Pagpaniid sa Kalibotan

Sa Republic of Georgia sa habagatan-sidlakan sa Europe, “halos midoble ang gidaghanon sa diborsiyo sa milabayng napulo ka tuig.” Kadaghanan sa nagdiborsiyo wala pay 20 anyos.—FINANCIAL, GEORGIA.

Sa Ireland, 17 porsiyento sa 11 ngadto sa 16 anyos nga mga batan-on “naghatag sa ilang ngalan ngadto sa dili nila kaila diha sa Internet.” Diyes porsiyento naghatag usab sa ilang “email address, cellphone number o letrato.”—THE IRISH SOCIETY FOR THE PREVENTION OF CRUELTY TO CHILDREN.

Mga 4 porsiyento lang sa mga sunog sa lasang sa tibuok kalibotan gipahinabo sa kinaiyahan. Sa tanang ubang sunog, tawo ang nakaingon—tinuyo o wala tuyoa.—PRESSEPORTAL, GERMANY.

“Mga usa sa 10 ka Amerikano [nga nag-edad ug 12 o kapin pa] gireport nga tiggamit nag ilegal nga mga droga, sama sa marijuana, cocaine, heroin, mga hallucinogen, kemikal nga simhoton o tambal nga gireseta.”—USA TODAY, U.S.A.

Pagpugong sa Kaugalingon Yawi sa Kalig-on

“Ang mga tigdukiduki nag-ingon nga ang tawo nga kulag pagpugong sa kaugalingon sa batan-on pa mahimong magkaproblema sa panglawas, maglisod sa panalapi, ug makabatog kriminal nga rekord inigkahamtong,” nag-ingon ang Time. Kapin sa 1,000 ka tawo ang gitun-an sukad pa sa pagkatawo hangtod sa edad nga 32. Sa nahamtong na, “kadtong kinsa [sa bata pa] madalidalion ug daling maglagot ug dili makahulat sa pagtagbaw sa kaugalingon o sa paghulat sa ilang turno” maoy mga tulo ka pilo nga lagmit moingon nga sila dili maayog panglawas, ubos ug kita, nag-inusara nga mga ginikanan, o nakahimog krimen. Bisan pa niana, ang “pagpugong sa kaugalingon makat-onan,” nag-ingon ang magasin, ug nagdugang: “Ang mga eskuylahan ug pamilya nga nagtudlo sa mga bata sa pagpugong sa kaugalingon mahimong himsog ug malig-ong mga hamtong.”

Paghatag ug Leksiyon sa Badlongong mga Drayber

Ang mga awtoridad sa India dunay gisulayang mga paagi sa pagsilot sa mga gahig-ulong drayber, sama sa pagpugos kanila sa pagtrabaho ingong polis sa trapiko. Kini gihimo aron makita sa mga drayber ang kahasol nga ilang nahatag tungod sa ilang paglapas sa balaod. Karon, imbes sila dakpon ug pamultahon, ang kapolisan sa Gurgaon, sa amihanan-kasadpang India, nagpugos kanila sa pagtabang usab sa pagdumala sa trapiko sulod sa 30 minutos o kapin pa. Ang ubang drayber miadmitir nga kini nakapausab sa ilang tinamdan. “Adlaw-adlaw usa ka libong drayber ang among matiketan sa Gurgaon tungod sa ang hepe sa kapolisan sa maong lugar. Kon mokooperar lang unta ang tanang gitiketan, “madugangan kamig 1000 ka ‘polis’ adlaw-adlaw.”