Kon Nganong Wala Kami Magpaaborsiyon

GISULTIHAN ni Victoria, nga gihisgotan sa unang artikulo, ang iyang trato nga si Bill nga dili siya magpaaborsiyon. “Mibati ako nga dunay kinabuhi sa sulod nako,” miingon si Victoria. “Akong gibulagan si Bill kay nagtuo gyod ko nga dili niya ako atimanon panahon sa akong pagsabak.”

Apan nausab ang hunahuna ni Bill ug iyang gihagad si Victoria nga magpakasal sila. Pero naglisod sila sa pag-atiman sa ilang bag-ong natawong anak nga lalaki. “Wala kamiy sakyanan, way kuwarta, wa kaayoy sinina, ug wa kaayoy mga gamit,” miingon si Victoria. “Gamay rag suweldo si Bill,  ug bati pa ang apartment nga among gipuy-an, apan amo kining giantos.”

Ang uban nakaatubang usab ug kalisod tungod sa wala sa plano nga pagsabak. Ugaling, wala sila magpaaborsiyon. Unsay nakatabang kanila sa ilang hugot nga desisyon nga dili magpaaborsiyon ug sa pag-atubang sa kalisod sa pagpadako ug bata nga wala sa plano? Ang nakatabang mao ang mga kaalam nga makaplagan diha sa Bibliya.

Ayaw Paglanganlangan—Paghimog Praktikal nga mga Plano

Ang Bibliya nag-ingon: “Ang mga plano sa kugihan mosangpot gayod sa kaayohan, apan ang matag usa nga madalidalion mosangko lamang sa kawalad-on.”—Proverbio 21:5.

Si Connie, nga dunay tulo ka anak nga lalaki ug ang usa kanila baldado, nahadlok nga manganak pag-usab. “Lisod kon madugangan na usab kamig pakan-on,” siya miingon. “Busa naghunahuna kami sa pagpakuha sa akong gisabak.” Apan sa wala pa siya modalidalig desisyon, iya kining gisulti kang Kay, nga kauban niya sa trabaho. Gipatin-aw ni Kay kaniya nga ang iyang gisabak maoy buhi nga tawo, ug kini nakapaamgo kaniya sa pag-usab sa iyang hunahuna.

Apan si Connie nagkinahanglag tabang kon unsay angay niyang himoon. Sanglit si Connie duna may iyaan nianang dapita, gipakontak ni Kay kang Connie ang iyang iyaan. Sa dihang nakontak ang iyang iyaan, andam siya sa pagtabang. Dugang pa, ang bana ni Connie nakakitag dugang trabaho, ug mibalhin sila sa dili kaayo mahal nga apartment. Ug naatiman ra nila ang ilang masuso.

Gitabangan usab ni Kay si Connie sa pagpangitag ahensiya sa gobyerno nga motabang niadtong nagkaproblema tungod kay nagsabak nga wala sa plano. Diha sa daghang nasod, dunay ingon niini nga mga ahensiya sa gobyerno nga mohatag ug tabang sa bag-ong mga inahan nga nanginahanglag tabang. Ang Internet o mga direktoryo sa telepono, nga mabatonan sa kadaghanang publikong mga librarya, magamit sa pagpangita niini nga mga ahensiya. Ang pagpangitag tabang tingali hasol, apan “ang mga plano sa kugihan” mosangpot gayod ug kaayohan.

Dawata na Lang nga Ingon Gayod Niini ang Kinabuhi

Ang Bibliya nag-ingon: “Mahitungod sa maalamon, ang iyang mga mata anaa sa iyang ulo; apan ang hungog nagpadayon sa paglakaw diha sa tumang kangitngit.”—Ecclesiastes 2:14.

Ang babayeng maalamon dili magpakabuta sa tinuod nga kahimtang ug ‘maglakaw diha sa kangitngit.’ Iyang gamiton ang ‘mga mata diha sa iyang ulo’ o ang iyang salabotan. Kini makatabang kaniya sa pagtimbang-timbang sa resulta sa iyang mga desisyon. Busa, kon itandi sa usa nga nagpakabuta sa tinuod nga nagakahitabo diha sa iyang tagoangkan, ang babayeng maalamon mahangawaong molihok sa pagpanalipod sa iyang gisabak.

Si Stephanie, kinsa nagplanong magpaaborsiyon, gipakitaan sa hulagway nga nakuha sa ultrasound sa duha ka bulang bata nga iyang gisabak. “Nakahilak ko,” miingon si Stephanie. “Namalandong ako: Nganong patyon ko man kining bata nga akong gisabak?”

Laing napaangkan nga batan-on, nga ginganlag Denise, nakaamgo nga siya dunay gidalang buhing bata sulod sa iyang tagoangkan. Sa dihang gihatagan siya sa iyang trato ug kuwarta ug gisugo sa pagpakuha,” si Denise mitubag: “Ipakuha nimo ang akong gisabak? Dili gayod ko makahimo niana!”

Kon Unsay Mahimo sa Pagkahadlok ug Tawo

Kon pugson sa uban nga magpaaborsiyon, kadtong naghunahuna sa sinugdanan sa pagpakuha sa ilang gisabak maalamong magpalandong sa panultihon sa Bibliya: “Ang pagkahadlok ug tawo  makahatag kanimog problema, apan kon mosalig ka sa GINOO, malayo ka sa peligro.”—Proverbio 29:25, New Century Version.

Ang 17-anyos nga si Monica gipaangkan sa iyang trato sa estudyante pa siya. Pwerteng guola sa iyang inahan, nga usa ka biyuda nga limag anak. Gusto niya nga si Monica makakat-on ug panginabuhian aron mahaw-as sila sa kalisod. Kay nawad-ag paglaom, miinsister ang inahan ni Monica sa pagpakuha sa iyang gisabak. “Sa gipangutana siya sa doktor kon idayon ba niya ang pagpakuha sa iyang gisabak,” si Monica mitubag, “Dili ko!”

Kay nabalaka nga walay maayong palaaboton si Monica ug namalandong sa problema sa pagkabaton ug dugang bata, gipalayas siya sa iyang inahan. Si Monica miipon ug puyo sa iyang iyaan. Paglabay sa pipila ka semana, ang iyang inahan nalukmay ug gipapauli siya. Gitabangan si Monica sa iyang inahan sa pag-atiman sa iyang anak nga si Leon, ug gimahal kaayo sa iyang inahan si Leon.

Lahi ang kalisod nga giatubang sa minyo nga babaye nga ginganlag Robin. “Sa nagsabak ako, gitambalan ako sa akong doktor sa impeksiyon sa akong rinyon nga wala una niya susiha nga ako nagsabak,” miingon si Robin. “Gisultihan ako nga dakog posibilidad nga matawo ang bata nga may diperensiya sa utok.” Dayon giawhag siya sa doktor sa pagpakuha sa iyang gisabak. “Akong gipatin-aw kaniya ang panglantaw sa Bibliya bahin sa kinabuhi,” miingon si Robin. “Ako siyang gisultihan nga dili mahimong magpaaborsiyon ako.”

Bisan tuod may katarongang mabalaka ang doktor, ang kinabuhi ni Robin wala mameligro. a “Sa dihang natawo ang akong anak ug gieksamin,” matod pa ni Robin, “nakita nga dili kaayo grabe ang iyang depekto sa utok ug dili kaayo huyang ang iyang tuhod ug kaunoran. Maayo ra siyag kahimtang. Karon 15 anyos na siya, ug maayo-ayo nang mobasa. Gimahal kaayo nako siya, ug nagpasalamat ako kang Jehova daghang beses sa usa ka adlaw tungod niya.”

Ang Pagpakighigala sa Diyos Dunay Gahom

Ang Bibliya nag-ingon: “Ang pagpakighigala ni Jehova anaa niadtong may kahadlok kaniya.”—Salmo 25:14, American Standard Version.

Ang nakaimpluwensiya sa desisyon sa kadaghanan nga wala magpaaborsiyon mao ang ilang paghunahuna kon unsay bation sa ilang Maglalalang bahin niini. Hinungdanon kaayo kanila ang ilang pagkahimong higala sa Diyos ug ang pagbuhat sa kon unsay makapahimuot kaniya. Kini ang nakaimpluwensiya kang Victoria, nga gihisgotan ganiha. Siya miingon: “Nagtuo gyod ko nga ang Diyos maoy naghatag ug kinabuhi ug ako walay katungod sa pagkuha sa kinabuhi nga iyang gihatag.”

Sa nagsugod si Victoria sa tininuod nga pagtuon sa Bibliya, mas nasuod siya sa Diyos. Siya miingon: “Ang akong desisyon sa dili pagpakuha sa akong gisabak mas nakapasuod kanako sa Diyos ug gusto ko nga pahimut-an siya sa tanang bahin  sa akong kinabuhi. Sa dihang nag-ampo ako alang sa iyang pagtultol, ang tanan maayo ug lakat.”

Ang pagpakigsuod sa Diyos, nga Tuboran sa kinabuhi, makapalalom sa atong pagtahod sa kinabuhi diha sa tagoangkan. (Salmo 36:9) Dugang pa, ang Diyos makataganag “gahom nga labaw sa kasarangan” sa pagtabang sa babaye ug sa iyang pamilya sa pagsagubang sa bisan unsang problemang motungha tungod sa wala sa planong pagsabak. (2 Corinto 4:7) Dihang mamalandong sa nangagi, unsay gibati niadtong nagpakitag pagtahod sa hunahuna sa Diyos bahin sa kinabuhi?

Wala Gayod Sila Magmahay

Kini nga mga ginikanan wala tulisoka sa ilang konsensiya o wala hasola sa kaguol tungod sa pagpaaborsiyon. Sa ngadto-ngadto, ilang giisip “ang bunga sa tiyan” ingong ganti, dili tunglo! (Salmo 127:3) Kini ang naamgohan ni Connie, nga gihisgotan ganiha, paglabay ug duha ka oras human siya nanganak! Malipayon niyang gitawgan ang iyang kauban sa trabaho nga si Kay ug iyang gisultihan siya nga malipay kaayo siya sa pagpadako sa iyang anak nga babaye. Malipayon kaayong midugang si Connie: “Tinuod gayod nga panalanginan sa Diyos kadtong magpahimuot kaniya.”

Nganong mapuslanon kaayo ang pagkinabuhi uyon sa hunahuna sa Diyos bahin sa kinabuhi? Kay Tuboran sa kinabuhi, ang Diyos naghatag ug mga balaod ug mga sukdanan diha sa Bibliya “alang sa [atong] kaayohan.”—Deuteronomio 10:13.

Sumala kang Victoria ug Bill, kansang eksperyensiya nagsilbing pasiuna sa nag-unang duha ka artikulo, ang desisyon nga dili ipakuha ang gisabak mao ang nakapausab sa ilang kinabuhi. Sila miingon: “Kami pulos adik ug tingali nangamatay na unta kon wala kami mohunong. Apan ang pagtahod sa kinabuhi sa among wala pa matawong bata nakapahunahuna kanamo bahin sa among kaugalingong mga kinabuhi. Sa tabang sa mga Saksi ni Jehova, kami nagbag-o.”

Ang ilang anak nga si Lance, nga karon hapit nang mag-34 ang edad minyo sulod sa kapin sa 12 ka tuig. Si Lance miingon: “Gitudloan ako sa akong ginikanan sukad pa sa pagkabata sa paghimog mga desisyon pinasukad sa Bibliya. Nakatabang kaayo kini kanako, sa akong asawa, ug sa akong anak ug nakapalipay kini kanamo.” Ang amahan ni Lance, kinsa nagsugo kang Victoria sa pagpakuha kaniya sa gisabak pa siya, miingon, “Mangurog gyod kami dihang makahinumdom nga hapit na unta namong ipakuha ang among pinalanggang anak.”

Hinumdomi pag-usab si Monica, kinsa wala mosugot sa pagpakuha sa iyang gisabak bisag gipugos siya sa iyang inahan. “Paglabay ug duha ka semana human matawo ang akong anak,” siya miingon, “nakontak ako sa mga Saksi ni Jehova ug nakakat-on kon unsaon sa pagpahiuyon sa akong kinabuhi sumala sa mga balaod sa Diyos. Gitudloan dayon nako ang akong anak nga si Leon kon unsa ka hinungdanon ang pagsunod sa Diyos, ug sa ngadto-ngadto nakakat-on siya sa paghigugma sa Diyos. Si Leon karon maoy usa na ka ministro sa mga Saksi ni Jehova nga nagaduaw ug mga kongregasyon.”

Tungod sa desisyon sa iyang inahan, si Leon miingon: “Ang pagkahibalo nga ako gimahal niya pag-ayo kay wala niya ako gipakuha bisag siya gipugos nakadasig kanako sa paggamit sa akong kinabuhi sa labing maayong paagi aron ipakita ang akong apresasyon sa Diyos alang niining talagsaong gasa.”

Daghan niadtong nakasabot sa hunahuna sa Diyos bahin sa kinabuhi wala magmahay sa ilang desisyon sa pagpreserbar sa kinabuhi sa anak nga ila karong gihigugma. Sila mapasalamatong nakaingon, “Wala kami magpaaborsiyon!”

[Footnote]

[Hulagway sa panid 7]

Ang pagkakita sa hulagway nga nakuha sa ultrasound sa duha ka bulang bata nga iyang gisabak nakatabang kang Stephanie sa paghimog desisyon

(Linya gidugang)

[Hulagway sa panid 8]

Si Victoria ug Lance

[Hulagway sa panid 8, 9]

Si Victoria ug Bill karon, uban kang Lance ug sa iyang pamilya

[Hulagway sa panid 9]

Si Monica ug ang iyang anak nga si Leon mapasalamaton kaayo nga wala siya magpadala sa dihang gipugos siya sa pagpakuha kaniya 36 ka tuig kanhi