UNSAY imong tan-aw sa mga tawo nga lahi kanimog kolor o rasa? Gilantaw ba nimo sila nga sama sila kanimo? Ikasubo nga gilantaw sa mga tawo ang pipila ka rasa ingong ubos. Sumala sa usa ka diksiyonaryo, ang pulong “rasismo” maoy “usa ka pagtuo nga ang tawo sa ubang rasa ubos kay sa uban ug kini nga pagtuo moresultag pagkamapihigon.”

Ang rasismo miresultag dakong kadaot. Tungod sa pagtuo nga labaw ang usa ka rasa kay sa uban, “gipakamatarong sa mga tigsulong ug nasod ang ilang pagpangdaogdaog sa mga nitibo ug ang ilang pagpangulipon sa ubang mga rasa,” matod pa ni Professor Wen-Shing Tseng diha sa iyang basahon nga Handbook of Cultural Psychiatry. Siya midugang nga ang rasa gigamit “sa pagpakamatarong sa dili patas nga kahimtang diha sa katilingban, ekonomiya, ug politika.” Bisan karon ang mga tawo sa daghang bahin sa kalibotan mapihigon gihapon sa rasa. Gipasukad ba sa kamatuoran kining makadaot nga pagtuo? Unsay giingon sa siyensiya ug sa Bibliya?

Nadiskobrehan diha sa mga pagtuon may kalabotan sa mga gene nga dili tinuod kanang rasismo. Nakita sa mga tigdukiduki nga nagtuon sa mga tawo nga gikan sa lainlaing kontinente nga ang kalainan sa DNA sa duha ka tawo nga wala tuyoa pagpili nga gikan sa lainlaing bahin sa kalibotan maoy mga 0.5 porsiyento. a Ug ang 86 ngadto sa 90 porsiyento sa maong mga kalainan makita diha sa bisan unsang pundok sa rasa. Busa 14 porsiyento lang o kubos pa sa 0.5 porsiyento ang kalainan tali sa mga rasa.

Sanglit “ang mga tawo managsamag mga gene,” matod pa sa basahong Nature, “ang mga impormasyong nahipos maylabot sa gene magamit sa pagbuhi ug pagpatay sa isyu bahin sa pagpihig sa rasa.”

Dili bag-o kini nga kaisipan. Niadtong 1950 ang United Nations Educational, Scientific, and Cultural Organization nagpatik ug mga pahayag sa pagsumpo sa rasismo. Ang mga antropologo,  mga eksperto bahin sa gene, ug mga sosyologo maoy nagsulat sa maong mga pahayag. Bisan pa niana, wala gihapon mawagtang ang rasismo. Klaro nga dili pa igo ang pagkahibalo sa kamatuoran bahin sa rasismo. Kinahanglang abton usab ang kasingkasing. Si Jesu-Kristo miingon: “Nagagula gikan sa kasingkasing ang daotang mga pangatarongan.”—Mateo 15:19, 20.

Ang Bibliya gisulat aron sa pag-abot sa kasingkasing. Pananglitan, dugang pa sa pagpadayag sa siyentipikanhong kamatuoran nga “gihimo [sa Diyos] gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta,” ang Bibliya nag-ingon usab: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35; 17:26) Dili ka ba malipay nga dunay ingon niini ka matarong nga Diyos?—Deuteronomio 32:4.

Gusto ni Jehova nga Diyos nga atong ipakita nga kita nahigugma kaniya pinaagi sa pagsundog kaniya. Ang Efeso 5:1, 2 nag-ingon: “Mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma.” Ang “paglakaw diha sa gugma” naglakip sa paghigugma sa mga tawo sama sa paghigugma sa Diyos kanila, bisag unsa pay ilang rasa o kolor sa panit.—Marcos 12:31.

Dili dawaton sa Diyos ingong iyang mga alagad kadtong kansang kasingkasing puno sa pagkadaotan, pagdumot, ug pagpihig sa rasa. (1 Juan 3:15) Sa pagkatinuod, duol na kaayo ang panahon dihang wagtangon sa Diyos ang tanang daotan ibabaw sa yuta. Kadto lamang magsundog sa iyang mga hiyas ang magpabilin. Dayon ang tanang tawo mahimong usa lang ka pamilya—sa literal ug sa espirituwal nga diwa.—Salmo 37:29, 34, 38.