“Usahay, may mga babaye nga mangayo sa akong phone number ug manghagad nga makigsekso nako. Ako silang balibaran ug dayon molakaw. Apan makahunahuna ko, ‘Unsa kaha no kon gihatagan nako siya sa akong number?’ Sa tinuod lang, ang uban kanila guwapa. Makaingon gyod ka, ‘Nganong ako man silang balibaran?’”—Carlos, * 16.

Sama kang Carlos, naglisod ka ba sa pag-atubang ug tentasyon? Kon mao, makahimo ka sa pagsukol sa tentasyon.

Ang tanan mahimong matental—bisan mga hamtong. Daghang matang ang tentasyon. Si apostol Pablo dili na batan-on dihang siya misulat: “Nahimuot gayod ako sa balaod sa Diyos . . . , apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala.” (Roma 7:22, 23) Bisan pa sa pagpit-os, si Pablo wala magpadala sa tentasyon—ug ikaw usab! Busa, nganong magpaulipon man ka sa imong pangibog? (1 Corinto 9:27) Kon makakat-on ka sa pagsukol sa tentasyon samtang bata pa, dili kaayo ka magkaproblema karon ug matabangan ka dihang mohamtong ka.

Ang media naghaling sa tentasyon. Ang Bibliya naghisgot bahin sa “mga tinguha nga iya sa pagkabatan-on,” nga nag-uros-uros. (2 Timoteo 2:22) Apan gihalingan pa kinig samot sa TV, pelikula, musika, ug libro sa mga batan-on pinaagi sa paghatag ug impresyon nga dili daotan nga magpatental. Pananglitan, kon ‘nagkahigugmaay’ ang duha ka karakter sa pelikula, seguradong dunay esena nga sila magsekso. Apan, ang Bibliya nag-ingon nga ang tinuod nga lalaki ug babaye ‘makalikay sa lawasnong mga pangibog.’ (1 Pedro 2:11, Ang Balaan nga Kasulatan) Sa ato pa, makasukol ka sa tentasyon. Pero sa unsang paagi?

Sayra ang imong mga kahuyangan. Bisag unsa pa ka lig-on ang kadena, kini mabugto gihapon sa parte nga mahuyang. Sa susama, ang imong desisyon sa pagbuhat ug maayo lagmit madaot kon diin ka mahuyang. Unsang mga kahuyangan nga kinahanglan nimong bantayan?—Prinsipyo sa Bibliya: Santiago 1:14.

Pangandam sa tentasyon. Paghunahunag mga situwasyon nga lagmit makaatubang kag tentasyon. Balay-balaya sa hunahuna kon unsay imong himoon dihang tentalon ka.—Prinsipyo sa Bibliya: Proverbio 22:3.

Palig-ona ang imong baroganan. Ang Bibliya nag-ingon nga sa gitental si Jose sa pagpakigsekso, siya miingon: “Unsaon ko pagbuhat kining dakong pagkadaotan ug makasala gayod batok sa Diyos?” (Genesis 39:9) Ang mga pulong “unsaon ko pagbuhat” nagpakita nga si Jose lig-og baroganan sa kon unsay husto ug sayop. Ingon ka ba usab niana?

Pangitag mga higala nga maayog moral. Makalikay ka sa mga tentasyon kon mopili kag mga higala nga parehas nimog moral nga baroganan. Ang Bibliya nag-ingon: “Siya nga nagalakaw uban sa mga tawong maalamon mahimong maalamon.”—Proverbio 13:20.

Likayi ang mga situwasyon nga makapasamot sa tentasyon. Pananglitan:

• Ayaw pagpalain uban sa kaatbang nga sekso.

• Ayaw pag-Internet sa oras o dapit nga lagmit matental ka sa pagtan-aw ug pornograpiya.

• Likayi ang mga tawo kansang sinultihan ug buhat makaagda nimo sa paghimog daotan.

Unsang mga prinsipyo ang imong itakda sa imong kaugalingon nga makatabang aron dili ka madala sa tentasyon?—Prinsipyo sa Bibliya: 2 Timoteo 2:22.

Pag-ampo. Si Jesus miingon sa iyang mga tinun-an: “Mag-ampo nga mapinadayonon, aron dili kamo mahiagom sa tentasyon.” (Mateo 26:41) Ang tinuod, buot gayod ni Jehova nga Diyos nga imong suklan ang tentasyon, ug makatabang siya niining bahina. Ang Bibliya nag-ingon: “Dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.