang gihigugma. Tighatagan siyag mga regalo sa pagpakita nga naghunahuna siya kaniya. “Si Jeff naningkamot gayod sa pagpamati ug pagsabot kanako,” miingon si Susan. “Iyang gipabati kanako nga espesyal ako.”

Wala magdugay, si Jeff ug Susan naghisgot nga magpakasal na sila ug kon asa sila mopuyo. Gipangutana pa gani ni Jeff si Susan sa sukod sa iyang singsing. Dayon, sa kalit lang, nakigbulag si Jeff kaniya! Puwerteng guola ni Susan. Siya nagpadayon sa iyang adlaw-adlawng kalihokan, apan mora siyag walay kinabuhi ug wala makatuo sa nahitabo. “Naluya gyod ko,” siya miingon. b

Kon Nganong Sakit Kaayo

Kon ikaw nakasinati ug sama nianang kang Susan, tingali nakapangutana ka, ‘Makapadayon pa kaha ako sa akong kinabuhi?’ (Salmo 38:6) Normal kanang imong gibati. Ang panagbulag maoy usa sa kinasakitan  nga angay nimong sagubangon. Gani, ang uban miingon nga mora kag namatyan kon bulagan ka. Tingali kini ang pipila sa imong bation:

Dili makadawat. ‘Dili puwedeng magbulag mi. Mausab ra ang iyang hunahuna paglabay sa usa o duha ka adlaw.’

Kasuko. ‘Nganong nakaako uroy siya sa pagpakigbulag kanako? Naglagot gyod ko niya!’

Kaguol. ‘Dili ko hiligugmaon. Wala na gayoy mahigugma nako.’

Pagdawat. ‘Mahupayan ra ko. Nasakitan ko, apan maarang-arang na ang akong gibati.’

Ang nindot nga balita mao, makadawat ka ra unya niana. Kon unsa ka dugay ka maulian nagdepende sa pipila ka butang, sama sa gidugayon sa inyong relasyon ug kon unsa na kamo ka suod. Sa pagkakaron, unsaon nimo pagsagubang sa imong naghuot nga dughan?

Padayon Lang sa Imong Kinabuhi

Tingali ang uban moingon nga ang samad maalim ra paglabay sa panahon. Kon bag-o pa lang kamong nagkabulag, kanang ilang giingon dili gayod magsilbi. Tungod kana kay ang panahon maoy bahin lamang sa solusyon. Sa pag-ilustrar: Tinuod nga ang samad maalim paglabay sa panahon, apan ngutngot pa kini karon. Kinahanglan imong patang-onon ang pagdugo ug pahumpayon ang kasakit. Angay usab nga imong bantayan nga dili kini maimpeksiyon. Ingon usab niana ang emosyonal nga samad. Sa pagkakaron, sakit kaayo kini. Apan may mga lakang nga imong mahimo aron mahupayan ang kasakit ug aron dili kini mahimong pagdumot. Ang panahon moalim sa imong kaguol, apan unsay angay nimong himoon aron maalim ang imong kaguol? Sulayi ang mosunod nga mga sugyot.

◼ Hilak lang. Walay daotan sa paghilak. Gani, ang Bibliya nag-ingon nga may “panahon sa paghilak” ug bisan “panahon sa pagminatay.” (Ecclesiastes 3:1, 4) Wala magpasabot nga huyang ka kon mohilak ka. Bisan si David, nga usa ka maisogong manggugubat, mibati usab ug tumang kaguol. Siya kas-a miadmitir: “Matag gabii umog ang akong higdaanan tungod sa paghinilak; ang akong unlan natumog sa luha.”​—Salmo 6:6, Today’s English Version.

◼ Ampingi ang imong panglawas. Ang ehersisyo ug hustong nutrisyon makatabang sa pagpasig-uli sa nawalang kusog tungod sa imong kaguol. “Ang lawasnong pagbansay may diyutayng kapuslanan,” nag-ingon ang Bibliya.​—1 Timoteo 4:8.

Unsang mga bahin sa imong panglawas ang angay nimong hatagag pagtagad?

․․․․․

◼ Magmapuliki. Ayawg hunong sa pagbuhat sa mga butang nga makapainteres kanimo. Ug ayaw gayod ilain ang imong kaugalingon. (Proverbio 18:1) Ang pagpakig-uban sa mga tawo nga may kahingawa kanimo makatabang sa pagsentro sa imong pagtagad sa positibong mga butang.

Unsang mga tumong ang mahimo nimong kab-oton aron makapabiling puliki?

․․․․․

◼ Iampo sa Diyos ang imong gibati. Lisod tingali kini. Human sa panagbulag, ang uban mobati pa gani nga giluiban sila sa Diyos. Sila mangatarongan, ‘Nagsige kog ampo nga makakita unta kog trato, ug karon tan-awa kon unsay nahitabo!’ (Salmo 10:1) Apan husto bang isipon ang Diyos ingong tigparis-paris? Siyempre, dili gayod; ug dili usab Siya ang hinungdan kon gusto na sa usa nga taposon ang ilang relasyon. Hinuon, kini ang atong nahibaloan bahin kang Jehova: “Siya may kahingawa kaninyo.” (1 Pedro 5:7)  Busa ipahungaw kaniya ang imong gibati diha sa pag-ampo. Ang Bibliya nag-ingon: “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”​—Filipos 4:6, 7.

Unsang espesipikong mga butang ang mahimo nimong iampo kang Jehova samtang naningkamot ka sa pagsagubang sa kaguol?

․․․․․

Lantawa ang Umaabot

Dihang mahupayan ka na paglabay sa panahon, mahimong imong pamalandongon kon unsay nahitabo sa imong miaging relasyon. Kon andam ka na sa pagbuhat niana, imong makita nga makatabang ang pagsulat sa imong tubag sa mosunod nga mga pangutana.

◼ Misulti ba siya sa hinungdan kon nganong iya kang gibulagan? Kon mao, isulat ang hinungdan, bisan kon gibati nimo nga dili kana tinuod.

․․․․․

◼ Unsa pay ubang mga hinungdan?

․․․․․

◼ Kon palandongon ang nahitabo, duna ka bay mahimo aron dili kamo magkabulag? Kon duna, unsa man?

․․․․․

◼ Kini ba nga kasinatian nagpaamgo kanimo nga angay pa nimong pauswagon ang imong espirituwalidad ug ang imong emosyon?

․․․․․

◼ Unsay imong usbon, kon duna man, sa sunod nimo nga pagpakigtrato?

․․․․․

Ingnon ta nga ang imong pagpakigtrato wala mahitabo sumala sa imong gidahom. Apan hinumdomi kini: Sa panahon sa bagyo, ang imong hunahuna anaa ra sa nag-itom nga kalangitan ug sa kusog nga ulan. Apan sa ngadto-ngadto, motuang ra ang ulan ug mohayag ang kalangitan. Ang mga batan-on nga gihisgotan sa sinugdanan niining artikuloha, nakasagubang ra paglabay sa panahon. Makasalig ka nga makasagubang sab ka!

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype

[Mga footnote]

ANGAYNG PALANDONGON

◼ Unsay imong nakat-onan bahin sa imong kaugalingon sa imong miaging pagpakigtrato?

◼ Unsay imong nakat-onan bahin sa kaatbang nga sekso?

◼ Kinsay imong duolon aron imong ikapahungaw ang imong grabeng kaguol tungod sa panagbulag?

[Kahon sa panid 20]

SUGYOT

Si Susan, nga gihisgotan sa sinugdan, naghimog listahan sa mga teksto ug gidaladala kini kanunay aron iyang mabasa dayon kini kon siya maguol pag-ayo. Puwede usab nimo kanang himoon sa mga teksto nga gihisgotan niining artikuloha.

[Hulagway sa panid 19]

Ang panagbulag samag sakit kaayo nga samad​—sakit kini, apan maalim ra kini paglabay sa panahon