Miapil Ako sa Kinamaayohang Lumba sa Akong Kinabuhi

Sumala sa giasoy ni Karl-Erik Bergman

Nindot kaayo ang akong pamati sa dihang modagan kog kusog. Paspas kong modagan, mao nga ang paglumbag dagan sa mubong distansiya nahimong pangunang bahin sa akong kinabuhi.

NIADTONG 1972, sa edad nga 17, miapil ako sa asosasyon sa mga atleta. Akong nakita sa ulahi nga kinahanglang maningkamot gyod ko kon gusto kong mahimong maayo nga atleta. Ang pagkakusog modagan dili igo aron mahimong kampeyon. Apan andam ako sa pagbansay.

Sa nag-edad akog 22, nakuha ako sa tem sa nasod sa Finland. Pagkasunod tuig akong nakuha ang kinamaayohang aberids nga oras sa tanang atleta sa Finland sa distansiya nga 100-metro nga lumba. Kay nadaot ang ugat sa akong bagtak ug ang kaunoran sa akong paa, wala nako makab-ot ang akong tumong. Sanglit interesado ako sa pagdagan, nahimo akong tigbansay sa mga atleta nga dunay potensiyal. Niadtong 1982, nagplano ako sa pagbalhin sa California sa Amerika aron sa pagtungha sa unibersidad ug sa pagpadayon sa karera sa esport, kay mas maayo man ug klima didto. Mipalit pa gani kog tiket sa ayroplano.

Kon Unsay Nakapausab sa Akong Kinabuhi

Usa ka gabii niana, una pa ako mogikan paingon sa California, mibagting ang dorbel. Pagbukas nako sa pultahan, dihay duha ka babaye nga Saksi ni Jehova. Kalmado kaayo sila ug ugdang nga maoy hiyas nga gikinahanglan sa usa ka atleta. Ako silang gipadayon ug gipalingkod. Human sa among makapainteres nga panag-estoryahay, ila kong gibinlan ug librong Ikaw Mabuhing Walay Kataposan sa Paraiso sa Yuta. a Gisugdan nako kinig basa. Sa dihang nanunga-tunga na ako, akong nakita nga tinuod ang giingon niini. Ang mga babaye namalik, ug akong gipangutana sila kon unsay akong buhaton aron mahimong Saksi ni Jehova. Sila mitubag nga kinahanglang magtuon ako sa Bibliya.

Gidawat nako ang pagtuon sa Bibliya ug nagsugod usab ako pagtambong sa mga tigom uban sa mga Saksi sa Kingdom Hall sa Vantaa, diin ako nagpuyo. Akong nakita nga ang ilang gitudlo gipasukad gayod sa Bibliya. Sa pagkatinuod, ang mga kamatuoran sa Bibliya nga akong nakat-onan anam-anam nga nakapausab sa akong panglantaw sa kon unsa gayod ang importante sa kinabuhi. Busa miadto ako sa travel agency ug akong giuli ang tiket ug gikuha ang bayad. Akong gigamit ang pipila sa maong kantidad sa pagpalit ug amerkana para sa mga tigom ug bag nga kasudlan sa akong Bibliya ug literatura. Nabawtismohan  ako ingong Saksi ni Jehova sa kombensiyon sa Helsinki niadtong 1983.

Ang Ubang mga Atleta Miduyog Kanako

Samtang nagtuon ako sa Bibliya, mainiton nakong gipaambit kini sa akong mga higala. Dili sila makatuo. Gani, dihay hungihong nga nabuang na kono ko. Usa-usa nga gilikayan ako sa akong mga higala. Human ako mabawtismohi, makahibalag akog kaubang mga atleta diha sa lumbaanan, kay kanunay man kong mag-ehersisyo. Nasabtan nila sa among panag-estorya nga bisag nausab ko, wala madaot ang akong pangisip.

Sa ngadto-ngadto, daghan niini nga mga atleta nakasabot nga makataronganon ug angayng palandongon ang akong gisulti kanila. Sila nakamatikod nga dili na ako mamalikas ug dili na ako agresibo. Dihay pipila nga gustong mahibalog dugang bahin sa Bibliya. Malipay kaayo ako sa pagpakita sa uban nga gipakasama sa Bibliya ang Kristohanong pagkinabuhi sa usa ka lumba. Kita anaa sa lumba alang sa ganti nga kinabuhing walay kataposan.—2 Timoteo 2:5; 4:7, 8.

Akong naamgohan nga ang tinuod nga kahulogan ug kalipay sa kinabuhi wala magdepende sa pagdaog sa kompetisyon, kondili sa pagtuman sa kabubut-on sa atong Maglalalang. Ang akong pagpakig-estorya sa ubang mga atleta nakapalihok sa uban sa pagsusi pag-usab sa ilang mga tumong, ug daghan ang midawat sa kamatuoran sa Bibliya. Makapalipay, ubay-ubay kanila nagpakitag kasibot sa pag-alagad sa Diyos sama sa ilang gipakitang kasibot sa esport.

Ang usa kanila mao si Yvonne, nga usa ka hawod nga magdadagan sa distansiya nga 800-metros. Siya ang kinakusgang modagan sa Scandinavia niana nga distansiya ug naghupot sa rekord sa Finland. Siyay nagrepresentar sa Finland ug nagmadaogon sa mga sangka sa esport sa mga nasod sa Uropa. Tungod sa among panaghisgot, nakita ni Yvonne nga walay kapuslanan ang pagtinguha nga mainila niining kalibotana. Iyang nakat-onan sumala sa gitudlo sa Bibliya nga kining kalibotana lumalabay, kay pulihan kinig usa ka bag-ong kalibotan nga iya sa Diyos.—1 Juan 2:17.

Wala madugay gidawat ni Yvonne ang pagtuon sa Bibliya. Nianang panahona, gipangulitawhan siya ni Jouko, kinsa maayo usab nga atleta sa tem sa Finland. Sa pagkatinuod, gihawasan pa gani ni Jouko ang Finland sa kampeyonato sa mga nasod sa Uropa ug sa tibuok kalibotan. Sa ngadto-ngadto, si Yvonne ug Jouko mibalhin sa Amerika aron ipadayon ang ilang karera ingong atleta.

Didto gipadayon ni Yvonne ang iyang pagtuon sa Bibliya, ug si Jouko miduyog usab. Si Jouko nagtuon aron lang sa pagpangitag sayop ug ipakita kana kang Yvonne. Apan anam-anam nga mitisok usab sa kasingkasing ni Jouko ang kamatuoran sa Bibliya. Si Yvonne ug si Jouko nagminyo ug sa ulahi nagpahinungod sa ilang kinabuhi sa Diyos pinaagig bawtismo. Karon silang duha maoy mga payunir, nga bug-os-panahong mga alagad sa mga Saksi ni Jehova.

Nasugdan usab nakog pagtuon sa Bibliya si Barbro, nga taga-Finland kinsa kampeyon sa 400-metros nga lumba alang sa mga babaye. Dili pa dugay nga gihawasan niya ang Finland sa sangka sa esport sa mga nasod sa Uropa. Si Barbro ug ang iyang bana nga si Jarmo, kinsa usa ka pole-vaulter kaniadto, mibalhin sa Sweden. Didto gipadayon ni Barbro ang pagtuon sa Bibliya, ug si Jarmo nagtuon usab. Silang duha gustong mahibalo sa katuyoan sa kinabuhi, ug sa nakakat-on na sila sa kamatuoran sa Bibliya, sila nagpabawtismo didto sa Sweden. Sa ngadto-ngadto, si Jarmo nahimong physiotherapist, ug sila madasigon sa pagsangyaw. Si Jarmo nag-alagad ingong ansiyano sa Kristohanong kongregasyon.

Unya anaa pa si Heidi, nga hawod usab nga magdadagan, kinsa bag-o pang nagtin-edyer. Kay ako may nagbansay niya, akong namatikdan nga interesado siya sa Diyos. Busa usa ka adlaw niana, akong gipaambit kaniya ang mga pagtulon-an sa Bibliya bahin sa Gingharian sa Diyos, ug ang mga panalangin nga ipahinabo niini dinhi sa yuta. Ako siyang gipangutana, “Motuo ka ba nga atong matagamtam kining gisaad nga mga panalangin?”—Salmo 37:11, 29; Mateo 6:9, 10.

“Siyempre,” siya mitubag. Interesado siyang motuon sa Bibliya. Busa diha akoy gisabot nga sister nga maoy modumala sa pagtuon. Paglabayg pipila ka tuig, si Heidi nagpabawtismo ingong simbolo sa iyang pagpahinungod sa Diyos. Sa ngadto-ngadto, siya midako nga usa ka matahom nga babaye nga mahigugmaon sa Diyos ug nahimong akong asawa. Buotan siya nga kapikas, nga determinadong moalagad sa Diyos. Kon kana nga determinasyon  gitumong pa niya sa esport, siya mahimo untang maayong atleta.

Ang akong manghod nga si Peter, nga aktibo usab sa esport, sa primero supak sa nagsugod ako sa pagtuon sa Bibliya. Dayon gihatagan nako siyag librong Mabuhing Walay Kataposan. Sa ulahi siya miingon nako: “Gibasa ko na kining libroha, apan wala ako makasabot sa ubang bahin niini. Mahimo ba ko nimong tabangan?” Akong gisabot ang laing Saksi sa pagdumala sa pagtuon kaniya, ug human sa upat ka bulan nga pagtuon, siya nabawtismohan. Dayon siya naminyo, ug ang iyang asawa nag-alagad ingong payunir.

Nagpadayon sa Lumba

Sa wala pa ako mabawtismohi, gusto kong magmisyonaryo. Wala magdugay human sa akong bawtismo, nagsugod ako sa pag-alagad ingong payunir. Akong nasabtan nga kon apil ka sa lumba alang sa kinabuhi, kinahanglang maningkamot gyod ka. Ako ug ang akong asawa nga si Heidi miaplay sa Gilead, nga tunghaan sa mga Saksi ni Jehova alang sa misyonaryo didto sa New York, ug sa 1994 kami gidawat. Human sa among paggraduwar, giasayn kami sa Latvia, nga Russian ang sinultihan.

Ang mga tawo nawad-ag paglaom dihang nabungkag ang Unyong Sobyet. Ang Bibliya gidaot ug gidili, apan among nakita nga daghan ang interesado sa mensahe niini. Nalisdan kaayo ko sa pagtuon ug Russian. Pero paglabay sa unom ka tuig nga pag-alagad ingong misyonaryo sa Latvia, gitudlo ako sa pagduaw ug pagdasig sa mga kongregasyon sa mga Saksi ni Jehova ingong nagapanawng ministro. Nagpadayon ako niini nga pag-alagad, uban sa akong matinumanong asawa.

Sulod sa katuigan, daghan kog natabangan sa pagpadayon sa lumba sa kinabuhi, ang “tinuod nga kinabuhi” diha sa bag-ong kalibotan sa Diyos. (1 Timoteo 6:19) Aron mabansay ang mga atleta nga mahimong hawod kinahanglang sabton silag maayo. Kinahanglan tabangan sila sa tigbansay sa pag-ugmad sa ilang abilidad ug sa pagbuntog sa ilang mga kahuyangan. Kinahanglang iya silang dasigon sa pagpadayon ug sa pagbuhat sa ilang kinamaayohan.

Nahingangha ako sa dakong kaamgiran sa Kristohanong pagkinabuhi ug sa kinabuhi sa atleta, sama sa gipakita ni apostol Pablo diha sa iyang unang sulat sa mga taga-Corinto. Ang malamposong atleta kinahanglang magbansay sa iyang lawas ug dili lang maghanduraw nga makadaog. Siya magtakda ug mga tumong nga iyang makab-ot ug magplano kon unsaon kini pagkab-ot. Kon malinga siya ug mohunong sa pagpaningkamot sa pagkab-ot niana, makawang ang tanan niyang paghago. Sa susama, ang usa ka Kristohanon kinahanglang maningkamot pag-ayo diha sa lumba sa kinabuhi.

Ang malamposong atleta kinahanglang padayong magsunod sa iyang rutina sa pagbansay, nga mag-amping sa iyang diyeta. Ingon usab niini ang matuod nga Kristohanon. Sa espirituwal nga diwa, dili siya mokaon ug imoral nga mga pagtulon-an ug dili makigbahin sa “lamesa sa mga demonyo,” ingon sa gipamulong ni apostol Pablo. Hinunoa, siya mokaon ug sustansiyadong espirituwal nga pagkaon nga gitagana sa Diyos diha sa iyang Pulong, ang Bibliya. (1 Corinto 10:21) Dugang pa, kon may mga problemang motungha, ang malamposong atleta magpabiling positibo. Siya modawat sa iyang mga sayop ug mohimog mga kausaban. “Ang akong pagdagan dili kay walay-katinoan,” si Pablo misulat. “Hinunoa ako nagmakmak sa akong lawas,” matod niya, aron makapabilin diha sa lumba sa kinabuhi.—1 Corinto 9:24-27.

 Ako ug ang akong asawa regular nga nag-ehersisyo diha sa gym aron makapabiling himsog. Apan wala kami magpababag niini sa pag-alagad kang Jehova, kinsa naglalang sa mga tawo sa katingalahang paagi. (Salmo 139:14) Among gipaningkamotan nga makab-ot ang ganti nga “tinuod nga kinabuhi” diha sa “umaabot” nga bag-ong kalibotan sa Diyos.—1 Timoteo 4:8.

Human sa paghisgot sa ‘bagang panganod’ sa mga Kristohanon sa unang panahon, si apostol Pablo nag-awhag: “Tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan.” (Hebreohanon 12:1) Wala nay mas importante pa kay sa pagdagan sa lumba sa kinabuhi. Tungod kay ang tanan nga modagan niini nga lumba hangtod sa kataposan makadawat ug dumalayong mga panalangin.—2 Timoteo 4:7, 8.

[Footnote]

[Hulagway sa panid 14]

Sa tungatunga sa katuigan sa 1980, ako ug si Heidi uban kang Yvonne sa itaas ug kang Jouko ug sa ilang anak sa ubos

[Hulagway sa panid 15]

Nagsangyaw uban kang Heidi karon

[Hulagway sa panid 15]

Sa 2009 nga kombensiyon sa mga Saksi ni Jehova sa Helsinki. Si Yvonne ug Jouko sa among wala ug si Jarmo ug Barbro sa among tuo

[Picture Credit Line sa panid 12]

Published in Aamulehti 8/21/1979