Tabang Alang sa Usa ka Magul-anong Batan-on

SI Sibia, usa ka 13-anyos nga estudyanteng babaye sa Mexico, nakamatikod nga ang usa niya ka klasmet subsob nga mosulod sa klase nga maghilak. Gipaningkamotan niya nga hupayon siya. Usa ka adlaw niana, ang klasmet ni Sibia mitug-an nga ang iyang amahan alkoholiko ug mangulata sa iyang inahan.

Si Sibia nag-asoy: “Giingnan ko niya nga dili na siya gustong mabuhi pa, nga misulay pa gani siya sa pagpakamatay. Matod niya, walay nagmahal niya ug gibati niyang nag-inusara. Ako mitubag nga adunay Usa nga nahigugma pag-ayo kaniya, ang labing hinungdanong Persona sa tibuok uniberso. Dayon akong gisaysay ang katuyoan ni Jehova alang sa katawhan.”

Human niana, gihatagan ni Sibia ang iyang klasmet ug libro nga Mga Pangutanang Gisukna sa mga Batan-on—Mga Tubag nga Mosaler ug gitun-an nila kini kada adlaw panahon sa reses. Ang dalagita inanayng nausab, nga dili na hilomon kondili makighugoyhugoy na sa uban. Sa iyang sulat kang Sibia, ang dalagita miingon: “Salamat sa imong pagpakighigala kanako ug sa imong pagkamasinaboton. Morag ikaw ang igsoon nga kanunay nakong gipangandoy. Karon, nahibalo na ko nga adunay nagtagad kanako—si Jehova.”

Lagmit aduna kay kailang batan-on nga makabenepisyo sa librong Gisukna sa mga Batan-on. Ang 39 ka kapitulo niini naglakip sa mosunod nga mga ulohan: “Sa Unsang Paagi Makabaton Akog Tinuod nga mga Higala?,” “Unsay Ikasulti Bahin sa Sekso sa Dili pa Magminyo?,” ug “Unsaon Nako Pagkaila Kon Kini Tinuod nga Gugma?” Makahangyo kag kopya pinaagi sa pagpil-ap sa nagaubang kupon ug pagpadala niana ngadto sa adres nga makita diha sa kupon o sa nahiangay nga adres nga gilista sa panid 5 niining magasina.

□ Interesado akong makadawat ug kopya sa librong gipakita dinhi.

□ Palihog kontaka ako bahin sa usa ka libreng pagtuon sa Bibliya sa balay.