NAG-ENJOY KA BA SA KRISTOHANONG MGA TIGOM?

OO → PADAYON SA PAGTAMBONG

WALA → UNSAY ANGAY NIMONG HIMOON?

ANG Bibliya nagsugo nga magtigom ang mga Kristohanon alang sa pagsimba. (Hebreohanon 10:25) Apan komosta kon wala ka mag-enjoy sa tigom? Komosta kon naghanduraw ka na sa gusto nimong buhaton kon wala ka pa sa tigom? Paghimog kausaban pinaagi sa pagpadapat sa usa o kapin pang mga sugyot.

1. TAMBONG KANUNAY

Makatabang nga teksto: “Ang uban dili na tigtambongan sa mga tigom alang sa pagsimba, apan dili gayod nato kana buhaton.”—Hebreohanon 10:25, Contemporary English Version.

Nganong kanunayng himoon ang usa ka butang nga wala gani ka mag-enjoy? Kay mao nay paagi aron makakat-on ka sa pag-enjoy niana! Hunahunaa: Mahawod ka ba ug malingaw sa usa ka esport kon panagsa ra ka magpraktis? Kini nga prinsipyo mapadapat usab sa Kristohanong mga tigom. Sa magsige kag tambong mas masuod ka sa Diyos. Ug tungod niana, ganahan ka nang motambong!—Mateo 5:3.

Sugyot: Human sa tigom, sultihi ang mamumulong kon unsay imong nagustohan sa iyang pakigpulong. Isulat sa notbok ang usa ka kaayohan nga imong nakuha sa pagtambong. Sanglit kadaghanan sa hisgotan sa tigom bahin man sa Kristohanong pagsangyaw, himoang tumong nga mapauswag ang pagpahayag sa imong pagtuo ngadto sa uban. Niining paagiha, makapahimulos ka sa gihisgotan sa tigom.

“Sukad sa pagkabata gitudloan ko nga importante gyod ang mga tigom, ug wala sa akong hunahuna nga pwede rang dili motambong. Kini nga tinamdan nagpabilin kanako hangtod karon.”—Kelsey.

Hinumdomi: Kadtong kanunayng motambong mas ganahan sa mga tigom—ug mas daghan silag makat-onan!

 2. PAMATIG MAAYO

Makatabang nga teksto: “Tagda kon giunsa ninyo pagpatalinghog.”—Lucas 8:18.

Ang mga tigdukiduki nag-ingon nga human sa tibuok adlaw, malimtan na sa mamiminaw ang mga 60 porsiyento sa presentasyon nga iyang nadunggan. Kon pananglit ang imong kuwarta mahurot sa ingon niana ka dali, dili ka ba mangitag paagi aron dili dayon kana mahurot?

Sugyot: Lingkod sa atubangan, nga tapad sa imong ginikanan, aron dili kaayo ka mabalda. Pagnota. Tinuod, managlahi ang paagi sa mga tawo sa pagkat-on, apan ang pagnota makapapokus sa imong atensiyon sa mamumulong—ug marepaso pa gyod nimo kini.

“Naglisod ko sa pagpokus panahon sa tigom, apan dili na karon. Akong hinumdoman kanunay kon nganong mitambong ko. Dili kini rutina lang, sama sa pag-adtog simbahan. Motambong ko aron sa pagsimba ug sa pagkat-on—para duna koy ikapadapat sa akong kinabuhi.”—Kathleen.

 Hinumdomi: Ang pagtambong sa tigom nga dili mamati sama rag pag-adto sa kombira nga dili mokaon.

3. PAKIGBAHIN

Makatabang nga teksto: “Ang mga tawo makakat-on sa usag usa, sama sa puthaw nga mahait pinaagig puthaw.”—Proverbio 27:17, Good News Translation.

Ingong batan-on, duna kay dakong papel diha sa tigom sa kongregasyon. Importante kaayo ang imong pagtambong ug pagpakigbahin, sa paghatag man ug komento o kaha sa pagpakig-estorya sa mga isigkamagtutuo.

Sugyot: Paningkamoting makakomento bisag kausa lang. Tabang sa pagpanghinlo o sa ubang buluhaton sa dili pa magsugod ang tigom, panahon sa tigom, o human niini. Pakig-estorya niadtong panagsa ra nimong ikaestorya.

“Sa tin-edyer pa, mibolunter ko sa pagtunol sa mikropono ug pagplastar sa mga gamit sa entablado. Mibati kong may nalampos, mao nga ganahan kong motambong ug sayong moabot. Ingong resulta, midako ang akong interes sa espirituwal nga mga butang.”—Miles.

Hinumdomi: Ayawg kakontento sa pagtambong lang, pakigbahin pod! Ang pagpakigbahin mas mapuslanon kay sa pagpaminaw lang.

Aron makakuhag dugang artikulo sa seryeng “Mga Batan-on Nangutana,” i-download ang ubang gula sa Pagmata! gikan sa www.dan124.com

[Kahon/Mga hulagway sa panid 21]

IKAW GIDAPIT!

Gusto ka bang

● Makakat-on sa kamatuoran bahin sa Diyos?

● Mahimong mas maayong tawo?

● Makakitag maayong mga higala?

Ang mga tigom sa mga Saksi ni Jehova makatabang nimo niining bahina—ug daghan pa! Matag semana, duha ka beses silang magtigom alang sa pagsimba diha sa ilang Kingdom Hall. Walay pagpangolektag kuwarta didto, ug ang mga bisita malipayong giabiabi.

Ayaw palabya kini nga higayon! Ang Kingdom Hall dili sama sa mga simbahan nga imong naadtoan. Sa mga tigom sa mga Saksi ni Jehova, gipasiugda ang pagtuon sa Bibliya, ug makat-onan nimo kon sa unsang paagi ang Pulong sa Diyos makatabang kanimo nga mabatonan ang labing maayong kinabuhi!—Deuteronomio 31:12; Isaias 48:17.

Sai—Sa una nakong pag-adto sa Kingdom Hall, natingala ko kay walay mga imahen, walay nagsotana, ug walay nangolektag kuwarta. Giabiabi ko sa tanan, ug gaan ang akong pamati. Ang gihisgotan sa tigom sayon sabton ug praktikal. Kini gyod ang kamatuoran nga akong gipangita!

Deyanira—Nag-edad kog 14 anyos sa una nakong pagtambong sa tigom sa mga Saksi ni Jehova. Giabiabi dayon ko sa tanan. Nalipay kaayo sila sa akong pagtambong, ug sinsero ang ilang pagtagad kanako. Tungod niini, dili na ko maulaw nga motambong pag-usab!

[Kahon/Mga hulagway sa panid 22]

Sayra kon unsay hisgotan sa sunod nga tigom sa kongregasyon. Pagpilig usa ka bahin sa programa nga nakapainteres nimo ug . . .

GUNTINGA UG KOPYAHA

Kompletoha ang mosunod sa dili pa motambong.

Ngalan sa bahin:

․․․․․

⇩

Ang gusto nakong mahibaloan niining ulohana:

․․․․․

Kompletoha ang mosunod human nga nahatag ang bahin.

Ang akong nakat-onan:

․․․․․

⇩

Ang akong isulti sa mamumulong nga akong nagustohan sa iyang bahin:

․․․․․