Gitratar nga Ubos Kaayo

“Sa akong pagtungha sa primero grado sa Espanya, gibugalbugalan ko sa uban nakong mga klasmet kay mas taas sila nako. Halos kada adlaw kong maghilak nga mopauli.”—Jennifer, anak sa magtiayong Pilipino nga namuyo na sa Espanya.

“Dihang mibalhin kog laing eskuylahan, gitawag ko sa akong mga eskolmet nga puti ug makapainsultong mga ngalan. Nahibalo ko nga ila akong gihagit-hagit aron ko masuko. Nagpugong lang ko—apan sa tinuoray nasakitan ko ug mibating sinalikway.”—Timothy, usa ka Aprikano nga nagpuyo na sa Amerika.

“Sa siyete anyos pa ako, ang mga tribong Igbo ug Hausa sa Nigeria nagkontrahay. Naapektohan ako sa ilang pagdinumtanay, ug giyagayagaan nako ang akong klasmet nga Hausa bisag amigo mi.” —John, membro sa tribong Igbo.

“Ako ug ang akong kaubang misyonarya nagsangyaw sa among mga silingan dihang ang mga bata, nga gihulhogan sa mga dako-dako sa relihiyon niadtong dapita, nagsunod-sunod namo ug gibato kami. Gusto sa klero nga mamahawa mi sa lungsod.”—Olga.

NAKAAGI ka na ba nga gipanamastamasan tungod sa diskriminasyon? Tingali tungod kini sa kolor sa imong panit, sa imong relihiyon, sa imong pagkabutang, o edad. Kadtong kanunay nga gipanamastamasan nagkinabuhi sa kahadlok nga sila sigehan na lang ug pagmaltrato. Dihang maglakaw sila uban sa mga tawo, mamalit, mobalhin ug eskuylahan, o motambong ug mga salo-salo, sila kanunayng mabalaka.

Dugang pa, ang mga biktima sa pagpihig ug diskriminasyon mahimong maglisod sa pagpangitag trabaho, o hatagan lang ug menos nga medikal nga pag-atiman, menos ug kalidad nga edukasyon, ug dili sila makatagamtam sa pipila ka butang nga ginatagamtam sa ubang mga tawo diha sa komunidad ug menos silag mga katungod may kalabotan sa balaod. Dihang sulsolan sa kadagkoan sa gobyerno, ang diskriminasyon mahimong mosangpot ug pagpuo sa tribo. Ang usa ka pananglitan sa karaang panahon bahin sa pagsulay sa pagpuo sa kaliwat makita diha sa Bibliya sa basahong Ester. Nahitabo kini tungod sa pagdumot ug pagpihig.—Ester 3:5, 6.

Ang diskriminasyon dili mawala bisag duna pay mga balaod maylabot niini. Ang kanhi Pangulong Komisyonado sa Tawhanong mga Katungod sa United Nations nag-ingon: “Unom ka dekada na nga gisagop ang Tibuok-Kalibotang Deklarasyon sa Tawhanong mga Katungod . . . , apan ang mga prinsipyo may kalabotan sa pagpihig ug diskriminasyon wala gihapon ipadapat sa mga nasod.” Makapatugaw kana kay nagkadaghan ang mga nanglangyaw ug mga nangagiw ngadto sa ubang mga nasod.

Busa damgo ba lamang ang usa ka katilingban nga walay pagpihig? O mabuntog ba ang pagpihig ug diskriminasyon? Hisgotan sa sunod nga mga artikulo kining mga pangutanaha.