“Sa junior high school pa ko, wala kaayoy makig-amiga nako mao nga naguol ko. Busa pag-senior high school nako, gibag-o nako ang akong pamostura ug tinamdan—pero dili sa kaayohan. Kay gusto kong makabatog mga higala, nagpadala ko sa presyur aron ang akong mga eskolmet ganahan nako.”—Jennifer, 16. *

Ikaw ba gipresyur sa ubang batan-on? Kon mao, kini nga artikulo makatabang nimo.

Tungod sa presyur, ang usa ka maayong tawo makahimog daotan.

“Ang daotang pakig-uban makadaot sa mapuslanong pamatasan.”—1 Corinto 15:33.

“Nahibalo kita nga ang usa ka buhat daotan, pero kon magkaproblema na, madaog kita sa atong emosyon kay gusto natong pahimut-an ang uban!”—Dana.

Dili lang isigkabatan-on ang makahatag nimog presyur.

“Sa dihang buot nakong buhaton ang maayo, ang daotan ania kanako.”—Roma 7:21.

“Sagad ako ra poy nakapresyur sa akong kaugalingon; maibog man god ko sa mga butang nga ginaestoryahan sa akong mga higala nga daw makapaengganyo kaayo.”—Diana.

Kon molampos ka sa pagsagubang sa presyur, mahimo nimo kining ikapasigarbo.

“Paghupot ug maayong tanlag.”—1 Pedro 3:16.

“Sa una naglisod ko pagsagubang sa presyur, pero karon dili na ko mahadlok nga mahimong lahi, ug barogan gyod nako ang akong mga desisyon. Nindot kaayong matulog magabii nga hinlo ug konsensiya.”—Carla.

Dihang presyuron ka sa paghimog daotan, himoa kini:

Hunahunaa ang mga resulta. Pangutan-a ang imong kaugalingon, ‘Unsa kahay mahitabo kon magpadala ko sa presyur ug unya masakpan ko? Unsa kahay tan-aw sa akong ginikanan kanako? Unsa kahay tan-aw nako sa akong kaugalingon?’—Prinsipyo sa Bibliya: Galacia 6:7.

“Pangutan-on ko sa akong ginikanan, ‘Kon magpadala ka sa presyur, unsay mahitabo nimo?’ Pasabton ko nila nga kon magpadala ko, masugamak ko sa kadaot.”—Olivia.

Barogi ang imong pagtuo. Pangutan-a ang imong kaugalingon, ‘Nganong kombinsido ko nga ang pagsubay niining dalana makadaot nako o sa uban?’—Prinsipyo sa Bibliya: Hebreohanon 5:14.

“Sa gamay pa ko, igo lang kong mobalibad ug mohatag ug mubong tubag, pero karon makahatag na kog maayong tubag kon nganong ako mohimo o dili mohimo sa usa ka butang. Lig-on ko sa akong pagtuo bahin sa kon unsay maayo ug kon unsay daotan. Ang tubag gikan gyod nako, dili sa uban.”—Anita.

Hunahunaa ang imong pagkatawo. Pangutan-a ang imong kaugalingon, ‘Unsang matanga sa pagkatawo nga gusto ko nga mamahimo ako?’ Dayon hunahunaa ang presyur nga imong giatubang ug pangutana, ‘Unsa kahay himoon nianang matanga sa tawo niining situwasyona?’—Prinsipyo sa Bibliya: 2 Corinto 13:5.

“Kontento ko kon kinsa ako, busa bahala nag unsay hunahuna sa uban kanako. Total, nadawat ra man sa kadaghanan kon kinsa ako.”—Alicia.

Hunahunaa ang umaabot. Kon nag-eskuyla ka, sa pipila lang ka tuig—o kaha mga bulan—ang mga tawo nga imong gipabilib mawala ra sa imong kinabuhi.

“Dihang motan-aw ko sa among class photo, dili na ko makahinumdom sa ngalan sa uban nakong klasmet. Pero sa nag-eskuyla pa ko, mas gihatagan nakog importansiya ang ilang opinyon kay sa akong mga prinsipyo. Sayop kaayo to!”—Dawn, karon 22 anyos na.

Pangandam. Ang Bibliya nag-ingon: ‘Hibaloi kon unsaon ninyo pagtubag ang matag usa.’—Colosas 4:6.

“Ako ug ang akong igsoong babaye gipahunahuna sa akong ginikanan ug mga situwasyon, ug dayon amo kining idrama-drama aron kami mahibalo kon unsay himoon sa tinuod nga mga situwasyon.”—Christine.