Guntinga ug Tipigi

20 ka Sugyot Kon Unsaon Paggamit ang Imong Panahon

“Magpadayon sa paglakaw sa kaalam . . . , nga magpalit sa nahiangay nga panahon alang sa inyong kaugalingon.”—Colosas 4:5.

HUMAN nimo maplano ang imong mga buluhaton, ang sunod nga lakang mao ang paghimo niana. Kining mosunod nga mga sugyot makatabang kanimo.

1 ILISTA ANG IMONG INADLAWNG BULUHATON. Isulat kana sumala sa kaimportante niana. Markahi ang angayng gahinag daghang panahon. Butangig tsek ang natrabaho na nimo. Ilakip sa imong listahan sa sunod adlaw ang wala nimo matrabaho niining adlawa.

2 PANEGUROA NGA PAREHAS ANG ESKEDYUL DIHA SA IMONG MGA KALENDARYO. Kon unsay imong gisulat sa kalendaryo diha sa kompiyuter, isulat usab kana sa kalendaryo sa imong gadyet aron wala kay malimtan nga buluhaton.

3 ILISTA ANG MGA LAKANG NGA KINAHANGLANG HIMOON alang sa usa ka proyekto ug ihan-ay kana sumala sa pagkasunod-sunod.

4 IESKEDYUL PAG-UNA ANG LABING IMPORTANTENG BULUHATON. Sayon ra unya nimong malugaran ang dili kaayo importanteng mga buluhaton.

5 PAGTAKDAG MAKATARONGANONG MGA TUMONG. Mas makataronganon ang tumong nga mohanas sa usa ka trabaho kay sa mahimong presidente sa usa ka kompaniya.

6 DAWATA ANG KAMATUORAN NGA DILI NIMO MAGAHINAG PANAHON ANG TANANG BULUHATON. Kon posible, gahinig igong panahon ang mas importanteng mga buluhaton. Apan komosta ang mga trabahong dinalian? Kon dili nimo kana mahimong ipatrabaho sa uban o puwede nang dili buhaton, ayaw kaayo paggugol ug daghang panahon niana. Ang ubang buluhaton makahulat ug pila ka bulan o kaha dili na kinahanglang trabahoon. Gahinig panahon kadtong mga buluhaton nga may kalabotan sa imong mga tumong.

7 ILISTA KON PILA KA ORAS ANG MAGUGOL NIMO SA MATAG TRABAHO. Aron mamonitor kon unsa ka daghang panahon ang imong magugol sa matag trabaho, ilista kana sulod sa usa o duha ka semana. Ang imo bang panahon nausik sa dili importanteng mga buluhaton? Duna bay kanunayng mobalda kanimo? Unsang oras o adlaw nga lagmit kanunay kang mabalda? Likayi ang mga buluhaton nga makausik ug panahon.

8 AYAW PAG-ESKEDYUL UG DAGHANG TRABAHO. Kon planohon nimo ang pagpamalengke, pagpaayog sakyanan, pag-abiabig bisita, pagtan-awg sine, ug pagbasa—sulod lang sa usa ka adlaw—mobati ka nga morag gigukod ug dili relaks.

 9 LIKAYI ANG MGA KABALDAHAN. Pagtakdag oras nga dili ka gustong madisturbo, gawas lang kon importante kaayo. Kon mahimo, i-off ang imong telepono nianang orasa maingon man ang mga pop-up alert sa kompiyuter nga makabalda kanimo.

10 IESKEDYUL ANG KINALISORANG TRABAHO SA MGA ORAS NGA IKAW ALERTO UG WALA PA GIKAPOY.

11 BUHATA DAYON ANG TRABAHO NGA DILI NIMO GANAHAN. Kon mahuman nimo kana, mas sayon na ang paghimo sa uban pang trabaho.

12 DAHOMA ANG MGA KABALDAHAN UG PAGTAKDA DAAN UG PANAHON ALANG NIANA. Kon mabanabana nimo nga makaabot ka sulod sa 15 minutos, mas maayo kon mosaad ka nga moabot sulod sa 25 minutos. Kon pananglit ang imong appointment mahuman ug usa ka oras, pagtakda ug dugang 20 minutos. Paggahin ug oras nga bakante diha sa imong eskedyul.

13 PAHIMUSLI ANG PANAHON. Mahimo kang maminawg balita o mga rekording samtang namalbas. Pwede sab kang magbasa samtang naghulat ug sakyanan o nagbiyahe. Siyempre pwede sab kang magrelaks. Apan ayawg usiki ang maong panahon aron dili ka maulahi sa imong eskedyul.

14 PASIMPLEHA ANG TRABAHO. Pananglitan kon manilhig ka sa nataran, unaha ang bahin nga daghag hugaw. Kon nasilhigan na nimo kana, sama rag nasilhigan na nimo ang tibuok nataran.

15 KON GIDAGHANAN KA RA SA IMONG TRABAHO, ISULAT ANG MATAG USA NIANA SA GAMAYNG PAPEL. Dayon bahina sa duha ka grupo ang mga papel ug markahig: “Para Karon” ug “Para Ugma.” Pagkaugma mao gihapon ang buhata.

16 PAGGAHIN UG PANAHON SA PAGRELAKS. Kon makapahulay ka, mas daghan kag mahimo kay sa magsigeg obertaym.

17 ISULAT ANG PROBLEMA ug kon nganong nakapatugaw kana kanimo. Dayon ilista ang tanan nimong mahunahunaan nga solusyon.

18 LIKAYI ANG PAGKA-PERPEKSIYONISTA. Kon human na ang usa ka trabaho, undangi na kana. Padayon sa sunod nga buluhaton.

19 AYAW PAG-AGAD KON KANUS-A KA GANAHANG MOTRABAHO. Kon dunay trabaho, buhata dayon kana.

20 MAGMAPAILIN-ILINON. Mga sugyot lamang kini ug dili balaod. Sulayi kon hain niini ang mas epektibo ug ipahiangay sa imong kahimtang ug panginahanglan.